WHẸ̀DATỌ 13 - BIBLU WIWE LỌ 1923

¹ OVI Islaeli ton lẹ sọ vọ́ wà enẹ he yín oylan to nukun OKLUNỌ tọn mẹ; OKLUNỌ sọ jó yé do alọ Filìstmi lẹ tọn mẹ owhè kande.

² Dawe Zolahi tọn de sọ tin to finẹ, sọn whédo Daninu lẹ tọn mẹ, oyín mẹhe tọn nọ yín Manoa; asi etọn sọ yín wẹ̀nsinọ, bo ma jivi.

³ Angẹli OKLUNỌ tọn sọ doawuhia hlan nawe lọ, bo dọ hlan ẹn dọ, Dayi e go dinvie, hiẹ yín wẹnsinọ, bo ma jívi: ṣigba hiẹ na mọhò, bo ji visunnu de.

⁴ Enẹwutu dinvie payi, yẹn vẹ̀ we bo ma nù ovẹ̃n depope kavi ahàn sinsinyẹn de blo, bo ma sọ dù onú mawe depope blo:

⁵ na, pọ́n, hiẹ na mọhò, bo ji visunnu de; odalunhi de ma na wá ota etọn ji: na ovi lọ na yín Nazilite hlan Jiwheyẹwhe sọn adọ mẹ: ewọ na sọ sẹ nado to Islaeli whlẹn sọn alọ Filistinu lẹ tọn mẹ.

⁶ Whenẹnu wẹ nawe lọ wá bo dọ na asù etọn, dọmọ, omẹ Jiwheyẹwhe tọn de wá dè, nukunmẹ etọn sọ tin taidi nukunmẹ angẹli Jiwheyẹwhe tọn tọn, é dobu talala; yẹn ma sọ kanse e dọ fie e sọn, mọ ewọ ma sọ dọ oyín etọn na mi:

⁷ ṣigba é dọ hlan mi dọ, Dayi e go, hiẹ na mọhò, bo ji visunnu de; podọ dinvie a nù ovẹ̃n depope kavi ahàn sinsinyẹn de blo; a sọ dù onú mawe depope blo: na ovi lọ na yín Nazilite de hlan Jiwheyẹwhe sọn adò mẹ jẹ azán okú etọn tọn.

⁸ Whenẹnu wẹ Manoa vè OKLUNỌ, bo dọmọ, Ṣò OKLUNỌ, yẹn vè we, gbọ omẹ Jiwheyẹwhe tọn lọ mẹhe hiẹ ko dohlan ni sọ vọ mí de gò wá, bo plọn mí núhe mí na wà hlan ovi he yè na ji lọ.

⁹ Jiwheyẹwhe sọ tuntóai hlan ogbè Manoa tọn; angẹli Jiwheyẹwhe tọn lọ sọ vẹ́ nawe lọ de gò wá le é sinai to danji: ṣigba Manoa asú etọn ma tin to e de gba.

¹⁰ Nawe lọ sọ yawu, bo dowezun, bo dọ na asú etọn, bo dọ hlan ẹn dọ, Dayi e go, dawe lọ ko doawuhia hlan mi, he wá dẽ to azán nemudie.

¹¹ Manoa sọ fọ́nsite, bo to yìyì tó asi etọn godo, bo wá dawe lọ de, bo dọ hlan ẹn dọmọ, Hiẹ wẹ omẹ he dọhó hlan nawe lọ? Ewọ sọ dọmọ, Yẹn wẹ.

¹² Manoa sọ dọmọ, Gbọ ohó towe ni sẹ dinvie; nútẹ́ wẹ na yín wàlọ ovi lọ tọn, podọ núté wẹ na yín azọ́n etọn?

¹³ Angẹli OKLUNỌ tọn lọ sọ dọ hlan Manoa dọ, Ẹhe tọn yẹn dọ hlan nawe lọ lẹpo gbọ é ni payìdo.

¹⁴ Ewọ nidó họ ma dù nudepọpe he sọn ovẹ̃n mẹ, a sọ dike é nù ovẹ̃n kavi ahàn sinsinyẹn blo, kavi dù onù mawe depope blo; enẹ he yẹn degbè nẹ̃ na lẹpo gbọ é ni páyido.

¹⁵ Manoa sọ dọ hlan angẹli OKLUNỌ tọn lọ dọ, Yẹn vẹ́ we, gbọ mí ni do we ote, na míwlẹ nido wleawu gbọgbọẹvu de tọn na we.

¹⁶ Angẹli OKLUNỌ tọn lọ sọ dọ hlan Manoa dọ, Eyín hiẹ tlẹ do mi ote, yẹn ma to na du sọn akla towe mẹ gba: podọ eyín hiẹ na wleawu avọ́ nunina mimẹ̀ de tọn, hiẹ ma na nọma yí i do sanvọ́ hlan OKLUNỌ. Na Manoa ma yọnẹn dọ angẹli OKLUNỌ lọ tọn wẹ ewọ gba.

¹⁷ Manoa sọ dọ hlan angẹli OKLUNỌ tọnlọ dọ, Etẹ wẹ oyín towe, dọ whenuena ohó towe lẹ wá ṣẹ míwlẹ nido gbògbéna we?

¹⁸ Angẹli OKLUNỌ tọn lọ sọ dọ hlan ẹn dọ, Etẹwutu wẹ hiẹ to oyín ṣie kanbiọ, mìmọ é yín awujiji?

¹⁹ Mọwẹ Manoa yí gbọgbọẹvu lọ po avọ́ nunina jinulili tọn po, bo yí i do sanvọ to osé lọ ji hlan OKLUNỌ: angẹli lọ sọ wà nujawujawu, Manoa po asi etọn po sọ to nupón dĩn.

²⁰ Na é wá jọ, whenuena ozòlọ lọ yì aga hlan olọn dali sọn agbà lọ ji, wẹ angẹli OKLUNỌ tọn lọ yìaga to ozòlọ agbà tọn lọ mẹ: Manoa po asi etọn po sọ to nupón dín; yé sọ jai jẹ nukunmẹ yetọn lẹ ji hlan aigba.

²¹ Ṣigba angẹli OKLUNỌ tọn lọ ma sọ doawuhia hlan Manoa kavi hlan asi etọn gbede ba. Whenẹnu wẹ Manoa yọnẹn dọ angẹli OKLUNỌ tọn wẹ ewọ.

²² Manoa sọ dọ hlan asi etọn dọ, Mí na kú dandan, na míwlẹ ko mọ Jiwheyẹwhe wutu.

²³ Ṣigba asi etọn dọ hlan ẹn dọ, Eyín yè hẹnhomehùn OKLUNỌ nado hù mí, é ma do ko yí avọ́ nunina mimẹ̀ de po avọ́ nunina jinulili tọn de po to alọ mìtọn mẹ gba, mọ é ma do ko do onú helẹ lẹpo hia mí gba, kavi to ojlẹ he mẹ do ko dọ onú mọnkọ lẹ di ehelẹ.

²⁴ Yọnnu lọ sọ ji visunnu de, bo ylọ oyín etọn Samsọni: ovi lọ sọ whén, OKLUNỌ sọ dona ẹn.

²⁵ Gbigbọ OKLUNỌ tọn ṣe nado hẹn ẹn wàzón to Mahanẹhi-dani mẹ, to Zolahi po Eṣitaoli po ṣẹnṣẹn.