WHẸ̀DATỌ 12 - BIBLU WIWE LỌ 1923

¹ OMẸ Eflaimi tọn lẹ sọ bẹ́plidopọ, bo gbọn agewaji dali; yé sọ dọ hlan Jẹfta dọ, Etẹwutu wẹ hiẹ do juyì gododọ̃n nado hòavùn hẹ ovi Ammọni tọn lẹ, bo ma ylọ mí nado yì po hiẹ po? mí na yi miyọn do mè ohọ̀ towe do oji we.

² Jẹfta sọ dọ hlan yé dọ, Yẹn po omẹ ṣie lẹ po ko tin to avùn daho kòn hẹ ovi Ammọni ton lẹ; whenuena yẹn ylọ mì, mì ma whlen mi sọn alọ yetọn mẹ gba.

³ Whenuena yẹn sọ mọ dọ mì ma whlẹn mi gba, Yẹn yí ogbẹ̀ ṣie do alọ ṣie mẹ, bo juyì gododọ̃n do ovi Ammọni tọn lẹ ji. OKLUNỌ sọ jó yé do alọ ṣie mẹ: be etẹwutu wẹ míwlẹ ka hẹji wá dẽ to azán he gbè, nado hòavùn hẹ mi?

⁴ Whenẹnu wẹ Jẹfta bẹ́ omẹ Gileadi tọn lẹpo plidopọ, bo hòavùn hẹ Eflaimi: omẹ Gileadi tọn lẹ sẹ̀ hò Eflaimi, na yé dọmọ, Mẹjegbé Eflaimi tọn wẹ mì wutu, mì Gileadinu lẹ, to ogbla Eflaimi tọn mẹ, podọ to ogbla Manassẹ tọn mẹ.

⁵ Gileadinu lẹ sọ yí tòpẹsẹ Jọdani tọn lẹ jagọ do Eflaiminu lẹ go: é sọ yín mọ, dọ whenuena ome de sọn mẹjègbé Eflaimi tọn lẹ mẹ dọmọ, Gbọ yẹn ni yì gododọ̃n, omẹ Gileadi tọn lẹ nọ dọ hlan ẹn dọ, Eflaiminu de wẹ hiẹ la? Eyín ewọ dọmọ, Lala;

⁶ whenẹnu wẹ yé dọ hlan en dọ, Bo dọ Ẹibbolẹti dinvie; ewọ sọ dọ Sibbolẹti; na ewọ ma sọgàn lẹ́dó nado ylọ ẹ dogànji; whenẹnu wẹ yé hẹn e go, bo hù i tó tòpẹse Jọdani tọn lẹ tó: finẹ fọtọ́n kandenukunawe jai te sọn Eflaimi mẹ.

⁷ Jẹfta sọ dawhèna Islaeli owhè ṣidopo. Whenẹnu wẹ Jẹfta Gileadinu kú, bọ yè sọ di i do dopo tòdaho Gileadi tọn lẹ mẹ.

⁸ To godo etọn Ibzani Betlebẹm tọn dawhèna Islaeli.

⁹ Ewọ tindo visunnu ogbàn, é do viyọnnu ogbàn hlan gbéjì, bo sọ hẹn viyọnnu ogbàn sọn gbéji wá whégbe na visunnu etọn lẹ. Ewọ sọ dawhẹ̀na Islaeli owhè ṣinawe.

¹⁰ Ibzani sọ kú yè sọ di i to Betlehẹm.

¹¹ To godo etọn Elọni Zẹbuluninu dawhẹ̀na Islaeli; ewọ sọ dawhèna Islaeli owhè ao

¹² Elọni Zẹbuluninu kú, yè sọ di i to Aijalọni mẹ to aigba Zẹbuluni tọn ji.

¹³ To godo ewọ tọn Abdọni visunnu Hillẹli ton Pilatoninu dawhẹ̀na Islaeli.

¹⁴ Ewọ tindo visunnu kande podọ visunnu visunnu lẹ tọn tọn ogbàn, he nọ hẹ́ ketẹkẹtẹvu kandegbàn ji: é sọ dawhèna Islaeli owhè ṣinántọ̀n.

¹⁵ Abdọni visunnu Hillẹli Pilatọninu kú, yè sọ di i to Pilatọni mẹ to aigba Eflaimi tọn ji, to otò okọta Amalekinu lẹ tọn mẹ.