WHẸ̀DATỌ 11 - BIBLU WIWE LỌ 1923

¹ DINVIE Jẹfta Gileadinu yín omẹ asuka hlọnhlọn tọn de, ewọ sọ wẹ visunnu gàlọtọ de tọn: Gileadi wẹ sọ ji Jẹfta.

² Asi Gileadi tọn sọ ji visunnu lẹ nẹ; whenuena visunnu asi etọn tọn lẹ whẹ́n, yé yàn Jẹfta jẹgbonu, bo dọ hlan ẹn dọmọ, Hiẹ ma na dugú to owhé oto mìtọn tọn gbè gba; na visunnu yọnnu devo tọn wẹ hiẹ

³ Whenẹnu wẹ Jẹfta họ̀nyì sọn mẹmẹsunnu etọn lẹ de, bo nọnọ̀ aigba Tobi tọn ji: omẹ hlonọ dẽlẹ hoplidopọ do Jẹfta de, yé sọ nọ yì gbonu po e po.

⁴ E sọ wá jọ to ojlẹ de godo, wẹ ovi Ammọni tọn lẹ fọ́nawhàn do Islaeli ji.

⁵ E sọ yín mọ, dọ whenuena ovi Ammoni tọn lẹ fọ́nawhàn do Islaeli ji, mẹho Gileadi tọn lẹ yì nado plan Jẹfta tọ́n sọn aigba Tobi tọn ji:

⁶ yé sọ dọ hlan Jẹfta dọ, Wá bo yín ogán mìtọn, na mí nido hòavùn hẹ ovi Ammọni tọn lẹ.

⁷ Jẹfta sọ dọ hlan mẹho Gileadi tọn lẹ dọ, Miwlẹ ma ko gbẹwanna mi, bo sọ yàn mi tón sọn owhé otọ ṣie tọn gbè? etẹwutu mì do wá dẽ dinvie whenuena mì tin to nukunbibia mẹ?

⁸ Mẹho Gileadi tọn lẹ sọ dọ hlan Jẹfta dọ, Enẹwutu wẹ mí do lẹ wá de we to dinvie, na hiẹ nido yì hẹ mí, bo hòavùn hẹ ovi Ammọni tọn le, hie na sọ yín ogán mìtọn to tòmẹnu Gileadi tọn lẹpo ji.

⁹ Jẹfta sọ dọ hlan mẹho Gileadi tọn lẹ dọ, Eyín mìwlẹ sọ hẹn mi gọ̀ wá owhè nado hòavùn hẹ ovi Ammọni tọn lẹ, bọ OKLUNỌ sọ jó yé to nukọn ṣie, be yẹn na yín ogán mìtọn?

¹⁰ Mẹho Gileadi tọn lẹ sọ dọ hlan Jẹfta dọ, OKLUNỌ na yín kunnudetọ to mí ṣẹnṣẹn; nugbonugbo kẹdẹdi ohó towe mọwẹ míwlẹ na nọ wàdo.

¹¹ Whenẹnu wẹ Jẹfta yì po mẹho Gileadi tọn lẹ po, gbẹtọ ewlẹ sọ yí i do basi ogán nukọntọ do yé ji: Jefta sọ dọ ohó etọn lẹpo to OKLUNỌ nukọn to Mizpahi mẹ.

¹² Jẹfta sọ dè mẹdagun lọ hlan ahọlu ovi Ammọni tọn lẹ tọn dọmọ, Etẹ hiẹ tindo nado wà po yẹn po, bọ hiẹ do wá dè nado hòavùn hẹ aigba ṣie?

¹³ Ahọlu ovi Ammọni tọn lẹ tọn sọ gblọnhó hlan mẹdagun Jẹfta tọn lẹ dọ, Na Islaeli yí aigba ṣie wutu wẹ, whenuena é hẹji sọn Egipti ja, sọn Alnọni yèdọ jẹ Jabbọki, podọ jẹ Jọdani: enẹwutu dinvie sọ gò aigba helẹ jó to jijọho mẹ.

¹⁴ Jẹfta sọ gọ̀ mẹdagun lẹ do hlan ahọlu ovi Ammọni tọn lẹ tọn.

¹⁵ E sọ dọ hlan ẹn dọ, Le wẹ Jẹfta dọ: Islaeli ma yí aigba Moabi tọn gba, kavi aigba ovi Ammọni tọn lẹ tọn:

¹⁶ ṣigba whenuena yé hẹji sọn Egipti ja, bọ Islaeli zinzọnlin gbọn zùngbo mẹ luntọn jẹ Ohù Vẹ̃ tó, bo wá Kadẹsi;

¹⁷ whenẹnu wẹ Islaeli do mẹdagun lẹ hlan ahọlu Edọmi tọn, dọmọ, Yẹn vẹ̀ we, gbọ yẹn ni gbọn aigba towe ji luntón: ṣigba ahọlu Edọmi tọn ma tuntóai gba. Mọkẹdẹ wẹ é do omẹ hlan ahọlu Moabi tọn do: ṣigba ewọ ma jlo gba: Islaeli sọ gbọsi Kadẹsi mẹ.

¹⁸ Whenẹnu wẹ é zinzọnlin gbọn zùngbo mẹ luntón, bo lẹ́do aigba Edọmi tọn pó, po aigba Moabi tọn pé, bo gbọn adà whẹzẹtẹn aigba Moabi tọn tọn dali, yé sọ whesla do adà awetọ Alnọni tọn go; ṣigba yé ma wá agbohòmẹ Moabi tọn gba, na Alnọni wẹ agboji Moabi tọn

¹⁹ Islaeli sọ dè mẹdagun lẹ hlan Ṣihọni ahọlu Amọlinu lẹ tọn, ahọlu Hesibọni tọn; Islaeli sọ dọ hlan ẹn dọ, Mí vẹ̀ we, gbọ mí ni gbọn aigba towe ji luntón jẹ otẹn ṣie mẹ.

²⁰ Ṣigba Sihọni ma dotudo Islaeli go nado gbọn dògboji etọn luntọ́n gba: ṣigba Sihọni bẹ́ omẹ etọn lẹpo pli dopọ, bo whesla do Jahazi, bo hòavùn hẹ Islaeli.

²¹ OKLUNỌ, Jiwheyẹwhe Islaeli tọn, jó Sihọni po omẹ etọn lẹpo po do alọ Islaeli tọn mẹ, yé sọ hò yé: mọwẹ Islaeli tindo aigba Amọlinu lẹ tọn lẹpo, tòmẹnu otò nẹ tọn lẹ.

²² Yé sọ tindo agbóji Amọlinu lẹ tọn lẹpo, sọn Alnọni yèdọ jẹ Jabbọki, podọ sọn zùngbomẹ yèdọ jẹ̀ Jọdani.

²³ Mowẹ dinvie OKLUNỌ, Jiwheyẹwhe Islaeli tọn ko yàn Amọlinu lẹ sọn Islaeli omẹ etọn lẹ nukọn, be hiẹ na yí yé wẹ?

²⁴ Hiẹ ma na yí enẹ he yẹwhe towe Semọsi na we nado tindo? mọ mẹdepope OKLUNỌ Jiwheyẹwhe mìtọn ko yàn sọn mi nukọn, yé wẹ míwlẹ na yí.

²⁵ Dinvie hiẹ yín onú de pònte hú Balaki visunnu Zippoli tọn, ahọlu Moabi tọn wẹ? be ewọ wò hẹ Islaeli gbede, kavi ewọ hòavùn hẹ yé gbede?

²⁶ Whenuena Islaeli nọnọ̀ Hẹsíboni mẹ po gbeta etọn lẹ po, podọ to Aloeli mẹ po gbeta etọn lẹ po, podọ to tòdaho lẹpo mẹ he tin to haji to adà Alnọni tọn dali, họ̀ owhè fọdekanweko; etẹwutu wẹ mì ma do yí yé to ojlẹ nẹ mẹ?

²⁷ Enẹwutu yẹn ma ko wàylando do we, ṣigba hiẹ ko wà jagò do mi nado fọnawhàn do oji e: OKLUNỌ, Whẹdatọ, yín whẹdatọ to azán he gbè to ovi Islaeli tọn lẹ po ovi Ammọni tọn lẹ po ṣẹnṣẹn.

²⁸ Gãnṣo ahọlu ovi Ammọni tọn lẹ tọn ma tuntóai hlan ohó Jẹfta tọn he é dohlan ẹn lẹ gba.

²⁹ Whenẹnu wẹ gbigbọ OKLUNỌ tọn wá Jẹfta ji, ewọ sọ juyì Gileadi po Manassẹ po gododọ̃n, bo sọ juyì Mizpehi Gileadi tọn gododọ̃n, sọn Mizpehi Gileadi tọn gododọ̃n wẹ é juyì gododọ̃n jẹ ovi Ammọni tọn lẹ de.

³⁰ Jẹfta sọ yígona pàdido de hlan OKLUNỌ, bo dọmọ, Eyin hiẹ nugbonugbo na jó ovi Ammọni tọn lẹ do alọ ṣie mẹ,

³¹ whenẹnu é na yín, dọ nudepope he tọ́n sọn ohọn owhé ṣie gbè tọn lẹ mẹ wá nado pé mi, whenuena yẹn gọ̀ to jijọho mẹ sọn ovi Ammọni tọn le de, é na yín OKLUNỌ tọn, yẹn na sọ jó e na avọ̀ nunina mimẹ̀ de.

³² Mọwẹ Jẹfta juyì gododọ̃n jẹ ovi Ammọni tọn lẹ de nado hòavùn hẹ yé; OKLUNỌ sọ jó yé do alọ etọn me.

³³ Ewọ sọ hò yé sọn Aloeli kaka hiẹ do wá jẹ Minmti, yèdọ tòdaho oko, podọ jẹ Abeli-selamimí, po hùja daho talala de po. Mọwẹ yè ṣiatẹ ovi Ammọni tọn lẹ tọn to ovi Islaeli tọn lẹ nukọn.

³⁴ Jẹfta sọ wá Mizpahi jẹ owhé etọn gbè, bo, dayi e go, viyọnnu etọn tón ja po akòhún lẹ po po owè lẹ po nado pé e: ewọ sọ wẹ ovi etọn dopokẹdẹ lọ; dogó ẹ ewọ ma sọ tindo visunnu kavi viyọnnu de.

³⁵ E sọ wá jọ, whenuena ẹwọ mọ ẹn, wẹ é tlẹn avọ̀ etọn lẹ, bo dọmọ, Kai, viyọnnu ṣie hiẹhẹn mi wà odo patapata, hiẹ sọ yín dopo sọn yé he to tuklado mi lẹ mẹ: na yẹn ko kè onu ṣie hlan OKLUNỌ, yẹn ma sọ sọgan gọ̀yì godo.

³⁶ Ewọ sọ dọ hlan ẹn dọ, Otọ́ ṣie, hiẹ ko kè onù towe hlan OKLUNỌ; wà hlan mi kẹdẹdi ene he ko tònsọn onù towe mẹ jẹgbonu; sọle OKLUNỌ ko yíahọsu na we to kẹ̀ntọ towe lẹ ji, yèdọ to ovi Ammọni tọn lẹ ji.

³⁷ E sọ dọ hlan otọ etọn dọ, Gbọ yè ni wà núhe na mi: jo mi do họ̀ osùn awe, na yẹn nido tọ̀nyì bo jẹte yì osé lẹ ji, bo sadina gbèjininọ ṣie, yẹn po ogbẹ́ ṣie lẹ po.

³⁸ Ewọ sọ dọmọ, Yì. E sọ do e hlan yì hò osùn awe: ewọ sọ tónyì, ewọ po ogbè etọn lẹ po, bo sadina gbèjininọ etọn to osé lẹ ji

³⁹ E sọ wá jọ to opodo osùn awe lọ tọn, wẹ é gọ̀ do otọ̀ etọn de, mẹhe wà hẹ ẹ kẹdedi gòyíyí he é do dopà: ewọ ma ko sọ yón sunnu de. E sọ yín aṣà de to Islaeli mẹ,

⁴⁰ Dọ ovi Islaeli tọn lẹ nọ yì to whèmẹwhèmẹ nado nọ pà viyọnnu Jẹfta Gileadinu tọn hò azán ẹnẹ to owhè dopo mẹ.