PSALM 97 - BIBLU WIWE LỌ 1923

¹ OKLUNỌ duahọlu: mì gbọ aihọn ni jaya; Mì gbọ gégé homẹ lẹpo lẹ tọn ni hùn.

² Aslọ le po zinvlu yu titli po tin lẹ́do e pé; Dódó po whẹ̀dida po wẹ dòdó ofìn etọn tọn.

³ Miyọn de jẹnukọn nẹ̃ Bo hẹn mẹglatọ etọn lẹ jimiyọn lẹ́do.

⁴ Abì etọn họ́n do aihọn mẹ: Aigba mọ, bo sisọ.

⁵ Okọta lẹ yọ́ taidi oda to nukọn OKLUNỌ tọn, To nukọn OKLUNỌ aihọn lẹpo pete tọn.

⁶ Olọn lẹ lá dódó etọn, Gbẹtọ lẹpo sọ mọ gigo etọn.

⁷ Winyannọ wẹ omẹ he to bosiọ pipa lẹ sẹ̀n lẹpo ni yín, He yi bosiọ lẹ do to adangblọn na yéde lẹ: Mì to sinsẹ̀n ẹn, mì yẹwhe lẹpo emi.

⁸ Ziọni sè, homẹ etọn hùn, Oviyọnnu Juda tọn lẹ jaya, OKLUNỌ È, Na whẹ̀dida towe tọn wutu.

⁹ Na hiẹ OKLUNỌ, wẹ Gigogán hú aigba lepo. Hiẹ wẹ yè zédaga súntate hú yẹwhe lẹpo.

¹⁰ Mì nọ gbẹwanna oylan, mì omẹ he yiwanna OKLUNỌ emi: Ewọ to ayiha mẹwiwe etọn lẹ tọn hẹndote; E sọ to yé whlẹn sọn alọ mẹylankan lẹ tọn mẹ.

¹¹ Dódónọ wẹ yè do hinhọ́n nà, Podọ homẹhùn na tenọglinọ to ayiha mẹ lẹ.

¹² Mì jaya to OKLUNỌ mẹ, mì dódónọ lẹ emi; Bo sọ nọ dopẹ́ na oflin owàlọwiwe etọn tọn.