PSALM 96 - BIBLU WIWE LỌ 1923

¹ MI ji ohàn yọ́yọ́ de hlan OKLUNỌ: Mì jihàn hlan OKLUNỌ, mì aigba lẹpo.

² Mì jihàn hlan OKLUNỌ, mì dona oyín etọn; Mì nọ dọyẹwhehó whlẹngan etọn tọn gbepogbè.

³ Mì la gigo etọn to kosi lẹ ṣẹnsẹn, Azọ́n jawu etọn to gbẹtọ lẹ ṣẹnsẹn

⁴ Na kiklo wẹ OKLUNỌ, omẹ yè na pa talala: Ewo wẹ omẹ yè na si talala hú yẹwhe lẹ.

⁵ Nà onú ovọ́ lẹ tọn wẹ yẹwhe akọta tọn lẹpo: Ṣigba OKLUNỌ wẹ basi olọn lẹ.

⁶ Yẹyi po gigodaho po tin to nukọn etọn: Huhlọn po whanpẹ po tin to fiwiwe etọn mẹ.

⁷ Mì na hlan OKLUNỌ, mì hẹnnu gbẹtọ lẹ tọn lẹ emi, Mì na gigo po huhlọn po hlan OKLUNỌ.

⁸ Mì na hlan OKLUNỌ, mì na gigo he jẹ hlan oyín etọn: Mì hẹn nunina wá, bo biọ awá etọn mẹ.

⁹ Mì sèn OKLUNỌ to whanpẹ owalọwiwe tọn mẹ: Mì sinú to nukọn etọn, mì aigba lẹpo.

¹⁰ Mì dọ tò kosi lẹ ṣẹnsẹn, dọ, OKLUNỌ du ahọlu: Yè sọ hẹn aihọn lódo ga bọ yè ma nado sọgan sẹtẹnna ẹn: Ewọ na yí dódó do dawhẹ́na gbẹtọ lẹ.

¹¹ Mì gbọ olọn lẹ ni jaya, mì sọ gbọ homẹ aihọn tọn ni hùn; Mì gbọ ohù ni to wányẹ̃n, po onú he gọ́ e mẹ lẹ po.

¹² Mì gbọ odanji ni doawagun, po onú he to finẹ lẹpo po: Whenẹnu wẹ atin ozùn mẹ tọn lẹpo na jihàn na ayajijẹ

¹³ Tò OKLUNỌ nukọn na é wá, E ja nado dawhẹ̀na aigba É na yí dódó do dawhẹ́na aihọn, Bo yí nugbo etọn do dawhẹ́na gbẹtọ lẹ.