PSALM 94 - BIBLU WIWE LỌ 1923

¹ OKLUNỌ È, hiẹ Jiwheyẹwhe mẹhe tọn ahọsu yín; Hiẹ Jiwheyẹwhe mẹhetọn ahọsu yín, hònún jẹgbónu.

² Zé dewe daga, hiẹ whẹ̀datọ aihọn tọn: Do núsọhó saklanọ le tọn hlan yé.

³ OKLUNỌ, na é na dẹn do bọ mẹylankan lẹ, Na é na dẹn do bọ mẹylankan lẹ na do to ayajẹ?

⁴ Yé to ohó túntún jẹgbonu, yé sọ yí sakla do to hódọ: Ylanzónwàtọ lẹpo to awagundo na yéde.

⁵ OKLUNỌ E, yé gbà omẹ towe lẹ hanyanhanyan, Bo sọ to nukunbiana mẹdodugu towe.

⁶ Yé hù asuṣiọsi po ojonọ po, Bo sọ hù otóṣiọvi lẹ.

⁷ Yé dọmọ, OKLUNỌ lọ ma na mọ, Mọ Jiwheyẹwhe Jakobu tọn ma na hò e pọ́n.

⁸ Mì lẹnpọn, mì kanlinyihanọ lẹ to gbẹtọ mẹ: Po mì nulunọ lẹ po, whetẹnu wẹ mìwlẹ na yín nuyọnẹntọ?

⁹ Ewọ he do otó, bé é ma na sènú? Ewọ he da nukun, bó é ma na mọnú?

¹⁰ Ewọ he to kosi lẹ wọhẹ, bé ewọ ma na deanamẹ, Yèdọ ewọ he to nuyọnẹn plọ́n gbẹtọ?

¹¹ OKLUNỌ yọ́n linlẹn gbẹtọ tọn, Dọ ovọ́ wẹ yé.

¹² OKLUNỌ E, donanọ wẹ omẹ he hiẹ wọhẹ, Bo so plọn sọn osén towe mẹ;

¹³ Na hiẹ nido na ogbọjẹ ẹ sọn azán mẹglatọ tọn lẹ mẹ, Kaka yè nado kùn odọ̀ na mẹylankan lẹ.

¹⁴ Na OKLUNỌ ma na tùn omẹ etọn lẹ hlan gba, Mọ é ma na gbẹ́ mẹdodugu etọn lẹ dai.

¹⁵ Ṣigba whẹ̀dida na gọ́ do dódó de; Tenọglinọ to ayiha mẹ lẹpo na nọ hodo e.

¹⁶ Mẹnu wẹ na fọ́n do ylanwàtọ lẹ ji na mi? Kavi mẹnu wẹ na fọ́nṣite do ylanzọ́nwàtọ lẹ ji na mi?

¹⁷ Adavo le OKLUNỌ yín alọgọtọ ṣie, Ayiha ṣie ko bla sinai to abọẹnọ mẹ.

¹⁸ Whenuena yẹn dọmọ, Afọ ṣie didi; OKLUNỌ E, dagbewanyi towe hẹn mi dote.

¹⁹ To gégé tùmajai ṣie lẹ tọn mẹ to yẹn Homẹ homẹmiọn towe lẹ hẹn homẹ ṣie hùn.

²⁰ Bé ofìn ylando tọn na tindo kòndopọ po hiẹ po wẹ, He to oséndoai de yì do to oka ṣì?

²¹ Yé sinyan yéde plidopọ do ayiha dódónọ tọn ji, Bo sọ gblewhẹdo ohùn mawàylannọ tọn:

²² Ṣigba OKLUNỌ wẹ atọ́họ ṣie he yìaga; Jiwheyẹwhe ṣie wẹ awinyan fibẹ̀tado ṣie tọn.

²³ E ko hẹn ylankan yetọn titi wá yé ji, Bo nasọ sukún yé tọn do to oylan yetọn titi mẹ; OKLUNỌ Jiwheyẹwhe mítọn na sán yá sẹ̀.