PSALM 93 - BIBLU WIWE LỌ 1923

¹ OKLUNỌ duahọlu; Gigodaho wẹ é do doaṣọ; OKLUNỌ doaṣọ, é ko yí huhlọn do blagbajana ede: Yè hẹn aihọn lódo ga, bọ yè ma do sọgan sẹ̀tẹn nẹ̃.

² Yè ko hẹn ofìn towe lódo sọn hóhówhenu: Hiẹ ko tin sọn madopodo.

³ OKLUNỌ È, otọ̀ lẹ ko zé daga, otọ̀ lọ ko zé ogbẹ̀ yetọn daga; Otọ̀ lẹ zé agbowhẹn yetọn daga.

⁴ Hugan ogbẹ̀ osìn susu lẹ tọn Agbowhẹn asuka ohù tọn lẹ, OKLUNỌ to jiaga wẹ hlọnhlọnnọ.

⁵ Nugbo wẹ aṣẹdai towe lẹ: Owàlọwiwe wẹ jẹhẹ ohọ̀ towe Kakadoi, OKLUNỌ E.