PSALM 90 - BIBLU WIWE LỌ 1923

OWÉ 4.

Odẹ́ Moṣe Jiwheyẹwhe gbẹtọ lọ tọn.

¹ OKLUNỌ, hiẹ wẹ ko yín fininó mítọn To whẹndo lẹpo mẹ.

² Whẹpo yè do hẹn osé lẹ tónjẹgbonu wá, Kavi whẹpo hiẹ do hẹn aigba po owẹkẹ po tónkùn, Yèdọ sọn madopodo jẹ madopodo, hiẹ wẹ Jiwheyẹwhe.

³ Hiẹ hẹn gbẹtọ gọ́ zùn kógudu; Bo sọ dọmọ, Mì lẹ́gọ̀, mì ovi gbẹtọ tọn lẹ emi.

⁴ Na owhè fọtọ́n to nukọn towe tin di osọ̀ Whenuena é juwayi, Podọ di zánnukle dopo.

⁵ Hiẹ to yé plọ jei taidi po asisa po; Yé taidi amlọn: To afọnnufu yé taidi ogbé he wú waga.

⁶ To afọnnufu é vùn bo wú waga: To whèjai yè sán ẹn liai, é sọ yọ.

⁷ Na yè to mí hùsúdo to adi towe mẹ, Podọ gbọn adanjijẹ zogbe towe dali agbasa ma jai na mí.

⁸ Hiẹ zé ylando mítọn do nukọn towe, Ylando mítọn nuglọ tọn tin hinhọ́n nukun towe tọn mẹ.

⁹ Na azán mítọn lẹpo to yìyì to adanjijẹ zogbe towe mẹ: Mí to owhè mítọn lẹ hẹn wá jẹ opòdo de di hunwinwẹn.

¹⁰ Azán owhè mítọn tọn wẹ owhè kandegban; Kavi yèdọ gbọn huhlọn tọn dali owhè kanwe, Gánṣo sakla yetọn magbọjẹ po awúbla po wẹ; Na yè sán ẹn sè plaun, mí bo sọ zlọn yì.

¹¹ Mẹnu wẹ yọ́n huhlọn adi towe tọn? Podọ adanjijẹ zogbe towe kẹdẹdi osi he jẹ hlan we?

¹² Mọ a ni nọ plọn mí do nado nọ hia azán mítọn lẹ, Na mí nido mọ ayiha nuyọnẹn tọn yí.

¹³ Lẹgò, OKLUNỌ E, na é na dẹn sọ? Diọ linlẹn towe gbọn devi towe lẹ tọn dali.

¹⁴ Yawu yí dagbewanyi towe do pékọ̀na mí; Na mí nido yí ayajijẹ do jihàn bo yín homẹhùnnọ to azán mítọn lẹpo gbè.

¹⁵ Hẹn mí yín homẹhùnnọ sọ azán he hiẹ do bianukunna mí, Podọ sọ owhè ehe mẹ mí ko to oylan mọ te.

¹⁶ Gbọ azọ́n towe ni sọawúhia hlan devi towe lẹ, Podọ gigo towe hlan ovi yetọn lẹ.

¹⁷ Bo gbọ whanpẹ OKLUNỌ Jiwheyẹwhe mítọn tọn ni tin to mí ji: Hiẹ ni bo sọ hẹn azọ́n alọ mítọn tọn lódo to mí go; Nugbo, azọ́n alọ mítọn tọn hiẹ ni hẹn ẹn lódo.