PSALM 9 - BIBLU WIWE LỌ 1923

¹ YẸN na yí ayiha ṣie lẹpo do pa OKLUNỌ; Yẹn na yí azọ́n jawu towe hia.

² Yẹn na jaya, yẹn na doawagun to hiẹ mẹ; Yẹn nasọ yí pipa do jihàn hlan oyín towe, hiẹ Gigogán È.

³ Whenuena kẹ̀ntọ ṣie lẹ lẹ́gòdo, Yé na klẹnafọ, yá nasọ dọn to nukọn towe.

⁴ Na hiẹ ko da whẹwhiwhẹn nukundagbe ṣie mẹ bo yíwhẹ do oji e; Hiẹ sinai to ofìn ji bo to owhẹ dódó da.

⁵ Hiẹ wọhẹ kosi lẹ, hiẹ hù mẹylankan lẹ súdo, Hiẹ sọ gbidi oyín yetọn sẹ́ kakadoi.

⁶ Yè hù kẹ̀ntọ lẹ lọ súdo: adóto yetọn sọ tin tẹgbẹ, Hiẹ ko gbà otòdaho lẹ, yèdọ oflin yetọn ko sọ gbidi.

⁷ Ṣigba OKLUNỌ sinai di ahọlu tẹgbẹ: E ko zé ofìn etọn dai na whẹ̀dida.

⁸ É na dawhẹ aihọn tọn to dódó mẹ, É nasọ dawhẹ hlan gbẹtọ lẹ to kunnumahu mẹ.

⁹ OKLUNỌ na yín atòhò he yìaga na mẹhe awú to sinsinyẹn lẹ, Atọ̀hò he yìaga to nukunbibia whenu.

¹⁰ Yé he yón oyín towe lẹ na dotudo ogo we: Na hiẹ, OKLUNỌ, ma gbẹ́ ye he din we lẹ dai gba.

¹¹ Mì jihàn do pa OKLUNỌ he sinai to Ziọni: Mì la azọ́n etọn to gbẹtọ lẹ mẹ.

¹² Na ewọ he to dòdinna owhọ̀ ohùn tọn, E flin yé, é ma sọ wọnji awhá nukunbianọ lẹ tọn go gba.

¹³ Wàlẹblanu na mi, OKLUNỌ È, Pọ́n nukunbibia he yẹn to mimọ to alọ yé he gbẹwanna mi lẹ tọn mẹ, Hiẹ he zé ota ṣie daga sọn hòngbo okú tọn lẹ ji.

¹⁴ Na yẹn nido dọ pipa towe lẹpo To hòngbo oviyọnnu Ziọni tọn lẹ mẹ: Yẹn nasọ nọ jaya to whlẹngan towe mẹ.

¹⁵ Kosi lẹ wán jẹ odò he yé kùn mẹ: Odọ̀ he yé ta dai mẹ wẹ afọ yetọn ján do.

¹⁶ OKLUNỌ ko hẹn ede zùn yinyọnẹn: é ko hẹn whẹ̀dida ṣẹ: Azón alọ mẹylankan tọn mẹ tọn wẹ yè do nọ domò wlé e. Higgaion. Selah.

¹⁷ Mẹylankan lẹ na gò do kútòmẹ, Po akọta he wọnji Jiwheyẹwhe go lẹpo po.

¹⁸ Na yè ma na wọnji agbátọnọ lẹ go gbidigbidi: Nukundido nukunbianọ lẹ tọn ma to na súdo gbède.

¹⁹ OKLUNỌ È, tite: a dike gbẹtọ pòun dohuhlọn blo: Gbọ yè ni dawhẹ kosi lẹ tọn to nukọn towe.

²⁰ Dobuna yé, OKLUNỌ È, na akọta lẹ ni yọ́n yéde dọ gbẹtọ pòun wẹ yé. Selah.