PSALM 89 - BIBLU WIWE LỌ 1923

¹ YẸN na nọ jihàn dagbewanyi OKLUNỌ tọn tọn kakadoi: Onù ṣie wẹ yẹn na do do nugbo towe hia jẹ whẹndo lẹpo mẹ.

² Na yẹn ko dọmọ, Yè na dó Lẹblanu do aga kakadoi: Olọn lẹ lọ mẹ wẹ hiẹ nasọ hẹn nugbo towe lódo te.

³ Yẹn ko nualẹ hẹ mẹdide ṣie, Yẹn ko whle hlan Davidi devi ṣie.

⁴ Okún towe wẹ yẹn na hẹn lódo kakadoi, Yẹn nasọ zé ofìn towe dote jẹ whẹndo lẹpo mẹ. Selah.

⁵ Olọn lẹ na nọ pa azọn jawu towe, OKLUNỌ È: Nugbo towe ga to agùn mẹwiwe lẹ tọn mẹ.

⁶ Na mẹnu wẹ tin to aganukunmẹ, bọ yè sọgan yí do jlẹ OKLUNỌ? Mẹnu wẹ to ovi asuka lẹ tọn mẹ, he di OKLUNỌ,

⁷ Jiwheyẹwhe he yè do si talala to tòhódọtọ mẹwiwe lẹ tọn me, Bo jiawu hú yé he lẹ́do e lẹpo?

⁸ OKLUNỌ Jiwheyẹwhe awhànpa lẹ tọn È, Mẹnu wẹ OKLUNỌ, huhlọnnọ de di hiẹ? Nugbo towe lẹ́do we pó.

⁹ Hiẹ duahọlu sakla ohù tọn ji, Whenuena agbowhẹn osìn etọn tọn fọ́n, hiẹ hẹn yé hùwhẹ́.

¹⁰ Hiẹ finọn Lahabi di mẹhe yè hù de; Hiẹ sọ yí awà sinsinyẹn towe do gbà kẹ̀ntọ towe lẹ kija.

¹¹ Towe wẹ olọn lẹ, towe wẹ aigba lọ ga; Owẹkẹ po onú he gó e mẹ lẹ po, hiẹ wẹ do yé ai.

¹² Agewaji po hùwaji po hiẹ wẹ da yé; Taboli po Hamoni po na yí ayajijẹ do jihàn to oyín towe mẹ.

¹³ Hiẹ tindo awà gángán: Sinsinyẹn wẹ alọ towe, adusilọ towe wẹ yìaga.

¹⁴ Nugbo po whẹ̀dida po wẹ dòdó ofìn towe tọn: Dagbewanyi po nugbo po to yìyì to nukọn towe.

¹⁵ Donanọ wẹ mẹhe yón ogbẹ̀ homẹhùnhùntọn lẹ: OKLUNỌ È, yé to zọnlinzin to hinhọ́n nukun towe tọn mẹ.

¹⁶ Oyín towe mẹ wẹ yé nọ jaya te to azán popo gbè: Dódó towe mẹ wẹ yè sọ nọ zé yé daga te.

¹⁷ Na hie wẹ gigo huhlọn yetọn tọn: Nukundagbe towe mẹ wẹ yè na zé azò mítọn daga te.

¹⁸ Na OKLUNỌ tọn wẹ awóyínú mítọn; Yèdọ hlan Mẹwiwe Islaeli tọn lọ Aholu mítọn.

¹⁹ Whenẹnu wẹ hiẹ dọ to númimọ mẹ hlan mewiwe towe, Bo dọmọ, Yẹn ko zé alọgọ do asuka de ji; Yẹn ko zé omẹ de daga he yè ko dè to gbẹtọ lẹ mẹ.

²⁰ Yẹn ko mọ Davidi devi ṣie; Amisisa ṣie wiwe wẹ yẹn do do e:

²¹ Mẹhe de yè na hẹn alọ ṣie li te: Awà ṣie ga nasọ nahuhlọn ẹn.

²² Kẹntọ ma nukun na mian nẹ; Mọ visunnu oylanwiwà tọn ma nukun na bia nẹ̃.

²³ Yẹn na hopò mẹglatọ etọn lẹ liai to nukọn etọn, Bo sọ linu yé he gbẹwan nẹ̃ lẹ.

²⁴ Ṣigba nugbo ṣie po dagbewanyi ṣie po na tín to e de: Podọ oyín ṣie mẹ wẹ yè na zé azò etọn daga te.

²⁵ Yẹn na zé alọ etọn do ohù mẹ, Podọ adusilọ etọn do otọ̀ lẹ mẹ.

²⁶ Ewọ na dawhá ylọ mi, dọ, Hiẹ wẹ otọ́ ṣie, Jiwheyẹwhe ṣie, podọ awinyan whlẹngan ṣie tọn

²⁷ Yẹn ga nasọ yí i do basi plọnji ṣie daho pete ahọlu aigba tọn lẹ tọn.

²⁸ Dagbewanyi ṣie wẹ yẹn na sẹ́do nẹ̃ kakadoi, Alẹ́nu ṣie nasọ nọte he ẹ gligli.

²⁹ Okún etọn ga wẹ yẹn na hẹn dẹn kaka, Podọ ofìn etọn di azán olọn tọn lẹ.

³⁰ Eyín ovi etọn lẹ gbẹ́ osẹ́n ṣie dai. Bọ yé ma zinzọnlin gbọn whẹ̀dida ṣie ji;

³¹ Eyín yé hẹn oséndoai ṣie gble, Bọ yé ma sọ yìn gbèdide ṣie;

³² Whenẹnu wẹ yẹn na yí opo do dla osẹnmẹjẹ yetọn pọ́n, Podọ oylanwiwà yetọn po hiho po.

³³ Mọ dagbewanyi ṣie wẹ yẹn ma na yí sọn e si, Mọ yẹn ma na dike nugbo ṣie ni fẹ́.

³⁴ Alẹ̀nu ṣie wẹ yẹn ma na diọ, Mọ yẹn ma na hẹn onú he sọn nùflo ṣie mẹ jẹgbonu gble.

³⁵ Whladopo wẹ yẹn yi owàlọwiwe ṣie do whle, Dọ, yẹn ma lalo na do hlan Davidi gba,

³⁶ Okún etọn na tin kakadoi, Podọ ofìn etọn taidi owhè to nukọn ṣie.

³⁷ Yè na hen ẹn li kakadoi taidi osùn, Podọ di kunnudetọ nugbonọ to aga nukun mẹ.

³⁸ Ṣigba hiẹ ko zedlangbe, bo sọ gbẹ́ dai, Hie ko sọ yín homegblenọ do mẹyi amisisadode towe ji.

³⁹ Hiẹ ko gbẹwanna alènu devi towe tọn: Hiẹ ko hen ojẹgbakun etọn gble yèdọ jẹ aigba.

⁴⁰ Hiẹ hẹn opá etọn lẹpo vún; Hie sọ hẹn ofi sinsinyẹn etọn lẹpo wá dindọn mẹ.

⁴¹ Yé omẹ he juju jei to aliho lẹpo yí i do dugbanna: Ewọ sọ zùn ovlẹ hlan kọmẹnu etọn

⁴² Hiẹ zé adusilọ mẹglatọ etọn lẹ tọn daga; Hiẹ sọ hẹn homẹ kẹ̀ntọ etọn lẹpo tọn hùn.

⁴³ Nugbo, hiẹ lẹ́ ohi etọn nukun dogo do ga; Bo ma sọ hẹn ẹn nọte to awhàn nukọn

⁴⁴ Hiẹ ko hẹn sisẹ́ etọn gble, Bo sọ dọ̀n ofìn etọn hlan aigba.

⁴⁵ Azán yọ̀pọ whenu etọn tọn hiẹ ko sánpò: Bo sọ yi winyan ṣinyọn ẹn. Selah

⁴⁶ Dẹn sọ nawẹ, OKLUNỌ È, hiẹ na yí dewe whlá kakadoi? Nawẹ adanjijẹ zogbe towe na to jiji di miyọn dẹn sọ?

⁴⁷ Flin le azán ṣie whete do: Ovọ́ tẹwẹ hiẹ ko da ovì gbẹtọ tọn lẹpo na?

⁴⁸ Gbẹtọ tẹwẹ tin to ogbẹ̀ bo ma na mọ okú? Bo na whlẹn ayiha etọn sọn alọ kutòmẹ tọn si? Selah.

⁴⁹ OKLUNỌ, fie dagbewanyi towe hóhó tọn te, He hiẹ do whle hlan Davidi to nugbo towe mẹ?

⁵⁰ Flin, OKLUNỌ, ovlẹ devi towe lẹ tọn; Le yẹn to ovlẹ hẹn to akọ́nnu ṣie mẹ sọn gbẹtọ asuka lẹ si do;

⁵¹ Ehe kẹ̀ntọ towe lọ ko yí do to vivlẹ, OKLUNỌ E, Ehe yé do to afọhu mẹyiamisisadode towe tọn lẹ vlẹ.

⁵² Donanọ OKLUNỌ ni yín kakadoi. Niṣẹ, Niṣẹ.