PSALM 86 - BIBLU WIWE LỌ 1923

¹ OKLUNỌ È, dotó towe ai, segbè ṣie: Na oyanọ, agbátọnọ wẹ yẹn.

² Whlá ayiha ṣie: na jijọdijiwheyẹwhenọ wẹ yẹn: Hiẹ Jiwheyẹwhe ṣie E, whlẹn devi towe he dotudo go we.

³ Wàlẹblanuna mi, OKLUNỌ È: Na hiẹ wẹ yẹn to awhádo ylọ to azán popo gbè.

⁴ Hẹn ayiha devi towe tọn jaya: Na hiẹ, OKLUNỌ E, wẹ yẹn zé ayiha ṣie daga hlan.

⁵ Na hiẹ, OKLUNỌ, yín dagbe, bo sọ nọ wleawu nado jona; Á sù lẹblanu mẹ hlan yé he to awhádo ylọ we lẹpo.

⁶ OKLUNỌ E, dotó odẹ̀ ṣie go, Bo sọ sè ogbẹ̀ ovè ṣie tọn.

⁷ To azán tukla ṣie tọn mẹ yẹn na dawhá ylọ we: Na hiẹ na yígbèna mi.

⁸ OKLUNỌ È, to yẹwhe lẹpo mẹ ehe taidi hiẹ de ma tin; Mọ azọ́n he di azọ́n towe de ma tin.

⁹ Akọta he hiẹ da lẹpo na wá, bo sẹ̀n to nukọn towe, OKLUNỌ E; Bo nasọ pagigona oyín towe.

¹⁰ Na hiẹ klo, bo sọ nọ wà onú jawu: Hiẹ dopokẹdẹ wẹ Jiwheyẹwhe.

¹¹ OKLUNỌ E, plọ́n ali towe mi; yẹn na nọ zinzọnlin to nugbo towe mẹ; Hẹn ayiha ṣie do dopo nado nọ dibusi oyín towe

¹² Yẹn na pa we, OKLUNỌ Jiwheyẹwhe ṣie E, po ayiha ṣie lẹpo po: Yẹn nasọ nọ pagigona oyín towe kakadoi.

¹³ Na daho wẹ lẹblanu towe hlan dali ṣie: Hiẹ ko dè ayiha ṣie sọn okútò siso siso mẹ.

¹⁴ Jiwheyẹwhe È, osaklanọ lẹ fọ́n do oji e, Agùn budonamẹtọ lẹ tọn to ayiha ṣie din pé; Yé ma hò we pọ́n to nukun yetọn mẹ gba.

¹⁵ Ṣigba hiẹ, OKLUNỌ E, wẹ Jiwheyẹwhe he gọ́ na lẹblanu, Dagbenọ, podọ awuwhletọ nado sadi, bo sọ sù dagbewanyi po nugbo po mẹ.

¹⁶ Lẹ́ do dẽ, bo wàlẹblanuna mi, Do huhlọn towe hlan devi towe, Bo whlẹn visunnu deviyọnnu towe tọn gán.

¹⁷ Yí ohia de hia mi na dagbe; Na yé he gbẹwanna mi lẹ nido mọ ẹn, na winyan nido hù yé: Na hiẹ, OKLUNỌ, ko gọalọna mi, bo sọ miọnhomẹna mi wutu.