PSALM 83 - BIBLU WIWE LỌ 1923

¹ A GBỌJẸ blo, Jiwheyẹwhe È; A do onù towe abọẹ blo, a sọ nọ ṣúdudu blo, Jiwheyẹwhe È.

² Sa pọ́n, kẹ̀ntọ towe lẹ to zingidido: Yé he gbẹwanna we lẹ zé ota daga.

³ Yé ko dùpa to omẹ towe lẹ ji, Yé sọ depá do omẹ whiwhla towe lẹ go.

⁴ Yé dọmọ, Mì wá, mì gbọ mí ni gbidi yé na yé niká yín akọta ba; Na oyín Islaeli tọn sọ yín finflin ba blo.

⁵ Na yé ko pli depá dopọ; Yé ko nualẹ̀ do ota na we:

⁶ Ogohò Edọmi tọn po ovi Iṣmaẹli tọn lẹ po, Moabi tọn, po ovi Hagalene tọn lẹ po;

⁷ Gebali po Amọni po, po Amalẹki po; Filistini lẹ po Tiletọ lẹ po;

⁸ Assuli pli hẹ yé ga: Yé gọalona ovi Lọti tọn lẹ. Selah.

⁹ Wà hlan yé dile a wà hlan Midianinu lẹ do; Di Sisela, di Jabìni, to otọ̀ Kisọni kón:

¹⁰ Mẹhe dọ̀n to Ẹndọli: Yé zùn ogbó na aigba.

¹¹ Basi mẹgángán yetọn lẹ di Olẹbi po Zebi po: Yèdọ, ahọvi yetọn lẹ di Zeba po Zalmuna po.

¹² Mẹhe dọmọ, Mì gbọ mi ni yí Fininọ̀ Jiwheyẹwhe tọn lẹ na míde na ogú mítọn.

¹³ Jiwheyẹwhe ṣie È, basi yé di kọ́gudu lẹ́pénọ; Di ogbé sánpo to jẹhọn nukọn.

¹⁴ Di miyọn he dù ozùn, Podọ di miyọnlọ he hẹn osé daho jimiyọn.

¹⁵ Mọwẹ a ni yí jẹhọn towe do domọ́na yé, Bo sọ yí oyujẹhọn towe do dobuna yé.

¹⁶ Yi winyan do gọ́ nukun yetọn mẹ, Na yé nido din oyín towe, OKLUNỌ E.

¹⁷ Winyan ni hù yé, yè ni sọ dobuna yé kakadoi; Nugbo, yè ni dowinyan yé, na yé ni dọ̀n.

¹⁸ Na yé nido yọnẹn dọ, hiẹ, oyín Mẹhetọn dopo kẹdẹ nọ yín JEHOVA, Wẹ Gigogán to owẹkẹ lẹpo ji.