PSALM 81 - BIBLU WIWE LỌ 1923

¹ MI jihàn lélé hlan Jiwheyẹwhe huhlọn mítọn: Mì jaya homẹhùnhùn tọn hlan Jiwheyẹwhe Jakobu tọn.

² Mì yí ohàn wiwe, bo sọ hẹn akọ̀hún wá, Ajalẹn gbèvivinọ po asiazọ̀n hànjinu po.

³ Mì kún opẹ̀n lọ to osùn yọ́yọ́ mẹ. To osùn mázán ji, to azán hùnwhẹ ayidego mítọn ji.

⁴ Na ehe wẹ osẹndoai na Islaeli, Osẹ́n Jiwheyẹwhe Jakobu tọn tọn de.

⁵ Ehe wẹ é doai to Josẹfu mẹ na Whenuena é gbọn aigba Egipti tọn ji jẹgbonu: Fie yẹn sè ohógbè mẹhe yẹn ma yọnẹn de tọn te.

⁶ Yẹn dè abọ̀ etọn sọn oglọ agbàn lọ tọn Yè sọ hẹn alọ etọn lẹ vò sọn oha lọ mẹ.

⁷ Hiẹ ylọ to nukunbibia mẹ, yẹn whlẹn we; Yẹn siọ we to fìwhiwhlá osò tọn lọ mẹ: Yẹn mọdòna we to osìn Mẹliba tọn kọ̀n, Selah.

⁸ Mì sè, mì omẹ ṣie emi, yẹn na sakunnu hlan we; Islaeli, eyín hiẹ na dotóai hlan mi,

⁹ Yẹwhe dẽvo de ma na tin to hiẹmẹ; Mọ hiẹ ma na sẹ́n yẹwhe ojono de.

¹⁰ Yẹn wẹ OKLUNỌ Jiwheyẹwhe towe, He hẹn we hẹaga sọn aigba Egipti tọn ji: Kẹ̀ onù towe gblo, yẹn na gọ́ ẹ.

¹¹ Ṣigba omẹ ṣie lẹ ma sè ogbẹ̀ ṣie; Islaeli ma sọ jlo ṣie.

¹² Mọwẹ yẹn gbọ yé ni yìyì to tólivivẹ ayiha yetọn tọn mẹ; Na yé nido zinzọnlin to ohónamẹ yetọn titi lẹ mẹ.

¹³ Ṣó dọ omẹ ṣie lẹ do dotóai hlan mi, Dọ Islaeli do zọnlinzin to aliho ṣie lẹ ji!

¹⁴ Yẹn do gba whàn kẹ̀ntọ yetọn lẹ tọn plaun, Yẹn do diọ alọ ṣie do mẹglatọ yetọn lẹ go.

¹⁵ Wangbẹnamẹtọ OKLUNỌ tọn lẹ do jo yéde hlan ẹn: Ṣigba whenu yéwlẹ tọn do notẹ dẹn kaka.

¹⁶ Likún dagbedagbe wẹ ewọ do yí do na núdùdù yé ga: Owín he to awinyan mẹ wẹ yẹn do yí do pékòna yé.