PSALM 79 - BIBLU WIWE LỌ 1923

¹ JIWHEYẸWHE È, kosi lẹ wá ogú-yigba towe ji; Tẹmpli wiwe towe yé hẹn kudu; Yé lẹ Jelusalẹm zùn okiti lẹ.

² Oṣiọ devi towe lẹ tọn lẹ wẹ yé ví na ohẹ̀ olọn tọn lẹ na núdùdù, Agbasalan mẹwiwe towe lẹ tọn na kanlin aigba tọn lẹ

³ Ohùn yetọn wẹ yé kọ̀n dai di osìn lẹdo Jelusalẹm; Mẹde ma sọ tin bo na zé yé di.

⁴ Míwlẹ zùn ovlẹ hlan kọmẹnu mítọn lẹ. Mẹsanko podọ aṣagbọnu hlan yé he lédo mí lẹ.

⁵ Na é na dẹn do, OKLUNỌ E, hiẹ na sadi kakadoi wẹ? Awuwhàn towe na to jiji di miyọn wẹ?

⁶ Kọ̀n adanjijẹ zogbe towe do kosi he ma yọ́n we lẹ ji, Podọ do ahọludu he ma dawhá ylọ oyín towe lẹ ji.

⁷ Na yé ko kán Jakobu dù, Bo sọ lẹ aisintẹn etọn zùn ovọ́.

⁸ A flin ylando otọ̀-gbo mítọn lẹ tọn do mí go blo: Gbọ lẹblanu bibọ towe ni wá nado pé mí plaun: Na yè zín mí dai glanglan.

⁹ Gọalọna mí, Jiwheyẹwhe whlẹngan mítọn tọn E, na gigo oyín towe tọn: Whlẹn mí, bo klọ̀ ylando mítọn sè na oyín towe tọn wutu.

¹⁰ Etẹwutu wẹ kosi lẹ na dọ, dọmọ, Fie wẹ Jiwheyẹwhe yetọn te? Gbọ yíyíahọsu ohùn devi towe lẹ tọn he yè kọ̀n dai Tọn ni yín yinyọnẹn to kosi lẹ ṣẹnsẹn to nukun mítọn mẹ.

¹¹ Gbọ hùn winwẹn ogàntọ lọ tọn ni wá nukọn towe: Kẹdẹdi kiklo awà towe tọn, hiẹ ni hla enẹlẹ he yín ovi okú tọn lẹ dote.

¹² Bo sọ suahọ kọmẹnu mítọn lẹ whla ṣinawe to otù yetọn mẹ, Na ovlẹ yetọn ehemẹ yé to vivlẹ we te, OKLUNỌ E.

¹³ Mọ mí omẹ towe lẹ podọ lẹngbọ yindugbo towe tọn lẹ, Na nọ na opẹ́ we doidoi: Mí na do pipa towe hia jẹ whẹndo lẹpo mẹ.