PSALM 78 - BIBLU WIWE LỌ 1923

¹ DOTÓAI, mì omẹ ṣie lẹ emi, do osẹ́n ṣie go: Lì otọ́ mítọn ai hlan ohó onù ṣie mẹ tọn.

² Yẹn na kẹnu ṣie to oló de mẹ: Yẹn na dọ agọ̀gbè hóhó lẹ jẹgbonu.

³ Ehe mí ko sè bo sọ yọnẹn, Ehe otọ́ mítọn lẹ dọ na mí.

⁴ Míwlẹ ma na yí yé whlá sọn ovi yetọn lẹ de, to didọ pipa OKLUNỌ tọn lẹ, huhlọn etọn, po azònjawu etọn lẹ po he é wà hlan whẹndo he ja.

⁵ Na é do asedai de ai Jakobu mẹ, Bo sọ dè osẹn de do Islaeli mẹ, Ehe é degbè etọn na otọ́ mítọn lẹ, Na yé ni hẹn yé zùn yinyọnẹn hlan ovi yetọn lẹ:

⁶ Na whẹndo he ja nido yọnẹn, yèdọ ovi he yè na ji lẹ; He na fọ́n bo na dọ hlan ovi yetọn lẹ.

⁷ Na yé nido nọ zé tódido yetọn do Jiwheyẹwhe go, Bo ma nado wọn azọ̀n Jiwheyẹwhe tọn lẹ, Adavo dọ yé ni yìn gbèdide etọn lẹ:

⁸ Na yé nikã di otọ́ yetọn lẹ, Whẹndo tólivẹtọ, atẹṣitọ; Whẹndo he ma yí ayiha yetọn do nugbo go, Gbigbọ mẹhetọn ma nọte to Jiwheyẹwhe de gligli.

⁹ Ovi Eflaimi tọn he pànnu lẹ, bo hẹn ogá, Yé lẹ́godo to awhàn zángbè.

¹⁰ Yé ma yìn alẹ̀nu Jiwheyẹwhe tọn, Yé sọ gbẹ zọnlinzin to osẹ́n etọn mẹ

¹¹ Yé wọn núwiwà etọn lẹ; Po azọ́n jawu etọn he é yí hia, yé lẹ po.

¹² E wà onú jawu to otọ́ yetọn lẹ nukọn to aigba Egipti tọn ji, Podọ to Zoani danji.

¹³ É má ohù do awe, bo hẹn yé gbọn e mẹ luntón, Bo sọ hẹn osìn nọte di okiti de.

¹⁴ To okle ga é yí aslọ do basi alihiamẹtọ yetọn, Podọ to ozán mẹ lẹpo po hinhọ́n, miyọn tọn po.

¹⁵ E zẹ̀ awinyan to ozùn mẹ, Bo na nùnù yé susugege taidi sọn osẹ́dò lẹ mẹ.

¹⁶ E hẹn asisa jẹgbonu ga sọn awinyan mẹ, Bo sọ hẹn osìn sà to aigba di otòdaho lẹ.

¹⁷ Yé sọ vọ́ oylan wà do e Nado ṣiatẹ hẹ Gigogán to zùngbo mẹ.

¹⁸ Yé whle Jiwheyẹwhe pọ́n to ayiha yetọn mẹ To núdùdù kinkanbiọ mẹ kẹdẹdi ojlo yetọn.

¹⁹ Nugbo, yé zannù do Jiwheyẹwhe go; Yé dọmọ, Bé Jiwheyẹwhe sọgan tẹ́ tafo de to zùngbo mẹ?

²⁰ Sà pọ́n, é linu awinyan, osìn sà jẹgbonu, Asisa gọ́ flakọnyingbé; Bé é sọgan na akla omẹ ga? Bé é na na olan omẹ etọn lẹ?

²¹ Enẹwutu OKLUNỌ sè ehe, bo gblehomẹ, Mọwẹ miyọn ji do Jakobu ji, Adi sọ hẹji do Islaeli ji;

²² Na yé ma yí Jiwheyẹwhe sè, Bo ma sọ dotudo whlẹngan etọn go wutu.

²³ Ṣigba é degbèna aslọ sọn aga, Bo hùn ohòn olọn tọn lẹ.

²⁴ E jajikun mana tọn do yé ji na dùdù, Bo sọ na gbadó olọn tọn yé.

²⁵ Gbẹtọ dù núdùdù angẹli lẹ tọn: Ẹ do núdùdù hlan yé na dùgọ̀ho.

²⁶ E hẹn jẹhọn whèzẹtẹn tọn yìn to olọn mẹ, Podọ to huhlọn etọn mẹ é deali na ohù jẹhọn.

²⁷ E jajikun olan tọn do yé ji ga di kọ́gudu, Podọ ohẹ̀ awànọ di tọ̀kẹ́n hùtó tọn.

²⁸ E hẹn ẹn flẹ́ jẹ osla yetọn ṣẹnsẹn, Lédo slahọ yetọn pé.

²⁹ Mọ yé dù, bo sọ gòho susu: Na é yi ojlo yetọn na yé wutu.

³⁰ Yé ma sọ tọ́n sọn ojlo yetọn mẹ, Ṣigba whenuena núdùdù yetọn tin to onù yetọn mẹ,

³¹ Adi Jiwheyẹwhe tọn hẹji do yé ji, Bo hù yé he mọawu to yé mẹ lẹ, Bo sọ hopò ovisunnu Islaeli tọn lẹ liai.

³² To ehe lẹpo mẹ yé sọ vọ́ oylan wà do e, Yé ma yí azọ̀n jawu etọn lọ sè.

³³ Enẹwutu wẹ é do hẹn azán yetọn gble to ovọ́ mẹ, Podọ owhè yetọn lẹ to avosisa mẹ.

³⁴ Whenuena é hù yé, whenẹnu wẹ yé din in: Yé lẹ́gọ̀, bo sọ yawu din Jiwheyẹwhe vivẹ́vivẹ́.

³⁵ Yé flin dọ Jiwheyẹwhe wẹ awinyan yetọn, Podọ Jiwheyẹwhe Gigogán wẹ Mẹflitọ yetọn.

³⁶ Ṣigba onù yetọn wẹ yé yí do to kiké e, Bo sọ yí odẹ́ yetọn do dolalo hlan ẹn.

³⁷ Na ayiha yetọn ma sọgbè do e go, mọ yé ma sọ yín nugbonọ to alẹ̀nu etọn mẹ.

³⁸ Ṣigba ewọ, gigọ́ na lẹblanu, jo ylando yetọn na yé, é ma sọ hù yé sudo: Nugbo, whla susu wẹ é lẹ́ adi etọn do godo, Bo ma wlu adanjijẹ zogbe etọn lẹpo daga.

³⁹ Na é flin dọ agbasalan sà wẹ yé; jẹhọn he juwayì bo ma sọ gò wá ba.

⁴⁰ Whla nẹmunẹmu wẹ yé ṣiatẹ hẹ ẹ to zùngbo mẹ; Bo sọ hẹn homẹgble e to aigba klo ji!

⁴¹ Nugbo, yé lẹ bo whle Jiwheyẹwhe pọ́n, Bo hẹnawusinyẹn mẹwiwe Islaeli tọn lọ.

⁴² Yé ma sọ flin alọ etọn, Kavi azán lọ gbẽgbe é whlẹn yé sọn mẹglatọ lọ si.

⁴³ Le é: yí ohia etọn do Egipti do, Podọ azọ̀n jawu etọn do Zoani danji.

⁴⁴ Bo diọ otọ̀ yetọn zùn ohùn; Bọ yé ma sọ sọgan nù otọ̀sisa vi yetọn lẹ.

⁴⁵ E do gege supò lẹ tọn hlan yé mẹ, ehe dù yé; Po besó lẹ po, he sú yé do.

⁴⁶ E yí jideji yetọn na agbonọpatin lọ, podọ azọ́n yetọn na owẹ̀n lọ.

⁴⁷ E yí kẹnsu do hù ovẹ̃n yétọn lẹ; Bo sọ yí kẹnsu daho do hù atin sikomọli tọn yetọn lẹ.

⁴⁸ E jo kanlin yetọn ga hlan kẹnsu; Podọ opá kanlin yetọn tọn hlan abì.

⁴⁹ E hẹn vivó adi etọn tọn wá yé ji, Adanjijẹ po kàndudu po, po nukunbibia po, Odohlan awhànpa angẹli oylan tọn lẹ de.

⁵⁰ É hẹn mọji mẹ́ na homẹgble etọn; E ma sọ whlẹn ayiha yetọn sọn okú si, Ṣigba é jọ gbigbọ yetọn dọ hlan, azọ̀nylankan lọ;

⁵¹ E hò plọnji lẹpo to Egipti mẹ. Mẹgángán huhlọn yetọn tọn to: ogohọ̀ Hami tọn mẹ:

⁵² Ṣigba é plan omẹ etọn titi lẹ yì di lẹngbọ, Bo sọ deali na yé to zùngbo mẹ di opá kanlin tọn,

⁵³ É do ali hia yé jijọho, na yé nika dibu: Ṣigba ohù ṣinyọn kẹ̀ntọ yetọn lẹ ji.

⁵⁴ E hẹn yé wá fiwiwe etọn tónu, Yèdọ osé he, ehe alọ etọn ko hò.

⁵⁵ E yàn kọsi, lẹ jegbonu ga sọn nukọn yetọn, Bo yí okàn dindlẹn do má ogúyigba na yé, Bo sọ hẹn akọta Islaeli tọn lẹ sinai to ogohọ̀ yetọn lẹ mẹ.

⁵⁶ Gãnṣo yé whle e pọ́n, bo sọ ṣìatẹ hẹ Jiwheyẹwhe Gigogán, Bo ma sọ yìn aṣẹdai etọn lẹ.

⁵⁷ Ṣigba yé lẹ́godo, bo sọ wàdanu di otọ́ yetọn lẹ: Yé lẹ do apadopo di ogá oklọnọ de.

⁵⁸ Nayé yí ofi zépó yetọn lẹ do hẹnhomẹgble ehlan adi. Bo sọ yí bosiọ pipa yetọn lẹ do hẹn ẹn whànwu.

⁵⁹ Whenuena Jiwheyẹwhe sè ehe, é gblehomẹ, Bo sọ gbéna Islaeli gbahúgbahú:

⁶⁰ Na é gbẹ́ aisinten Ṣilo tọn dai, Ogohọ̀ he é dotẹnna do gbẹtọ lẹ ṣẹnsẹn,

⁶¹ É sọ jo huhlọn etọn dai do mẹglọnọ mẹ, Po gigo etọn po do alọ mẹglatọ lọ tọn mẹ.

⁶² E jo omẹ etọn lẹ do hlan ohi ga; Bo sọ gblehomẹ do mẹdodugu etọn lẹ go.

⁶³ Miyọn fiọ visunnu yetọn lẹ; Awhli yetọn lẹ ma sọ tindo ohàn alọwle tọn de.

⁶⁴ Yewhenọ yetọn lẹ gbọn ohi dali jai; Asuṣiọsi yetọn lẹ ma sọ basi avigbè de.

⁶⁵ Whenẹnu wẹ OKLUNỌ fọ́n di mẹde sọn amlọn mẹ, Di gbẹtọ asuka de he to awhádo gbọn ovẹ̃n tọn dáli.

⁶⁶ E jẹ mẹglatọ etọn lẹ ji sọn godo dali: Bo diọ yé zùn ovlẹ kakadoi.

⁶⁷ Humọ é gbẹ́ ogohò Joséfu tọn dai, E ma sọ dè ohẹnnu Eflaimi tọn;

⁶⁸ Ṣigba é dè ohẹnnu Juda tọn, Ọsó Ziọni tọn he é yiwanna.

⁶⁹ E dó fiwiwe etọn, Di agà lẹ, di aigba he é hẹn li, kakadoi.

⁷⁰ É dè Davidi devi etọn ga, Bo sọ dè e sọn opá lẹngbọ tọn mẹ:

⁷¹ Sọn hihodo lẹngbọ lẹ mẹ he to anọdona ovi, Nado nọ pọ́n Jakobu omẹ etọn lẹ go, podọ Islaeli mẹdodugu etọn lẹ.

⁷² Mọ wẹ é pọ́n yé go kẹdẹdi walọpipé ohò ẹ́tọn mẹ tọn; Bo sọ do yé gbọn nuyọnẹn alọ etọn me tọn dali.