PSALM 77 - BIBLU WIWE LỌ 1923

¹ YEN na yí ogbe ṣie do dawhá hlan Jiwheyẹwhe, Yèdọ hlan Jiwheyẹwhe wẹ yẹn yí ogbẹ̀ ṣie do dawhá hlan; é nasọ dotóai hlan mi.

² To nukunbibia ṣie zángbè, yẹn din OKLUNỌ: Alọ ṣie dlẹn jẹgbonu to ozán mẹ, é ma sèwhe: Ayiha ṣie sọ gbẹ́ yè nado miọnhomena.

³ Yẹn flin Jiwheyẹwhe, awutu ṣie ma jai: Yẹn fankoe, gbigbọ ṣie kusiọ. Selah.

⁴ Hiẹ hẹn owundama nukun ṣie tọn go: Tukla pé mi sọmọ bọ yẹn ma sọgan dọhó.

⁵ Yẹn to azán hóhó lẹ tọn lẹnpọn, Owhè whenẹnu tọn lẹ.

⁶ Yẹn flin ohàn ṣie to ozán mẹ: Yẹn to hódọ hẹ ayiha ṣie titi: Ayiha ṣie sọ yí sọwhiwhe do to didla pọ́n.

⁷ OKLUNỌ na dlẹn omẹ hlan doidoi wẹ? Bé é ma na basi nukundagbe ba wẹ?

⁸ Bé dagbewanyi etọn vọ̀ patapata wẹ? Bé pagbe etọn ma sọ to na tin gbèdegbède ba?

⁹ Jiwheyẹwhe ka wọn nado yín dagbenọ wẹ? To adi etọn mẹ é súhòn do lẹblanu bibọ etọn wẹ? Selah.

¹⁰ Yẹn dọmọ, Ehe wẹ madogan ṣie: Ṣigba yẹn na flin owhè adusilọ Gigogán tọn lẹ tọn.

¹¹ Yẹn na dọhó azọ́n OKLUNỌ tọn: Na yẹn na nọ flin azọ́n jawu etọn hóhó tọn lẹ.

¹² Yẹn na kanyiha azọ́n towe lẹpo tọn ga, Bo nasọ nọ len azọ́n towe lẹ pọ́n.

¹³ Jiwheyẹwhe È, aliho towe tin to fiwiwe mẹ: mẹnu wẹ yẹwhe he klo di Jiwheyẹwhe?

¹⁴ Hiẹ wẹ Jiwheyẹwhe he nọ wà azọn jawu: Hiẹ lá huhlọn towe to gbẹtọ lẹ mẹ:

¹⁵ Hiẹ yí awà towe do fli gbẹtọ towe lẹ, Visunnu Jakobu tọn po Josẹfu ton lẹ po. Selah

¹⁶ Osìn lẹ mọ we, Jiwheyẹwhe È, Osìn lẹ mọ we; obu di yé: Dògbo lẹ sọ sisọ ga.

¹⁷ Aslọ kọ̀n osìn dai: Aganukunmẹ lẹ dogbè jẹgbonu; Ogá towe sọ tọ́n yì ga.

¹⁸ Ogbè osò towe tọn tin to jẹhọnahizi mẹ: Abì họ́nun do aihọn mẹ, Aigba sisọ, bo whàm

¹⁹ Aliho towe tin to ohù mẹ, mọji towe tin to otòdaho lẹ mẹ, Afọdotẹn towe wẹ yè ma sọ yọnẹn

²⁰ Hiẹ plan gbẹtọ towe lẹ yì di lẹngbọpa Gbọn alọ Moṣe po Aalọn po tọn me.