PSALM 76 - BIBLU WIWE LỌ 1923

¹ JUDA wẹ yèyọ̀n Jiwheyẹwhe te, Oyín etọn sọ klo to Islaeli mẹ.

² To Salẹmi ga wẹ fiwhiwhlá etọn te; Núkan etọn tin to Ziọni mẹ ga.

³ Finẹ wẹ é wẹ́n gába ogá tọn te, Awòyinú, ohi po awhàn po. Selah.

⁴ Hiẹ yín gigonọ bo sọ gbọnvo sọn osé wẹnyan tọn lẹ mẹ.

⁵ Yè plọ ayihapinpẹnnọ lẹ, yé sọ dọamlọn yetọn: Depope sọn gbẹtọ hlọnhlọn tọn lẹ mẹ ma mọ alọ yetọn.

⁶ Na wọhe towe, Jiwheyẹwhe Jakobu tọn E, Awhànkẹkẹ po osò po dọamlọn okú tọn.

⁷ Hiẹ, yèdọ hiẹ dobu: Mẹnu wẹ sọgan nọte to nukọn towe whenuena hiẹ sadi?

⁸ Hiẹ hẹn whẹ̀dida zùn sisè sọn olọnmẹ; Aigba dibu, bo sọ ṣite abọẹ,

⁹ Whenuena Jiwheyẹwhe fọ́n do whẹ̀dida kọ̀n, Nado whlẹn whiwhẹno he to aihọn mẹ lẹpo. Selah

¹⁰ Nugbo, homẹgble gbẹtọ tọn na pa we: Homẹgble he pò wẹ hiẹ na do blagbaja do ogo.

¹¹ Dopà bo sọ depà hlan OKLUNỌ Jiwheyẹwhe mítọn: Gbọ yé he lédo e lẹ ni hẹn nunina wá jẹ ewọ mẹhe yè do nọ dibusi de.

¹² Ewọ na sán gbigbọ ahọvi lẹ tọn sẹ̀: E sọ yín nudobu hlan ahọlu he to aihọn mẹ lẹ.