PSALM 73 - BIBLU WIWE LỌ 1923

OWÉ 3

¹ NUGBO, yinyón wẹ Jiwheyẹwhe hlan Islaeli, Yèdọ hlan mẹhe hunkọ ayiha wé na lẹ.

² Ṣigba eyín yẹn tọn wẹ, afọ ṣie ko blafẹ́; Zọnlin ṣie bla tlẹ.

³ Na yẹn ko to awu whàn hẹ awagundotọ lẹ, Whenuena yẹn mọ jijọho mẹylankan lẹ tọn.

⁴ Na awufiẹsa ma tin to okù yetọn mẹ: Huhlọn yetọn sọ hẹnai.

⁵ Yé ma tin to tukla me di mẹdẽvo lẹ; Mọ yè ma sọ doyana yé di mẹdẽvo.

⁶ Enẹwutu wẹ sakla lẹ́do yé di okòjẹ; Yé sọ yí avọ̀ adingbàndido tọn ṣinyọn yéde.

⁷ Nukun yetọn tlu na ojó: Linlẹn ayiha yetọn tọn lẹ gọ́fla.

⁸ Yé nọ vlẹ, bo sọ nọ to ohó awusinyẹnnamẹ tọn dọ to oylan mẹ, Yé nọ dọhó gbògbo.

⁹ Yé zé onù yetọn do olọn lẹ mẹ; Odẹ́ yetọn sọ to zọnlinzin gbọn aihọn mẹ,

¹⁰ Enẹwutu wẹ omẹ etọn lẹ do lẹ́gọ̀ wá ofi: Osìn kọfo gigọ́ tọn wẹ yè to finfinyọn jẹ owhà gbọn yé dali.

¹¹ Yé dọmọ, Nawẹ Jiwheyẹwhe yọnẹn do? Bó nuyọnẹn tin to ohò Gigogán tọn mẹ?

¹² Dayi e go, ehelẹ wẹ mẹylankan lẹ, Podọ, tintin jijọho mẹ whepoponu, yé to susu to adọkun mẹ.

¹³ Nugbo, ovọ́ wẹ yẹn klọ́ ayiha ṣie, Bo sọ klọ́ afọ ṣie to homẹvó mẹ.

¹⁴ Na azán popo gbè wẹ yè to yadona mi, Hihò ṣie sọ yín afọnnu-afọnnu.

¹⁵ Eyín yẹn ko dọ, yẹn na dọ le; Dayi e go yẹn ko wà odanu hẹ whẹndo ovi towe lẹ tọn.

¹⁶ Whenuena yẹn lẹn na yọ́n ehe, E sinyẹnawú to nukun siẹ mẹ;

¹⁷ Kaka yẹn do yì biọ fiwiwe Jiwheyẹwhe tọn mẹ; Bo sọ lẹn pòdo yetọn pọ́n.

¹⁸ Nugbo, hiẹ zé yé do ofi titlẹ: Hiẹ zé yé dlẹn hlan dindọn mẹ.

¹⁹ Nawẹ yè hẹn yé wá ovọ́tọ mẹ do, To nukun whiwhe dopo mẹ Obudaho wẹ yè do hù yé súdo.

²⁰ Taidi odlọ, whenuena mẹde fọ́n sọn amlọnmẹ; Mọwẹ, OKLUNỌ È, whenuena hiẹ fọ́n, hiẹ na dowinyan oyọ̀wiwà yetọn.

²¹ Na yẹn yín fifiẹtọ, Yè sọ sọnú mi to ayiha ṣie mẹ:

²² Mọ wẹ yẹn yín kanlinyihanọ sọ, bo sọ gú; Yẹn taidi gbékanlin to nukọn towe.

²³ Ṣigba yẹn tin de we to whepoponu Hiẹ sọ hẹn adusilọ ṣie go gligli.

²⁴ Hiẹ na yí ohónamẹ towe do do aliho hia mi, To godo hiẹ nasọ yí mi do gigo mẹ.

²⁵ Mẹnu wẹ yẹn tindo to olọn mẹ, adavo hiẹ? Núde ma sọ tin bọ yẹn yiwanna to aihọn mẹ po hiẹ po gba.

²⁶ Nusikọna agbasa ṣie po ayiha ṣie po: Ṣigba Jiwheyẹwhe wẹ huhlọn ayiha ṣie tọn, po ogú ṣie po kakadoi.

²⁷ Sã pọ́n, yé he dọ̀ do we lẹ na dọ̀n: Hiẹ ko hù yé he to ayọ̀de sọn de we lẹpo súdo.

²⁸ Ṣigba eyín yẹn tọn wẹ, é yón na mi nado sẹpọ́ Jiwheyẹwhe: Yẹn ko sọ hẹn OKLUNỌ Jiwheyẹwhe zùn fibẹ̀tado ṣie, Na yẹn nido nọ dọhó azọ́n towe lẹpo tọn.