PSALM 72 - BIBLU WIWE LỌ 1923

¹ JIWHEYẸWHE è, yí whẹ̀dida towe na ahọlu Podọ dódó towe hlan ovi ahọlu tọn.

² Ewọ na yí dódó towe do dawhẹ́na omẹ towe lẹ, Bo sọ yí nugbo do dawhẹ́na oyanọ towe lẹ.

³ Osó daho lẹ na hẹn jijọho wá na gbẹtọ lẹ, Podọ okọta pẹvipẹvi lọ, gbọn dódó dali.

⁴ Ewọ na dawhẹ́ oyanọ lẹ tọn to gbẹtọ lẹ mẹ, E na whlẹn ovi agbátọnọ lẹ tọn, Bo sọ finọn awusinyẹnnamẹtọ lẹ.

⁵ Yé na nọ dibusi we dile owhè po osùn po na dẹn sọ, To whẹndo popo mẹ.

⁶ Ewọ na jẹte do aigba di jikun do ogbé he yè sán ji: Di jikun-finfan he kùn do aigba ji.

⁷ To azán etọn gbè wẹ dódónọ na tónkùn; Podọ jijọho susu kaka osùn ma nado tin ba.

⁸ Ewọ na duahọlu ga sọn ohù de kọ̀n jẹ ohù de kón, Podọ sọn Otọ̀ lọ kọ̀n jẹ aigba pòdo lẹ.

⁹ Yé he sinai to zùngbo mẹ lẹ na litai nẹ̃; Kẹntọ etọn lẹ nasọ didọ kógudu.

¹⁰ Ahọlu Taṣiṣi tọn lẹ, po lòpojì lẹ tọn po na hẹn nunina wá: Ahọlu Ṣeba po Seba tọn po nasọ hẹn tòkuẹ wá.

¹¹ Nugbo, ahọlu lẹpo wẹ na jẹklo to nukọn etọn, Akọta lẹpo nasọ nọ sọn ẹn.

¹² Na é na whlẹn agbátọnọ lọ whenu é to awhádo; Oyanọ ga, podọ ewọ he ma tindo alọgọnamẹtọ de.

¹³ Ewọ na tindo lẹblanu to oyanọ po, agbátọnọ po ji; E nasọ whlẹn ayiha agbátọnọ tọn gán.

¹⁴ Ewọ na fli ayiha yetọn sọn awusinsinyẹn po adingbàndido po mẹ: Nuhọakuẹ wẹ ohùn yetọn na yín to nukun etọn mẹ.

¹⁵ Ewọ na nọgbẹ́, ewọ wẹ yè na dè sọn sika Ṣeba tọn mẹ na: Gbẹtọ lẹ na nọ hodé nẽ whepoponu; Yé na nọ dona ẹn to azán popo gbè.

¹⁶ Gbadó susugege na tin finẹ to osé lẹ ji; Sinsẹ́n etọn nasọ to mùmù di Lẹbanọni: Omẹ otòdaho mẹ tọn lẹ nasọ to vùnvùn di ogbé to aigba.

¹⁷ Oyín etọn na tin kakadoi: Oyín etọn na nọte dẹn kaka di owhè: Yè na nọ dona gbẹtọ to ewọ mẹ; Akọta lẹpo na nọ ylọ ẹ jijọhonọ.

¹⁸ Donanọ wẹ OKLUNỌ Jiwheyẹwhe, Jiwheyẹwhe Islaeli tọn, Omẹ dopo he nọ wà onú jawu,

¹⁹ Donanọ wẹ oyín etọn gigonọ kakadoi: Na aigba lẹpo ni gọ́ na gigo etọn. Niṣẹ, podọ Niṣẹ.

²⁰ Odẹ̀ Davidi ovi Jessé tọn lẹ jẹpòdo.