PSALM 71 - BIBLU WIWE LỌ 1923

¹ OKLUNỌ È, hiẹ mẹ wẹ yẹn to fibẹ̀tado din te: A dike yè dowinyan mi gbèdegbède blo.

² Whlẹn mì dódó towe mẹ, bo sọ tutlu mi jẹgbonu: Dotó towe ai hlan mi, bo sọ whlẹn mi.

³ Hiẹ ni yín awinyan fininò tọn na mi, fie dali yẹn na nọ yì whepoponu: Hiẹ ko degbè nado whlẹn mi; Na hiẹ wẹ awinyan po figángin ṣie po.

⁴ Whlẹn mi, Jiwheyẹwhe ṣie È, sọn alọ mẹylankan tọn mẹ, Sọn alọpàhomẹ mawàdódónọ po dawe kanọ po tọn mẹ.

⁵ Na hiẹ wẹ tódido ṣie, OKLUNỌ JIWHEYẸWHE È; Hiẹ wẹ tudonu ṣie sọn ovu ṣie wá.

⁶ Hiẹ go wẹ yẹn ko sọ dẽ pla do sọn adọ̀ mẹ; Hiẹ wẹ ewọ he hẹn mi jẹgbonu sọn ohò onọ ṣie tọn me: Towe wẹ pipa ṣie na yín whepoponu.

⁷ Yẹn lẹzun núdabla to mẹsusu de; Ṣigba hiẹ wẹ fibẹ̀tado ṣie sinsinyẹn.

⁸ Gbọ onù ṣie ni gọ́ na pipa towe Podọ na yẹyi towe to azán popo gbè.

⁹ A sisé mi hlan whenuena yẹn poyọ́nhó blo; A sọ gbẹ́ mi dai whenuena huhlọn ṣie sẹpò blo.

¹⁰ Na kẹ̀ntọ ṣie lẹ to ohó ṣie dọ; Yé he tọwù na ayiha ṣie lẹ pli bo lẹnnu dopọ,

¹¹ Yé dọmọ, Jiwheyẹwhe ko gbẹ́ ẹ dai: Mì domọ̀ bo wlé e; na mẹde ma tin bo na whlẹn ẹn.

¹² Jiwheyẹwhe E, a dẹ́n do mi blo: Jiwheyẹwhe ṣie E, yawu gọalọna mi.

¹³ Gbọ yé ni mọwinyan, na yè ni sọ gbà yé he to mẹslẹtọ ayiha ṣie tọn yín lẹ súdo: Gbọ yè ni yí ovlẹ po matingbégbò po ṣinyọn yé he to awugble ṣie din lẹ ji.

¹⁴ Ṣigba yẹn na to tódo whepoponu; Yẹn nasọ to pipa we jànwẹ.

¹⁵ Onù ṣie na nọ dọhó dódó towe tọn, po whlẹngan towe tọn po to azán popo gbè; Na yẹn ma sà yón sọha yetọn

¹⁶ Yẹn na wá po huhlọnzọ́n OKLUNỌ JIWHEYẸWHE tọn po: Yẹn nasọ nọ dọhó dódó towe tọn; yèdọ towe kẹdẹ.

¹⁷ Jiwheyẹwhe E, hiẹ wẹ plọ́n mi sọn ovu whenu ṣie: Podọ jẹ dinvie yẹn ko to ohó azọ́n towe he jawu tọn dọ.

¹⁸ Dinvie ga whenuena yẹn zùn yọ́nhónọ bo sọ wúwhà, Jiwheyẹwhe È, a gbẹ́ mi blo; Kaka yẹn na do yí huhlọn towe hia whẹndo he ja, Hlọnhlọn towe hlan yé he ja to godo lẹpo.

¹⁹ Jiwheyẹwhe È, dódó towe yìaga susu, Hiẹ he nọ wà onú he klo: Jiwheyẹwhe E, Mẹnu wẹ taidi hiẹ?

²⁰ Hiẹ, he ko yí oya he klo bo sinawu hia mi, Wẹ na vọ́ mi hẹn do ogbé, Bo sọ vó mi zé dlan aga sọn odò sisosiso aigba tọn mẹ.

²¹ Hiẹ ni hẹn yẹyi ṣie zùn daho, Bo sọ lẹ́gọ̀ bo mìọnhomẹna mi.

²² Yẹn nasọ yí asiazọn hànjinu do pa we ga, Yèdọ nugbo towe, Jiwheyẹwhe ṣie E; Hiẹ wẹ yẹn na yi ajalẹn do jihàn hlan, hiẹ mẹwiwe Islaeli tọn E.

²³ Nùflo ṣie na jaya susu whenuena yẹn to hànji hlan we; Po ayiha ṣie he hiẹ ko flìgò po.

²⁴ Odẹ́ ṣie ga na nọ kanyiha dódó towe tọn to azán popo gbè: na yé ko mọ winyan, yè sọ flu yé he to awugble ṣie din lẹ.