PSALM 69 - BIBLU WIWE LỌ 1923

¹ JIWHEYẸWHE È, whlẹn mì; Na osìn biọ homẹ yi ayiha ṣie mẹ.

² Yẹn wán jẹ ogbà he siso mẹ, fie tenọtẹn ma te; Yẹn sọ jẹ otọ̀ he siso mẹ, fie asisa sà ṣinyọn oji e te.

³ Nudikọ̀na mi na awhágbè ṣie: ovẹ́go ṣie hú: Nukun ṣie yìsagbé, whenuena yẹn nọtepọ́n Jiwheyẹwhe ṣie.

⁴ Yé he gbẹwanna mi jẹagọ̀ lẹ sú hú odà he tin to ota na mi: Asuka wẹ yé he yín kẹ̀ntọ ṣie jẹagọ̀ bo jlo na hù mi súdo lẹ: Whenẹnu wẹ yẹn jó onú he yẹn ma fìn.

⁵ Jiwheyẹwhe È, hiẹ yón nululu ṣie, Whẹgbledo ṣie ma sọ whlá sọn nukun towe mẹ.

⁶ Oklunọ E, JIWHEYẸWHE awhànpa lẹ ton, a dike winyan hù mẹhe nọtepọ́n we gbọn yẹn mẹ blo: A sọ dike yé he to dindin we lẹ flu gbọn yẹn mẹ blo, Jiwheyẹwhe Islaeli tọn.

⁷ Na towe tọn wutu wẹ yẹn to ovlẹ yí sá do ogo; Winyan ṣinyọn nukunmẹ na mi.

⁸ Yẹn lẹzun ojonọ na mẹmẹsunnu ṣie lẹ, Mẹdẽvo to ovi onọ ṣie tọn lẹ de.

⁹ Na vivẹnu ohọ̀ towe tọn ko dù mi pó; Ovlẹ yé he to vivlẹ we lẹ tọn flé jẹ oji e.

¹⁰ Whenuena yẹn viavi bo sọ yí nùbibla do doyana dẽ, Ehe ga sọ zùn ovlẹ na mi.

¹¹ Yẹn yí odẹ́vọ̀ do basi avọ̀ ṣie ga; Yẹn sọ lẹzun hodọnu na yé.

¹² Yé he sinai to họngboji lẹ to onú ṣie dọ; Yẹn sọ lẹzun ohàn ahannumunọ lẹ tọn.

¹³ Ṣigba eyín yẹn tọn wẹ, odẹ́ se tin hlan de we, OKLUNỌ E, to alọkẹyi whenu: Jiwheyẹwhe E, to lẹblanu towe susu mẹ Siọ mi to nugbo whlẹngan towe tọn mẹ.

¹⁴ Whlẹn mi sọn ogbà mẹ; a dike yẹn wán blo: Gbọ yẹn ni yín whinwhlẹn sọn alọ yé he gbẹwanna mi lẹ tọn mẹ, Podo sọn otọ̀ he siso lẹ mẹ.

¹⁵ A dike asisa sà ṣinyọn oji e blo; A so dike odògbo zé mi mì blo; A dike odọ̀ bọ̀ onù etọn do mi blo.

¹⁶ OKLUNỌ E, siọ mi; na dagbewanyi towe yónwhanpẹ: Légọ̀ do dẽ kẹdẹdile lẹblanu bibọ towe susugege te.

¹⁷ A yí nukun towe whlá sọn devi towe de blo; Na yẹn tin to tukla mẹ; yawu siọ mi.

¹⁸ Sẹpó ayiha ṣie, bo fli i gò: Fli mi na kẹ̀ntọ ṣie lẹ tọn wutu.

¹⁹ Hiẹ yón ovlẹ ṣie, winyan ṣie, po madoyẹyi ṣie po: Kẹntọ ṣie lẹpo tin to nukọn towe.

²⁰ Ovlẹ ko hẹn ayiha ṣie gbà; yẹn jẹawutu talala; Yẹn din mẹhe na wàlẹblanu na mi, ṣigba é ma tin; Na homẹmiọnnamẹtọ lẹ, yẹn ma sọ mọ mẹde,

²¹ Yé yí vivẹ́ na mi na núdùdù ṣie ga, Podọ na nùgbla ṣie yé na ovẹ̃n vivẹ́ mi na nùnù.

²² Gbọ tafo yetọn to yé nukọn ni lẹzùn omọ̀: Podọ whenuena yé tin to jijọho mẹ, gbọ é ni lẹzùn omọ̀.

²³ Gbọ nukun yetọn ni dozín, yé mọnú blo; Bo sọ hẹn adaja yetọn sisọ whepoponu.

²⁴ Kòn kàndudu towe do yé ji, Na adi homegble towe tọn ni gbó nukọnna yé.

²⁵ Gbọ aisintẹn yetọn ni jẹvọ, Medepope sọ nọ̀ ogohọ̀ yetọn mẹ blo.

²⁶ Na yé to homẹkẹndo ewọ mẹhe hiẹ ko linu; Yé sọ to ohó awubla mẹhe hiẹ doalan ogo na lẹ tọn dọ.

²⁷ Yí oylanwiwà dogó oylanwiwà na yé; A sọ dike yé wá dódó towe mẹ blo

²⁸ Gbọ yè ni gbidi yé sọn owé ogbẹ́nọ lẹ tọn mẹ, Yè sọ wlanwe yetọn dogọ́ dódónọ lẹ tọn blo.

²⁹ Ṣigba oyanọ, awúblanọ we yẹn: Gbọ whlẹngan towe, Jiwheyẹwhe E, ni zé mi doaga.

³⁰ Yẹn na yí ohàn do pa oyín Jiwheyẹwhe tọn, Yẹn nasọ yí opẹ́ do hẹn ẹn klo.

³¹ Ehe ga na hẹn homẹ OKLUNỌ tọn hùn hú oyinsúsisa, Kavi oyìnsú he tindo azò po ofẹ̀n po.

³² Huwhẹnọ lẹ na mọ ehe, homẹ yetọn na hùn; Mì he to Jiwheyẹwhe din lẹ, gbọ ayiha mítọn ni nọ ogbẹ̀.

³³ Na OKLUNỌ nọ sè ogbè agbátọnọ lẹ, tọn, E ma sọ nọ vlẹ ogàntọ etọn lẹ gba.

³⁴ Gbọ olọn po aihọn po ni pa ẹ, Ohù lẹ, po onú he nọ lìn to finẹmẹ lẹpo po.

³⁵ Na Jiwheyẹwhe; na whlẹn Ziọni, é nasọ gbá otòdaho Juda tọn lẹ: Yé na nọnọ̀ finẹ; yé nasọ tindo e na ogú.

³⁶ Okún devi etọn lẹ tọn ga na dugú etọn: Yé he yiwanna oyín etọn lẹ wẹ na nọnọ̀ e mẹ.