PSALM 66 - BIBLU WIWE LỌ 1923

¹ JAYA homẹhùnhùn tọn hlan Jiwheyẹwhe, mì aigba lẹpo:

² Mì jihàn gigo oyín etọn tọn: Mì hẹn pipa etọn yín gigonọ.

³ Mì dọ hlan Jiwheyẹwhe, dọ, Na hiẹ jiawu do to azọ̀n towe lẹ mẹ Huhlọn towe susu mẹ wẹ kẹ̀ntọ towe lẹ na yí sisọsisọ do wá de we.

⁴ Aihọn lẹpo na nọ sẹ̀n we, Yé na nọ jihàn hlan we; Yé na nọ jihàn hlan oyín towe. Selah.

⁵ Mì wá pọ́n azọ̀n Jiwheyẹwhe tọn; Ewọ jiawu to azọ̀n etọn mẹ hlan, ovi gbẹtọ lẹ tọn dali.

⁶ E diọ ohù zùn aigba húhú: Yé zọ̀n afọ gbọn otọ̀ mẹ wá yì: Ẹmẹ wẹ míwlẹ jaya tẹ to ewọ mẹ.

⁷ E dugán gbọn huhlọn etọn dali kakadoi; Nukun etòn to akọta lẹ pọ́n: Na atẹṣitọ lẹ ma nado zé yéde daga. Selah.

⁸ Mì dona Jiwheyẹwhe mítọn, mì gbẹtọ lẹ emi, Mì ni sọ hẹn ogbè pipa etọn tọn yín sisè.

⁹ Mẹhe hẹn gbigbọ mítọn do ogbẹ̀; Bo ma dike afọ mítọn yín sisẹtẹnna.

¹⁰ Jiwheyẹwhe E, hiẹ ko mọdòna mí; Hiẹ ko whle mí pọ́n, dile yè nọ whle fataka pọ́n do.

¹¹ Hiẹ hẹn mí biọ odẹ̀ me: Hiẹ sọ yí nukunbibia de do adaja mítọn lẹ ji.

¹² Hiẹ hẹn gbẹtọ lẹ hẹ́ ota na mí; Mí to miyọn po osìn po mẹ gbọn: Ṣigba hiẹ bẹ́ mí wá ofì he bọawú.

¹³ Yẹn na biọ ohọ̀ towe mẹ yẹn po avọ́ nunina mimẹ̀ lọ po: Hlan we wẹ yẹn nasọ hẹn opàdido ṣie di,

¹⁴ He nùflo ṣie ko dọ, bọ onù ko dọ, Whenuena yẹn tin to tukla mẹ.

¹⁵ Yẹn na sán avọ́ mimẹ̀ ojó tọn hlan we, Po owán ojó agbò tọn po, Yẹn na yí oyìnsú po gbọgbọẹ po do sánvọ́. Selah.

¹⁶ Mì wá sè, mì he dibusi Jiwheyẹwhe emi, Yẹn na lá onú he é wà na mi.

¹⁷ Yẹn yí onù ṣie do dawhá hlan ẹn, Yẹyiwiwle sọ tin to odẹ́ ṣie glọ.

¹⁸ Eyín yẹn dèwujọ oylan to ayiha ṣie mẹ, OKLUNỌ ma ogbè ṣie na sè gba.

¹⁹ Ṣigba Jiwheyẹwhe ko sè ogbẹ̀ ṣie nugbonugbo; É ko dotó ogbè odẹ̀ ṣie tọn go.

²⁰ Donanọ wẹ Jiwheyẹwhe, He ma gọ̀ odẹ̀ ṣie do godo, Kavi dagbewanyi etọn sọn dè.