PSALM 65 - BIBLU WIWE LỌ 1923

¹ JIWHEYẸWHE È, hlan we wẹ abọẹ yín pipa to Ziọni mẹ: Hlan we wẹ yè na hẹn opàdido di.

² Hiẹ he nọ sè odé, De we wẹ gbẹtọ lẹpo ja

³ Oylanwiwà hunkọhunkọ dohuhlọn hú mi: Eyín tasinẹn mítọn lẹ tọn wẹ, hiẹ wẹ na kìọ yé sẹ.

⁴ Donanọ wẹ mẹhe hiẹ dè, he hiẹ hẹn sẹpọ́ de we, Na é nido nọnọ̀ akànmahó towe lẹ mẹ: Dagbe ohò towe tọn na pekòna mí, Yèdọ tẹmpli wiwe towe tọn.

⁵ Gbon onú dobu he to dódó mẹ lẹ dali wẹ hiẹ na siọ mí, Jiwheyẹwhe whlẹngan mítọn tọn È; mẹhe yín tudido pòdo aihọn po ohù lẹpo po tọn, To aganu boboe.

⁶ Ehe gbọn huhlọn etọn dali yí osé daho lẹ hẹnai; He yè yí huhlọn do blagbajana:

⁷ Mẹhe hòhuwhẹ gbigbo ohù ton, gbigbó agbowhẹn osìn yetọn tọn, Po zìngidi gbẹtọ lẹ tọn po.

⁸ Yé he nọnọ̀ pòdo dali lẹ to budi na ohia towé lẹ wutu: Hiẹ hẹn gbonujijẹ afọnnu tọn po whèjai tọn po yí ayajijẹ do jaya.

⁹ Hiẹ dla aigba pọ́n, bo sọ husìn in, Hiẹ hẹn en wàdọkun susugege; Oté Jiwheyẹwhe tọn gò na osìn: Hiẹ wleawu gbadó tọn na yé, whenuena hiẹ ko wleawu aigba tọn domọ.

¹⁰ Hiẹ husìn whẹndọvlọ etọn susugege: hiẹ tó agbówhẹn etọn lẹ: Hiẹ sọ yi jikunfinfán do hẹn aigba etọn bọ: Hiẹ sọ dona wúwú etọn.

¹¹ Hiẹ yí dagbe towe do ṣinyọn gbakun na owhè: Omọ́ towe lẹ to ojó kùn.

¹² Yé to kùnkùn do ogbémú zùngbomẹ tọn lẹ ji: Osó pẹvipẹvi lẹ sọ yí ayajijẹ do blagbaja na yéde.

¹³ Opá lẹngbọ tọn wẹ yè do ṣinyọ̀navọ̀na ogbémú lẹ; Agbàdò wẹ yè yí gbadó ṣinyọn; Yé to ayaje na homẹhùnhùn, yé sọ to hànji ga.