PSALM 62 - BIBLU WIWE LỌ 1923

¹ NUGBO, ayiha ṣie yín abọẹnọ hlan Jiwheyẹwhe, E de wẹ whlẹngan ṣie sọn.

² Ewọ dopo wẹ osé ṣie po whlẹngan ṣie po; Ewọ sọ wẹ atọ̀họ ṣie he yìaga; yè ma na fọ́n mi sọn otẹn ṣie mẹ susu de.

³ Nawẹ mì na dèkẹntọ to gbẹtọ de go dẹn sọ, Na mì nido hù i, mì omẹ pó, Di adó he dẹ́, podọ di opá he to adaji?

⁴ Linlẹn yetọn wẹ nado dọ̀n ẹn liai sọn yẹyi etọn mẹ: Yé to homẹhùnhùn do to lalo mẹ: Yé sọ yí onù yetọn do to didona, ṣigba to ohò yètọn mẹ yé to dẹ́hodomẹ. Selah.

⁵ Ayiha ṣie, hiẹ ni yín abọẹnọ hlan Jiwheyẹwhe; Na e de wẹ tenọpọnmẹ ṣie sọn.

⁶ Ewọ dopo wẹ osé ṣie po whlẹngan ṣie po; Atọ̀họ ṣie he yìaga; yè ma na fọ́n mi sọn otẹn ṣie mẹ gba.

⁷ Jiwheyẹwhe de wẹ whlẹngan ṣie te, po gigo ṣie po: Awinyan huhlọn ṣie tọn, fibẹ̀tado ṣie sọ tin to Jiwheyẹwhe me.

⁸ Mì dotudo e go whepoponu, mì gbẹtọ lẹ emi; Kòn ayiha mítọn jẹgbonu to nukọn etọn: Jiwheyẹwhe wẹ fibẹ̀tado de na mí. Selah.

⁹ Nugbo, nuvọ́ wẹ ovi gbẹtọ tọn lẹ, gbẹtọ lalonọ wẹ yé he dugán lẹ: To nujlẹgàn lẹ mẹ aga yé na yì, Yé fua patapata hú ovọ́.

¹⁰ A dotu to awusinyẹnnamẹ mẹ blo, A sọ yígo to ajojijẹ mẹ blo: Eyín adọkun són sinsẹ́n, mì zé ayiha mítọn do e go blo.

¹¹ Jiwheyẹwhe ko dọhó whladopo; Whlawetọ wẹ yẹn sè ehe; Dọ Jiwheyẹwhe tọn wẹ huhlọn:

¹² OKLUNỌ è, towe wẹ dagbewanyi ga: Na hiẹ nọ suahọ etọn hlan mẹdopodopo kẹdẹdi azọ́n etọn.