PSALM 60 - BIBLU WIWE LỌ 1923

Psalm Davidi tọn whenuena é to awhànfùn hẹ Silianu lẹ he tin to otọ̀ awe ṣẹnsẹn, po Silianu Zoba tọn po, whenuena Joabu lé bo sọ hù fọtọ́n wiawe sọn Edọminu lẹ mẹ to agbàdò ojè tọn mẹ.

¹ JIWHEYẸWHE È, hiẹ ko zé mí dlán, hiẹ ko họ́ mí liai, Homẹ towe ko gble: sọ hẹn mí nado lẹ́gọ̀.

² Hiẹ ko hẹn aigba sisọ; hiẹ ko hẹn ẹn kẹ̀whè: Hẹn gbigbà etọn gọ̀ do otẹn, na é to whinwhàn.

³ Hiẹ ko yí onú he sinyẹn hia omẹ towe lẹ: Hiẹ ko sọ hẹn mí nado nù ovẹ̃n ahlidida tọn.

⁴ Hiẹ ko do awhànsia hlan yé he dibusi we lẹ, Na yè nido sọ ẹ hia na nugbo tọn wutu. Selah.

⁵ Na yè nido whlẹn mẹyiwanna towe; Yí adusilọ towe do whlẹngan, bo sọ siọ mi.

⁶ Jiwheyẹwhe ko dọhó to owàlọwiwe etọn mẹ, dọ, Yẹn na doawagun: Yẹn na má Ṣekẹmi, bo sọ jlẹ́ agbàdò Sukọti tọn.

⁷ Ṣie wẹ Gileadi; ṣie wẹ Manasẹ; Eflaimi ga wẹ nuglonu ota ṣie tọn; Juda wẹ ogánpò ṣie.

⁸ Moabi wẹ awulẹzẹ́n ṣie; Edọmi ji wẹ yẹn na dè afọpa ṣie gbọn: Filistia, hiẹ ni jaya homẹhùnhùn tọn na yẹn tọn wutu.

⁹ Mẹnu wẹ na hẹn mi biọ otòdaho dòkọnọ lọ mẹ? Mẹnu wẹ na plan mi yì Edọmi?

¹⁰ Bé hiẹ ma na, Jiwheyẹwhe È, he ko zé mí dlangbe, Bo ma jẹgbonu yí po awhànpa mítọn lẹ po gba?

¹¹ Na alọgọ mí to tukla mẹ: Na ovọ́ wẹ alọgọ gbẹtọ tọn.

¹² Alọ Jiwheyẹwhe tọn mẹ wẹ mí na wàdan gbọn: Na ewọ wẹ mẹhe na tùnafọ tasọmẹtọ mítọn lẹ ji.