PSALM 59 - BIBLU WIWE LỌ 1923

Psalm Davidi tọn de, whenuena Saulu domẹhlan bọ yé hẹ́ owhé etọn nado hù i.

¹ JIWHEYẸWHE ṣie È, tutlu mi sọn kẹ̀ntọ ṣie lẹ si: Zé mi doaga sọn yé he fọ́n do oji e lẹ de.

² Tutlu mi sọn ylanzọ́nwàtọ lẹ si, Bo sọ whlẹn mi sọn mẹhùnnutọ lẹ si.

³ Dayi e go, yé tọwù na ayiha ṣie: Asuka lẹ pli do oji e; É ma yín na tasinẹn ṣie wutu, kavi na ylando ṣie wutu gba, OKLUNỌ È

⁴ Yé dowezun, yé sọ wleawu na yéde matin nuwàyìndo ṣie: Fọ́n, nado pé mi, bo sọ dayi e go.

⁵ Enẹwutu hiẹ, OKLUNỌ E, Jiwheyẹwhe awhànpa lẹ tọn, Jiwheyẹwhe Islaeli tọn, Fọ́n, bo dla kosi lẹ pọ́n: A yín lẹblanunọ hlan hùngbadonu azọ́ntọ ylanwiwà tọn lẹ blo. Selah.

⁶ Yé légó to whèjai. Yé to hùnhlun taidi avún, Bo to zọnlinzin lédo otòdaho lọ.

⁷ Dayi e go, yé yí onù yetọn do họ̀ jẹgbonu: Ohi sọ tin to nùflo yetọn mẹ: Na yé to didọmọ, Mẹnu wẹ sè?

⁸ Ṣigba hiẹ, OKLUNỌ E, na kò yé; Hiẹ nasọ yí kosi lẹ do davlẹ.

⁹ Na huhlọn ṣie hiẹ wẹ yẹn na nọtepọ́n: Na Jiwheyẹwhe wẹ atọ̀họ ṣie he yìaga.

¹⁰ Jiwheyẹwhe dagbewanyi ṣie tọn na jẹnukọnna mi: Jiwheyẹwhe na dike yẹn ni mọ ojlo ṣie to yé he tọwù dai na mi lẹ ji

¹¹ À hù yé blo, na omẹ ṣie lẹ nikã wọnji; Gbà yé kija gbọn huhlọn towe dali: Bo sọ hẹn yé jẹte wá, OKLUNỌ E, awòyinú mítọn.

¹² Na ylando onù yẹtọn mẹ tọn, Po ohó nùflo yetọn mẹ tọn po gbọ yè ni tlẹ wló yé to sakla yetọn mẹ: Na dẹ̀hodo po lalo he yé to dìdọ po wutu.

¹³ Và yé homegble towe mẹ; và yé bọ yé ma nado tin ba: Bo gbọ yé ni yọnẹn dọ Jiwheyẹwhe duahọlu to Jakobu mẹ Hlan opodo aigba tọn lẹ. Selah.

¹⁴ Podọ to owhèjai gbọ yé ni lẹ́gọ̀: bo gbọ yé ni to hùnhlun gbè de basi di avún de, Bo to lilẹ́do otòdaho lọ.

¹⁵ Yé na danpe na núdùdù, Bo sọ nọte to ozán lẹpo mẹ eyín onú ma pékòna yé.

¹⁶ Ṣigba yẹn na jihàn huhlọn towe tọn; Nugbo, yẹn na dabóbó dagbewanyi towe tòn gangán to afọnnu Na hiẹ wẹ yín atọ̀họ he yìaga podọ fìbẹ̀tado ṣie to azán tukla ṣie tọn gbè.

¹⁷ Hlan we, hiẹ huhlọn ṣie E, wẹ yẹn na jihàn: Na Jiwheyẹwhe wẹ atọ̀họ ṣie he yìaga, Jiwheyẹwhe dagbewanyi ṣie tọn.