PSALM 58 - BIBLU WIWE LỌ 1923

¹ BÉ míwlẹ to abọẹ mẹ to dódó dọ nugbo? Mì to whẹ̀da kunnumahu, mì ovi gbẹtọ tọn lẹ emi?

² Nugbo, mì to oylan wà to ayiha mẹ: Mì sọ to adingbàndido alọ mítọn mẹ tọn jlẹpọn to aigba ji.

³ Yè ko hẹn mẹylankan lẹ jẹ ola sọn adinẹ: Plaun le yé yín jiji jãnwẹ yé ko buali, bo sọ to lalodo.

⁴ Adi yetọn di adi odàn tọn: Yé di lòpa tókunọ he hẹn ede kutó;

⁵ He ma tùntóai hlan ogbẹ̀ hùwhẹ̀hòmẹtọ lọ tọn, Eyín é tlẹ yí nuyọnẹn do hòhùwhẹmẹ.

⁶ Sún adú yetọn, Jiwheyẹwhe E, to onù yetọn mẹ: Sún adúsó kinnikinni ovu lẹ tọn, OKLUNỌ È.

⁷ Gbọ yé ni yọ́ kọnyingbó di osìn he to sisa awuyawuya: Whenuena é tá ogá etọn lẹ, gbọ yé ni taidi onú he yè sán do flinflin.

⁸ Gbọ yé ni di ohọ́ he yọ́, bo sọ juwayì; Taidi vijiji yọnnu jlẹmasọna tọn, he ma ko mọ owhè.

⁹ Whẹpo ozẹ́n mítọn lẹ sọgan yón zòjiji owùn tọn, E na yi jẹhọnahizi do zà yé yì, Omú po ehe to jiji po do zẹ̃nzẹn.

¹⁰ Dódónọ na jaya whenuena é mọ, ahọsu lọ: E nasọ klọ́ afọ etọn to ohùn mẹylankan lẹ tọn mẹ.

¹¹ Mọ bọ gbẹtọ lẹ na dọmọ, Nugbo, ale de tin na dódónọ lẹ Nugbo, Jiwheyẹwhe de tin ehe to whẹ̀da to aigba ji.