PSALM 57 - BIBLU WIWE LỌ 1923

Psalm Davidi tọn de whenuena é họn sọn Saulu de to aigbaslo mẹ.

¹ WÀLẸBLANUNA mi, Jiwheyẹwhe È, wàlẹblanuna mi: Na ayiha ṣie fibẹ̀tado din to hiẹ mẹ; Nugbo, oyẹ̀ awà towe tọn glọ wẹ yẹn na yí do basi fibẹ̀tado ṣie, Kaka hẹngble lọ nado juwayì.

² Yẹn na dawhá ylọ Jiwheyẹwhe Gigogan: Hlan Jiwheyẹwhe he yí onú lẹpo wà na mi.

³ Ewọ na do omẹ hlan sọn olọn mẹ, Bo sọ whlẹn mi whenuena ewọ he to jijlo na zé mi mì lọ to vivlẹ mi. Selah Jiwheyẹwhe na do dagbewanyi etọn po nugbo etọn po hlan gbonu.

⁴ Ayiha ṣie tin to kinnikinni lẹ ṣẹnsẹn: Yẹn tlẹ mlọnai to ṣẹnsẹn yé he hùnzo tọn, Enẹ wẹ ovi gbẹtọ tọn lẹ, adú mẹhetọn basi owhán po oga po, Odé yetọn ohi dida.

⁵ Yín zizedaga, Jiwheyẹwhe E, to olọn lẹ ji; Gigo towe to aigba lẹpo ji.

⁶ Yé ko tá odọ̀ dai na afọ ṣie, yè hẹn ayiha ṣie dokọ̀dò: Yé kùndó dai to nukọn ṣie, Ṣẹnsẹn etọn wẹ yélọsu jai do. Selah.

⁷ Ayiha ṣie ko wleawu, Jiwheyẹwhe E, ayiha ṣie ko wleawu: Yẹn na jihàn, mọwẹ, yẹn na jihàn pipa lẹ.

⁸ Fọ́n, hiẹ gigo ṣie; Fọ́n, asiazón hànjinu po ajalẹn po: Yẹn lọsu na fọ́n afọnnufũ.

⁹ Yẹn na pa we, OKLUNỌ E, to gbẹtọ lẹ ṣẹnsẹn: Yẹn nasọ jihàn pipa lẹ hlan we to akọta lẹ ṣẹnsẹn.

¹⁰ Na dagbewanyi towe sù jẹ olọn lẹ de; Nugbo towe sọ jẹ aganukunmẹ lẹ de.

¹¹ Yín zizedaga, Jiwheyẹwhe E, to olọn lẹ ji aga: Gigo towe to aigba lẹpo ji.