PSALM 55 - BIBLU WIWE LỌ 1923

¹ SÈ ọdẹ́ siẹ, Jiwheyẹwhe È; A so yí dewe whlá sọn ovẹ̀ ṣie mẹ blo.

² Dayi ogo e, bo siọ mi; Matingbọjẹnọ wẹ yẹn to koefinfan ṣie mẹ, yẹn sọ to winwẹn.

³ Na ogbẹ̀ kẹ̀ntọ tọn, Na awusinyẹnnamẹ mẹylankan tọn wutu: Na yé hẹn ylando pla mi, To homẹgble mẹ yé dohomẹkẹn mi.

⁴ Ayiha ṣie tin to awufiẹsa mẹ to yẹn homẹ; Avosisa okú tọn flẹ́ jẹ oji e.

⁵ Obu po sisọsisọ po jẹ oji e, Ahlinhòn sọ ṣinyọn oji e.

⁶ Yẹn sọ dọmọ, Ṣó, yẹn do tindo awà di owhle de Yẹn do zlọn yì, bo yì gbọjẹ.

⁷ Pọ́n, yẹn na zinzọnlin yì ali dindẹn boboe, Bo sọ sín zùngbo mẹ. Selah.

⁸ Yẹn na yawu hòn yì gán Na dẽ sọn jẹhọn pò oyujẹhọn lẹ po mẹ,

⁹ OKLUNỌ E, hùsúdo, bo zẹ́ odẹ yetọn: Na yẹn mọ adingbàndido po avùn po to otòdaho lọ mẹ.

¹⁰ Okle po ozán po wẹ yé yí do to zọnlinzin lẹ́do e to dokò etọn lẹ ji: Oylanwiwà po danuwiwà po tin to ṣẹnsẹn etọn.

¹¹ Hẹngble tin to ṣẹnsẹn etọn ga, Awusinyẹnnamẹ po oklọ po ma tón sọn alihogbo etọn lẹ mẹ gba.

¹² Na é ma yín kẹ̀ntọ wẹ tò vivlẹ mi gba; Whenẹnu yẹn do yisádogo: Mọ é ma yín ewọ he gbẹwanna mi wẹ to kikla do oji e gba; Whenẹnu yẹn do sọ dẽ whlá sọn e de.

¹³ Ṣigba hiẹ, oha ṣie wẹ, ogbẹ́ ṣie, Mẹyinyọnẹn ṣie.

¹⁴ Mí hẹn aṣli mítọn zùn vivi, Bo sọ zinzọnlin yì ohọ̀ Jiwheyẹwhe tọn mẹ hẹ agùn lọ,

¹⁵ Gbọ okú ni tẹ́ do yé go, Na yé ni zòn ogbẹ̀ yì kútòmẹ: Na kanyinylan tin to aisintẹn yetọn, to ṣẹnsẹn yetọn.

¹⁶ Eyín yẹn tọn wẹ, yẹn na dawhá ylọ Jiwheyẹwhe, OKLUNỌ nasọ whlẹn mi.

¹⁷ To owhèjai, to afọnnu, podọ to owhèmẹ wẹ yẹn na nọ fankoe, bo sọ nọ wẹ́n: Ewọ nasọ sè ogbẹ̀ ṣie

¹⁸ É ko fli ayiha ṣie to jijọho me sọn alọ awhàn he fọ́n do oji e si; Na mẹsusu wẹ tin to do

¹⁹ Jiwheyẹwhe na sè, bo bianukunna yé. Yèdọ ewọ he sinai sọn hóhówhenu, (Selah), Gbẹtọ he ma tindo húdiọdomẹ, podọ mẹhe ma dibusi Jiwheyẹwhe.

²⁰ E ko dlẹn alọ etọn do mẹhe tin to, jijọho mẹ po e po go: E ko hẹn alènu etọn zùn mawé.

²¹ Ohó etọn mlẹn di Ìimu; Ṣigba awhàn wẹ ayiha etọn: Ohó etọn mlẹn hú amisisá, Ṣigba ohi dindọnsún wẹ yé.

²² Zé agbàn towe dlẹn OKLUNỌ ji, ewọ nasọ hẹn we dote; Ewọ ma na dike dódónọ ni yín sisẹtẹnna.

²³ Ṣigba hiẹ, Jiwheyẹwhe E, na hẹn yé jẹte yì odọ̀ dindọn tọn me: Mẹhùnnutọ po mẹklọtọ lẹ po ma na hò azán yetọn dadawe: Ṣigba yẹn na dotudo ogo we.