PSALM 51 - BIBLU WIWE LỌ 1923

Psalm Davidi tọn de, whenuena Natani yẹwhegán wá e de, godo he é yìhòdo Batṣeba.

¹ JIWHEYẸWHE È, wàlẹblanuna mi, kẹdẹdi dagbewanyi towe: Kẹdẹdi lẹblanu bibọ towe susu tọn, gbidi tasinẹn ṣie sè.

² Kló mì sọn oylanwiwà ṣie mẹ patapata; Bo sọ lẹ́ mi wé sọn ylando ṣie mẹ.

³ Na yẹn yígbe tasinẹn ṣie tọn: Whepoponu wẹ ylando ṣie sọ tin to nukọn ṣie.

⁴ Hiẹ, hiẹ dopokẹdẹ go wẹ yẹn wàylan do, Bo sọ wà ylankan nẹ to nukọn towe: Na yè nido sùwhẹna we whenuena hiẹ dọhó, Bo sọ yín dódónọ whenuena hiẹ to whẹ́da.

⁵ Dayi e go, oylanwiwà mẹ wẹ yè ji mi te; Podọ ylando mẹ wẹ onọ ṣie mọhò ṣie te.

⁶ Dayi e go, hiẹ jlo nugbo to ohò mẹ: Podọ to ayiha ṣie mẹ dọ̃n hiẹ na hẹn mi yọ́n nuyọnẹn.

⁷ Yí hisọpu do kló mi, yẹn nasọ yín wiwe; Lawuna mi, yẹn nasọ wé hú osìnagó.

⁸ Hẹn mi sè homẹvivi po homẹhùnhùn po; Na ohú he hiẹ ko gbidi nido jaya.

⁹ Sọ nukun towe whlá sọn ylando ṣie go, Bo sọ súnsún oylanwiwà ṣie lẹpo sẹ́.

¹⁰ Da ayita yọ́yọ́ de na mi, Jiwheyẹwhe E; Bo sọ hẹn ayiha nugbo tọn jẹyóyó to ohò ṣie mẹ.

¹¹ À yàn mi sọn nukọn towe blo; A sọ yi gbigbọ wiwe towe sọn dẽ blo.

¹² Gọ́ homẹhùnhùn whlẹngan towe tọn hlan dẽ; Bo sọ yí gbigbọ ojlonọ do hẹn mi dote.

¹³ Whenẹnu wẹ yẹn na plọ́n ali towe tasinẹntọ lẹ: Ylandonọ lẹ nasọ lẹ́gọ̀ wá de we.

¹⁴ Tutlu mi jẹgbonu sọn ylando ohùn tọn mẹ, Jiwheyẹwhe E, hiẹ Jiwheyẹwhe whlẹngan ṣie tọn: Odẹ́ ṣie na to ohàn dódó towe tọn ji gangam

¹⁵ OKLUNỌ E, hùn nùflo ṣie; Onù ṣie nasọ to pipa towe la.

¹⁶ Na hiẹ ma dohomẹhùn to avósinsán mẹ; bọ yẹn do jó e: Hiẹ ma sọ tindọ homẹvivi de do nunina avọ́ mimẹ̀ tọn go.

¹⁷ Avó Jiwheyẹwhe tọn wẹ otù gbigbà; Ayiha gbigbà fìnfinọn, Jiwheyẹwhe È, hiẹ ma to na vlẹ gba.

¹⁸ Wàdagbe homẹhùn towe tọn hlan Ziọni: Bo sọ do dokò Jelusalẹm tọn.

¹⁹ Whenẹnu wẹ homẹ towe na hùn do avọ́ dódó tọn go, gọ́na avọ́ nunina mimẹ̀ po avọ́ nunina mimẹ̀ blebu po; Whenẹnu wẹ yé na yi oyìnsú lẹ do sánvọ́ to agbà towe ji.