PSALM 50 - BIBLU WIWE LỌ 1923

¹ JIWHEYẸWHE, yèdọ Jiwheyẹwhe OKLUNỌ, Ko dọhó, bo ylọ aigba sọn whèzẹtẹn kaka jẹ họyìyì etọn.

² Sọn Ziọni, pipé whanpẹ tọn, Jiwheyẹwhe to hinhọ́n ta.

³ Jiwheyẹwhe mítọn ja, é ma abọẹ na nọ: Miyọn na to jiji to nukọn etọn, Jẹhọn sinsinyẹn nasọ to yìnyìn; lédo e.

⁴ E na jlẹgbè hlan olọn lẹ sọn aga, Podọ hlan aigba, na é nido dawhẹ omẹ etọn lẹ tọn.

⁵ Bẹ́ mẹwiwe ṣie lẹ plidopọ do dẽ, Yé he ko basi alẹnu de hẹ mi lẹ.

⁶ Olọn lẹ na dọhó dódó etọn tọn, Na Jiwheyẹwhe lọsu wẹ whẹ̀datọ. Selah.

⁷ Mì sè, mì gbẹtọ ṣie lẹ emi, yẹn na dọhó: Islaeli È, yẹn na dowhẹ̀ we: Yẹn wẹ Jiwheyẹwhe, yèdọ Jiwheyẹwhe towe.

⁸ Yẹn ma na wọhẹ we na avọ́ towe wutu, Podọ avọ́ nunina mimẹ̀ towe tin to nukọn ṣie to whepoponu.

⁹ Yẹn ma to oyìnsú na yí sọn owhé towe gbè, Kavi gbọgbọẹ sọn opá kanlin towe tọn mẹ.

¹⁰ Na ṣie wẹ kanlin he tin to ozùn mẹ lẹpo, Gbékanlin he tin to fọtónfọtón osé lẹ tọn ji.

¹¹ Yẹn yón ohẹ́ osé daho ji tọn lẹ: Ṣie wẹ nutẹgbẹ gbémẹ tọn lẹ.

¹² Eyín hùvé hù mi, yẹn ma na dọ na we gba: Na ṣie wẹ òwẹkẹ lọ, po onú he gó e mẹ lẹ po.

¹³ Yẹn na dù oyìnlan wẹ, Kavi yẹn nọ nù ohùn gbọgbọẹ tọn?

¹⁴ Sánvó opẹ́ tọn hlan Jiwheyẹwhe; Bo sọ depà towe hlan Gigogán:

¹⁵ Bo dawhá ylọ mi tò nukunbibia whenu: Yẹn na whlẹn we, hiẹ nasọ pagigona mi.

¹⁶ Ṣigba Jiwheyẹwhe dọ hlan mẹylankan, dọ, Etẹ hiẹ tindo nado wà nado nọ dọhó oséndoai ṣie tọn, Podọ na hiẹ bo ko yí alẹnu ṣie hẹn to onù towe mẹ?

¹⁷ Na mimọ hiẹ gbẹwanna mẹplọnlọ, Bo sọ lẹ́godosọ ohó ṣie.

¹⁸ Whenuena hiẹ mọ ajotọ, whenẹnu wẹ hiẹ yígòna hẹ ẹ, Hiẹ sọ basi máhẹtọ hẹ ayòdetọ le

¹⁹ Hiẹ yí onù towe na ylankan, Odẹ́ towe sọ nọ ṣẹ̀ oklọ.

²⁰ Hiẹ sinai bo to mẹgodohódọ do mẹmẹsunnu towe go: Hiẹ sọ to oyín ovi onọ towe tọn hẹngble.

²¹ Onú helẹ̃ wẹ hiẹ wà, bọ yẹn nabọẹ; Hiẹ sọ lẹn dọ yẹn tlẹ taidi hiẹ lọsu: Yẹn na wọhẹ we, yẹn nasọ hia yé hajihaji to nukun towe mẹ.

²² Mì lẹn ehe, mì he wọn Jiwheyẹwhe emi, Na yẹn nikã dón mì tlẹn, matin whlẹngan tọ.

²³ Mẹdepope he sánvọ́ pipa tọn é pagigona mi: Podọ hlan ewọ he hẹn owalọ etọn gbọn ali titegbe wẹ Yẹn na do whlẹngan Jiwheyẹwhe tọn hia.