PSALM 49 - BIBLU WIWE LỌ 1923

¹ MÌ sè ehe, mì gbẹtọ lẹ emi; Mì dotó, mì okémẹnu emi:

² Mevó lẹ po ogán le po, Adọkunnọ po agbátọnọ lẹ po dopọ.

³ Onù ṣie na dọhó nuyọnẹn tọn; Ayihamẹlẹnpón ayiha ṣie tọn na yín zìnzìn tọn.

⁴ Yẹn na hùn otó ṣie hlan oló de: Yẹn nasọ hùn agọ̀gbè ṣie to ajalẹn ji.

⁵ Etẹwutu yẹn na hanú to oylan zángbè, Whenuena oylanwiwà yé he na yín mediọmẹ sielẹ tọn tò lédo mi pé?

⁶ Yé he dotudo akue yetọn go, Bo sọ to kikla na yéde to susugege adọkun yetọn lẹ tọn mẹ;

⁷ Mẹde ma tin he sọgan fli mẹmẹsunnu etọn gbọn nudepope mẹ, Mọ é ma sọgan na mẹflikuẹ Jiwheyẹwhe na ewọ gba:

⁸ (Na ofligò ayiha yetọn tọn akuẹgegenu wẹ, E mananọma yín jijodai kakadoi:)

⁹ Na ewọ nido tin to ogbẹ̀ whepoponu, Bọ é ma nado mọ odẹ̀ lọ.

¹⁰ Na é mimọ dọ gbẹtọ nuyonẹntọ to kuku, Mọkedẹ wẹ nulunọ po gbẹtọ kanlinyihanọ lẹpopo to dindòn do, Bo to akuẹ yetọn jodo na medẽvo lẹ.

¹¹ Linlẹn ohò yetọn mẹ tọn wẹ, dọ owhé yetọn ni nọte kakadoi, Podọ aisintẹn yetọn ni tin jẹ whẹndo lẹpo mẹ; Yé nọ doyin yetọn na aigba yetọn.

¹² Ṣigba gbẹtọ ma nọte dẹn to yẹyi mẹ, gba; E taidi kanlin he dọ̀n.

¹³ Ali yetọn he wẹ ogúgú yetọn; Gãnṣo ohó yetọn yón to akò yetọn lẹ nukunmẹ. Selah.

¹⁴ Di lẹngbọpa de wẹ yè tò yé dè na kútòmẹ; Okú na yín lẹngbọhọtọyetọn: Tẹnọglinọ lẹ wẹ na dùgán do yé ji to afọnnu lọ mẹ: Agbasa yetọn na tin na kútòme nado dùsudo, bọ onọten de ma nado tin nẹ̃.

¹⁵ Ṣigba Jiwheyẹwhe na fli ayiha ṣie sọn alọ kútomẹ tọn si: Na ewọ na yí mi. Selah.

¹⁶ A hanú whenuena mẹde wàdọkun blo, Whenuena gigo owhé etọn gbè tọn to susudeji;

¹⁷ Na whenuena é kú, é ma núde na bẹ yì: Gigo etọn ma na jẹte hodo e.

¹⁸ Le é tlẹ nọ dona alindọn etọn sọ whenuena ewọ togbẹ̀, bọ Gbẹtọ na to pipa we, whenuena hiẹ to dagbewà hlan dewe;

¹⁹ Ewọ na yì whẹndo otọ etọn lẹ tọn de; Yé ma na mọ hinhọ́n gbède.

²⁰ Gbẹtọ he tin to yẹyi mẹ, bo ma zìn, Tin taidi kanlìn he dọ̀n.