PSALM 45 - BIBLU WIWE LỌ 1923

¹ AYIHA ṣie to aṣava owhé tọn de kàn; Yẹn dọhó onú lẹ tọn he yẹn ko basi gbọn ahọlu tọn dali: Odó ṣie wẹ wékantin wékantọ alọyatọ de tọn.

² Hiẹ yọ́n whanpẹ hú ovi gbẹtọ tọn lẹ: yè kọ̀n ojọmiọn do nùflo towe ji: Enẹwutu wẹ Jiwheyẹwhe to didona we kakadoi.

³ Bla ohi towe do alinkan towe, hiẹ asuka, Yèdọ gigo towe po gigodaho towe po

⁴ Podọ to gigodaho towe mẹ to sọhẹ jijọho zọnmì, Na nugbo, wàlọmimiọn po dódó po tọn wutu; Adusilọ towe nasọ plọ́n onú dobu we.

⁵ Dida wẹ ogá towe; Gbẹtọ lẹ jai to oglọ towe; Yé tin to otù ahọlu kento lẹ tọn mẹ.

⁶ Jiwheyẹwhe E, kakadoi wẹ ofìn towe: Ogánpo ahọludu towe tọn ogánpò dódó tọn wẹ.

⁷ Hiẹ yiwanna dódó, bo sọ gbẹwanna oylanwiwà; Enẹwutu wẹ Jiwheyẹwhe, yèdọ Jiwheyẹwhe towe, Ko yí amì homẹhùn tọn sá na we hú ogbẹ́ towe lẹ tọn.

⁸ Avò towe lẹpo to wande na nuwhẹnkun, alọsi, po kasia po; Ajalẹn hẹn we yín homehùnnọ sọn awá ajlakudu tọn lẹ mẹ.

⁹ Ahọviyọnnu lẹ tin to yọnnu yeyinọ towe lẹ mẹ: To adusilọ towe mẹ wẹ ahọsi nẹ ṣite te to sika Ofa tọn mẹ.

¹⁰ Sè, hiẹ viyọnnu, lennu, sọ dotó towe ai; Wọn omẹ towe titi lẹ, po owhé otọ́ towe tọn po;

¹¹ Mọ ahọlu na yiwanna whanpẹ towe: Na ewọ wẹ OKLUNỌ towe; na hiẹ ni sọ nọ sẹ̀n ẹn.

¹² Viyọnnu Tile tọn na wá finẹ po nunina po; Adọkunnọ lẹ to gbẹtọ lẹ mẹ na nọ vẹ̀vẹ̀ na nukundagbe towe.

¹³ Gigo me wẹ viyọnnu ahọlu tọn te to whégbè; Yè yí sika do wàsia do avọ̀ eton mẹ.

¹⁴ To avọ́ asiá wunmẹwunmẹnọ mẹ wẹ yè na hẹn ẹn wá ahọlu de; Awhli ogbẹ́ etọn he to hihodo e lẹ wẹ Yè na plan wá de we.

¹⁵ Homẹhùnhùn po ayajijẹ po wẹ yè na do hẹn yé wa; Yé nasọ biọ awá ahọlu tọn mẹ.

¹⁶ To otẹn otọ́ towe lẹ tọn mẹ wẹ ovi towe le na nọ̀, Mẹhe hiẹ na nọ yí do dogán do aigba lẹpo ji.

¹⁷ Yẹn na hẹn oyín towe nado yín finflin to whẹndo lẹpo mẹ; Enẹwutu wẹ gbẹtọ lẹ na nọ to pipa we kakadoidoi.