PSALM 44 - BIBLU WIWE LỌ 1923

¹ JIWHEYẸWHE È, míwlẹ ko yí otó mítọn do sè, otọ́ mítọn lẹ ko dọ na mí, Na azọ́n daho he hiẹ wà to owhè yetọn nu, to hóhówhenu.

² Hiẹ yí alọ towe do yàn kosi lẹ tón, bo sọ dó yé. Hiẹ bìanukunna gbẹtọ ewẹ lẹ, bo sọ tùn yé hlan.

³ Na yé ma yí aigba lọ gbọn ohi yélọsu tọn dali, Mọ é ma yín awà yetọn wẹ whlẹn yé gba; Adavo adusilọ towe, po awà towe po, po hinhọ́n nukun towe mẹ tọn po, Na hiẹ tindo nukundagbe do yé go wutu.

⁴ Hiẹ wẹ Ahọlu ṣie, Jiwheyẹwhe E: Degbè whlẹngan tọn na Jakobu.

⁵ To alọ towe mẹ wẹ mí na sisẹ́ kẹ̀ntọ mítọn lẹ liai: To oyín towe mẹ wẹ mí na tùnafọ yé he fọ́n do mi ji lẹ ji,

⁶ Na yẹn ma na dotudo ogá ṣie go, Mọ ohi ṣie ma na whlẹn mi.

⁷ Ṣigba hiẹ wẹ ko whlẹn mí sọn kẹ̀ntọ mítọn lẹ si, Hiẹ ko sọ dowinyan yé he gbẹwanna mí lẹ.

⁸ To Jiwheyẹwhe mẹ wẹ míwlẹ ko to awagundo te to azán popo gbè, Mí nasọ nọ pa oyín towe kakadoi. Selah.

⁹ Ṣigba hiẹ ko tùn hlan, hiẹ sọ dowinyan mí; Hiẹ ma sọ tón hodo awhànpa mítọn lẹ.

¹⁰ Hiẹ hẹn mí lẹ́godo na kẹ̀ntọ mítọn lẹ: Yé he gbẹwanna mí lẹ sọ dùgbanna na yéde.

¹¹ Hiẹ ko yí mí na dùdù di lẹngbọ; Hiẹ sọ gbà mí kija to kosi lẹ mẹ.

¹² Hiẹ sà omẹ towe lẹ pọṣọnu, Hiẹ ma sọ yí akuẹ yetọn do hẹn adọkunnu towe jideji.

¹³ Hiẹ hẹn mí zùn ovlẹ hlan kọmẹnu mítọn lẹ, mẹṣanko podọ aṣagbọnu hlan omẹ he lẹdo mí lẹ.

¹⁴ Hiẹ yí mí do basi hodọnu to kosi lẹ ṣẹnsẹn, Podọ mimínmìmín ota tọn to gbẹtọ lẹ ṣẹnsẹn.

¹⁵ Yẹyimado ṣie tin to nukọn ṣie to azán popo gbè, Winyan ṣie sọ ṣinyọn oji e,

¹⁶ Na ogbẹ̀ ewọ he to vivlẹ bo sọ to nùzan tọn wutú; Gbọn kẹ̀ntọ po ahọsuyitọ po tọn dali.

¹⁷ Ehelẹ pó wẹ jọ do mí go; gãnṣo míwlẹ ma wọnji ogo we, Mọ míwlẹ ma wàyẹ to alẹ̀nu towe mẹ.

¹⁸ Otù mítọn ma sẹ́ do godo, Mọ zọnlin mítọn ma sọ sẹ́ sọn ali towe ji;

¹⁹ Na hiẹ do ko gbidi mí to fie ohla lẹ te, Bo sọ yí zinvlu góngón ṣinyọn mí ji

²⁰ Eyín míwlẹ sọ wọnji oyín Jiwheyẹwhe mítọn tọn go, Kavi eyín mí dlẹn alọ mítọn hlan yẹwhe ojonọ de;

²¹ Be Jiwheyẹwhe ma na din ehe mọ E yón onú bibè ayiha tọn.

²² Nugbo, na towe wutu wẹ yè to mí hù to azán popo gbè; Yè to mí len di lẹngbọ na hùhù.

²³ Fọ́n, etẹwutu hiẹ to amlọndọ, OKLUNỌ È? Tite, a sisẹ́ mí sẹ́ kakadoi blo.

²⁴ Etẹ wẹ jọ bọ hiẹ do yí nukun towe whlá, Bọ hiẹ sọ do wọnji nukunbibia mítọn po awusinyẹnnamẹ mítọn po go?

²⁵ Na yè dẹ́ ayiha mítọn do odọ̀ hlan kógudu mẹ: Hoto mítọn tédo aigba go.

²⁶ Tite na alọgọ mítọn, Bo sọ fli mí na dagbewanyi towe wutu.