PSALM 40 - BIBLU WIWE LỌ 1923

¹ YẸN yí homẹfifa do nọtepọ́n OKLUNỌ; E dotóai hlan mi, bo sọ sè yiylọ ṣie na alọgọ.

² É hẹn mi jẹage sọn odò vivà tọn, mẹ, sọn ogbòn mẹ; E yí afọ ṣie do awinyan ji; bo sọ hẹn zọnlin ṣie lódo.

³ É yí ohàn yọ́yọ́ de do onù ṣie mẹ, ohan pipa tọn hlan Jiwheyẹwhe mítọn: Mẹsusu na mọ ẹn, bo dibu, Bo nasọ dotudo OKLUNỌ go.

⁴ Donanọ wẹ sunnu lọ he yí OKLUNỌ do basi tudonu etọn, Bo ma sọ zé do saklanọ de, kavi yé he nọ lẹ́jẹ apadopo hlan lalo lẹ.

⁵ OKLUNỌ E Jiwheyẹwhe ṣie, susu wẹ azọ́n jawu he hiẹ ko wà, Po linlẹn towe po hlan míwlẹ dali: Yè ma sọgan hia yé hlan we kannukannu gba: Eyín yẹn na la; bo sọ dọhó yetọn, Yé hú onú hihia.

⁶ Avọ́ po ojinúlili po hiẹ ma jlo, Otọ́ lẹ wẹ hiẹ kùn na mi: Avọ nunina mimẹ̀ po avọ́ ylando tọn po hiẹ ma biọ.

⁷ Whenẹnu wẹ yẹn dọmọ, Dayi e go, yẹn wá: To apò owé tọn mẹ wẹ yè wlanwe ṣie dọ:

⁸ Homẹ ṣie hùn nado wà ojlo towe, Jiwheyẹwhe ṣie E: Nugbo, osẹ́n towe tin to yẹn homẹ dọn.

⁹ Yẹn ko dọyẹwheho dódó tọn to agùn dáho mẹ: Dayi e go, yẹn ma na do onù ṣie abọẹ, OKLUNỌ E, hiẹ yọnẹn.

¹⁰ Yẹn ma sọ yí dódó towe whlá to ayiha ṣie mẹ; Yẹn ko to ohó nugbo towe tọn po whlẹngan towe tọn po dọ: Yẹn ma sọ whlá dagbewanyi po nugbo towe po sọn agùn daho nẹ de gba.

¹¹ Hiẹ dọ̀n lẹblanu bibọ towe sọn dẽ blo, OKLUNỌ E: Na dagbewanyi towe po nugbo towe po ni nọ hla mi dai jeijei

¹² Na oylan madoyín lẹ́hla mi pé; Oylanwiwà ṣie wló mi, sọmọ bọ yẹn ma sọgán pọ́n aga; Yé sù hú odà otà ṣie tọn lẹ: Enẹwutu ayiha ṣie gbó mi dai.

¹³ Yín homẹhùnnọ, OKLUNỌ E, nado whlẹn mi OKLUNỌ E, yawu bo gọalọna mi

¹⁴ Winyan ni hù yé, yé ni nọpọ flu, Yé he to ayiha ṣie din na fẹ́ dlangbé lẹ; Gbọ yé ni diọkọ, bo sọ jẹflu Yéhe to oylan jlo na mi lẹ.

¹⁵ Yé ni zùn ovọ́ na winyan yetọn wutu, Yéhe to didọ hlan mi, dọ, Ọ̃n, Ọ̃n.

¹⁶ Yé he to dindin we lẹpo ni jaya, homẹ yetọn ni sọ hùn to hiẹ mẹ: Na yé he yiwanna whlẹngan towe lẹ ni nọ dọ to whepoponu, Dọ, OKLUNỌ ni yín zizedaga.

¹⁷ Ṣigba oyanọ, agbátọnọ wẹ yẹn; Gãnṣo OKLUNỌ lẹnnu jẹ ogo e: Hiẹ wẹ alọgọtọ ṣie podọ whlẹngantọ ṣie; A dẹn kaka blo, Jiwheyẹwhe ṣie È.