PSALM 38 - BIBLU WIWE LỌ 1923

¹ OKLUNỌ È, a wọhẹ mi to adi towe mẹ blo, Mọ a sọ yí adanjijẹ zogbe towe do hò mi blo.

² Na ogá towe biọlànmẹ na mi whiwhi, alọ towe sọ jẹte do oji e:

³ Fie to gán gán de ma pò to agbasalan ṣie go na kàndudu towe wutu, Mọ gbọjẹ de ma sọ tin to ohú ṣie mẹ na ylando ṣie wutu.

⁴ Na oylanwiwà ṣie ṣinyọn ota na mi; di agbàn pinpẹn, é pẹ̀n hugán mi.

⁵ Alán ṣie to wánlun, E to yìnyòn na nulu ṣie wutu.

⁶ Yẹn gbán: ota ṣie dokọ̀dò susu; Yẹn to yìyì to awúbla mẹ to azán popo gbè.

⁷ Na adaja ṣie gọ́ na azọ̀n miyọnawu: Fie to gángán de ma tin to agbasalan ṣie go.

⁸ Yẹn daku, yè sọ fínyọn mi gbahúgbahú: Yẹn ko to gbigbo na winwẹn ayiha ṣie ton wutu.

⁹ OKLUNỌ, ojlo ṣie lẹpo tin to nukọn towe; Winwẹn ṣie ma sọ whlá sọn de we.

¹⁰ Ayiha ṣie to zínhò; huhlọn ṣie zùn madogánnọ: Yín eyín hinhọ́n nukun ṣie mẹ tọn wẹ é ma tin to ogo e.

¹¹ Mẹvivẹ po họntọn ṣie lẹ po ṣite to aganu sọn azọ̀nylankan ṣie mẹ; Mẹmẹ ṣie lẹ sọ ṣite to aganu boboe.

¹² Yé he to ayiha ṣie din lọ domò dai na mi ga: Yé he to awugble ṣie din lẹ to ohó hùsúdo tọn dọ, Bo sọ to oklọ yihakan to azán popo gbè.

¹³ Ṣigba yẹn, di tókunọ, yẹn ma sè; Podọ di unbọpẹn he ma kẹnu etọn.

¹⁴ Mọ yẹn taidi omẹ he ma setónu; Podọ onù mẹhetọn mẹ hódọnhẹmẹnọzo ma tin te.

¹⁵ Na hiẹ, OKLUNỌ È, wẹ yẹn nọtepọ́n: Hiẹ na siọ, OKLUNỌ E jiwheyẹwhe ṣie.

¹⁶ Na yẹn dọmọ, Na yé nika kò mi: Whenuena afọ ṣie didi, yé na to kikla do oji e.

¹⁷ Yẹn ko wleawu nado pòzòn; Awufiẹsa ṣie sọ tin to nukọn ṣie whepoponu

¹⁸ Na yẹn na yígbe oylanwiwà ṣie tọn; Yẹn na blawú na ylando ṣie.

¹⁹ Ṣigba kẹ̀ntọ ṣie lẹ nọgbè, agbasa yetọn sọ sinyẹn: Yé he gbẹwanna mi matin owhẹhó de lẹ to susu deji.

²⁰ Mẹhe to oylan yí do suahọ dagbe tọn lẹ wẹ mẹslẹtọ ṣie; Na yẹn to onú he yín dagbe hodo.

²¹ OKLUNỌ E, a gbé, mi dai blo: Jiwheyẹwhe ṣie E, a dẹ́n do mi blo.

²² Yawu nado gọalọna mi, OKLUNỌ È, whlẹngan ṣie.