PSALM 37 - BIBLU WIWE LỌ 1923

¹ A FIẸ na ylanwàtọ lẹ tọn wutu blo, Hiẹ sọ yín nuvẹunnọ do yé he nọ wàzón mawàdódó tọn lẹ go blo.

² Na yè na sán yé zindai zándevie di ogbé, Yé nasọ fiọ di omá mú.

³ Dotudo OKLUNỌ go, bo sọ nọ wà dagbe; Nọnò aigba lọ ji, bo sọ nọ doafọna nugbo.

⁴ Hẹn homẹ towe hùn susu to OKLUNỌ mẹ; Ewọ nasọ yí ovẹ́ ayiha towe mẹ tọn na we.

⁵ Jó ali towe do alọ OKLUNỌ tọn mẹ, Dotudo e go ga; ewọ nasọ basi i.

⁶ E nasọ dè dódó towe jẹgbonu di hinhọ́n, Podọ whẹ̀dida towe di okle owhè sá mẹ.

⁷ Yín abọẹnọ hlan OKLUNỌ, bo sọ yí homẹfifa do nọtepọ́n ẹn: A fiẹ do ewọ mẹhe nuyónna to ali etọn ji go blo, Kavi na dawe he to linlẹn ylankan hẹn di tọn wutu.

⁸ Gbọ sọn homẹgble go, bo sọ jo adanjijẹ zogbe dai: A fiẹ blo, na oylan dodo wẹ opòdo etọn wutu.

⁹ Na yè na sán ylanwàtọ lẹ sẹ́: Ṣigba yé he nọtepọ́n OKLUNỌ lẹ wẹ na dugú aigba tọn.

¹⁰ Na whenu pẹde, mẹylankan lọ ma na tin ba: Nugbo, hiẹ na yí sọwhiwhe do lẹn otẹn etọn pọ́n, é ma nasọ tin.

¹¹ Ṣigba homẹmiọnnọ lẹ na dugú aigba tọn; Yé na hẹnhomẹhùn yéde to jijọho susu mẹ.

¹² Mẹylankan núbla do dódónọ go, Bo sọ adukúnkúndù do ogo nẹ̃.

¹³ OKLUNỌ na kò e; Na é mọ dọ azán etọn ja.

¹⁴ Mẹylankan lẹ ko dọ̀n ohi sún, bo sọ dọ̀n ogaba yetọn sinyẹn, Nado zé oyanọ po agbátọnọ lẹ po liai, Podọ nado hù yé he to zọnlinzìn to ali jijlọ ji lẹ.

¹⁵ Ohi yetọn na biọ otùkàn yélọsu tọn mẹ, Ogába yetọn nasọ wẹ́n.

¹⁶ Onú vude he dódónọ tindo, E pẹ́nte hú adọkun gégé mẹylankan tọn.

¹⁷ Na yè na wẹ́n awà mẹylankan lọ tọn; Ṣigba OKLUNỌ hẹn dódónọ lẹ go.

¹⁸ OKLUNỌ yọ́n azán mẹpipé lẹ tọn: Ogú-yigba yetọn nasọ tin kakadoi.

¹⁹ Winyan ma yé na hù to oylan whenu: Podọ to huvẹzángbè yè na pókọ̀na yé

²⁰ Ṣigba mẹylankan lẹ na dọ̀n; Kẹntọ OKLUNỌ tọn lẹ na di whanpẹ ogbé mú tọn: Yé na fiọ; azọ̀ mẹ yé na fiọ do

²¹ Mẹylankan nọ yàn, é ma sọ gọ̀wá sú: Ṣigba dódónọ nọ wàlẹblanu, bo sọ nọ nanúmẹ.

²² Na mẹdonanọ etọn lẹ wẹ na dugú aigba tọn, Mẹhodedo etọn lẹ wẹ yè na sán sẹ̀.

²³ Yè hẹn afọli sunnu de tọn lódo sọn OKLUNỌ de: E sọ basi homẹvivi do ali etọn go.

²⁴ Eyín é tlẹ jai, yè ma na takìti nẹ̃ dlan gba: Na OKLUNỌ yí alọ etọn do hẹn e go.

²⁵ Yẹn ko tin to yọ̀pọ, yẹn sọ whén; Gãnṣo yẹn ma ko mọ yè gbé dódónọ dai, Kavi okún etọn ni to núdùdù biọ.

²⁶ Lẹblanunọ wẹ ewọ to azán popo gbè, é nọ yànnamẹ; Yè sọ nọ dona okún etọn.

²⁷ Tọ́n sọn oylan mẹ bo nọ wà dagbe; Bo sọ nọnọ̀ kakadoidoi.

²⁸ Na OKLUNỌ yiwanna whẹ̀dida, Bo ma sọ nọ gbẹ́ mẹwiwe etọn lẹ dai; Yè na nọ yí yé whlá kakadoi: Ṣigba okún mẹylankan tọn lẹ wẹ yè na sán sẹ̀.

²⁹ Dódónọ wẹ na dugú aigba tọn, Bo nasọ nọnọ̀ e mẹ kakadoi.

³⁰ Onù dódónọ tọn nọ dọhó nuyọnẹn tọn, Odẹ́ etọn sọ nọ dọhó whẹ̀dida tọn.

³¹ Osẹ́n Jiwheyẹwhe etọn tọn tin to ayiha etọn mẹ; zọnlin etọn ma na tlẹ.

³² Mẹylankan to dódónọ họ́, Bo sọ nọ to ali din nado hù ì.

³³ OKLUNỌ ma na jo e do alọ etọn mẹ, Kavi whenuena yè to whẹda nẹ̃, E ma to owhẹ̀ na gbledo e gba.

³⁴ Nọtepọ́n OKLUNỌ, bo sọ to ali etọn yìn, E nasọ zé we daga nado dugú aigba tọn: Whenuena yè sán mẹylankan lẹ sẹ́, hiẹ na mọ ẹn.

³⁵ Yẹn ko nọ mọ mẹylankan yín núsisi, E vlọn ede di atin mú to ayitẹn etọn mẹ.

³⁶ Ṣigba mẹde jugbọn finẹ dali, dayi e go, é ma tin ba: Mọwẹ, yẹn din i pé, aigba yè ma sọgan mọ ẹn.

³⁷ Dayi mẹpipé go, bo sọ payi tenọgliglinọ go: Ale de tin hlan dawe jijọho tọn.

³⁸ Ṣigba tasinẹntọ lẹ wẹ yè na súdo: Yè nasọ sán ale mẹylankan lẹ tọn sẹ̀.

³⁹ Ṣigba alọ OKLUNỌ tọn mẹ wẹ whlẹngan dódónọ lọ tọn sọn: Ewọ wẹ figángán yetọn to nukunbibia whenu.

⁴⁰ OKLUNỌ nọ gọalona yé, é nọ whlẹn yé: È sọ nọ dè yé sọn mẹylankan si, é nọ whlẹn yé gán, Na yé din fibẹ̀tado to ewọ mẹ wutu.