PSALM 34 - BIBLU WIWE LỌ 1923

Ohàn Davidi tọn whenuena é diọun na ede to Abimẹleki nukọn; mẹhe yàn ẹn, bo ewọ sọ fọ́nyi.

¹ YẸN na nọ dona OKLUNỌ whepoponu; Pipa etọn nasọ tin to onù ṣie mẹ to whepoponu.

² Ayiha ṣie na nọ doawagun to OKLUNỌ mẹ: Whiwhẹnọ lọ na sè, homẹ yetọn nasọ hùn.

³ Mì zé OKLUNỌ daga hẹ mi, Na mí ni nọpọ hẹn oyín etọn klo.

⁴ Yẹn din OKLUNỌ, E siọ mi, Bo sọ dè mi sọn núhiha ṣie lẹpo mẹ

⁵ Yé pọn ẹn, hinhọ́n sọ họ́n do yé ji: Nukunmẹ yetọn ma na yín flusọ

⁶ Dawe oyanọ he dawhá ylọ ẹ, OKLUNỌ segbè etọn, Bo sọ whlẹn ẹn sọn tukla etọn lẹpo mẹ.

⁷ Angẹli OKLUNỌ tọn lẹ́do yé he dibusi i lẹ pé, Bo sọ whlẹn yé.

⁸ Dọ́ ẹ pọ́n, bo sọ mọ dọ yinyọ́n wẹ OKLUNỌ: Donanọ wẹ sunnu nẹ he din fibẹ̀tado to ewọ mẹ.

⁹ Mì dibusi OKLUNỌ, mì mẹwiwe etọn emi: Na agbágbigbọ de ma tin hlan yé he dibusi i lẹ gba.

¹⁰ Kinnikinnivú lẹ nọ gbọ̀agba: huvẹ́ sọ nọ hù yé: Ṣigba yé he to OKLUNỌ din lẹ mana nọmatindo onú he yọ́n.

¹¹ Wá, mì yọ̀pọ emi, na otó mi, Yẹn na plọ́n osi OKLUNỌ tọn mì.

¹² Dawe tẹwẹ jlo ogbẹ̀, Bo sọ yiwanna azán gà, na ewọ nido to dagbe mọ?

¹³ Dè odẹ́ towe sọn danu mẹ; Podọ nùflo towe sọn oklọdidọ mẹ.

¹⁴ Tọ́n sọn danu mẹ, bo nọ wà dagbe; Nọ din jijọho, bo sọ nọ doafọ nẹ̃

¹⁵ Nukun OKLUNỌ tọn tin hlan dódónọ lẹ dali, Otọ́ etọn sọ hun hlan ogbè yetọn.

¹⁶ Nukun OKLUNỌ tọn sinyẹn do yé he to oylan wà lẹ go, Nado sán oflin yetọn sọn aigba ji.

¹⁷ Dódónọ lẹ to awhádo, OKLUNỌ sè, Bo sọ dè yé sọn tukla yetọn lẹpo mẹ.

¹⁸ OKLUNỌ sẹpọ́ yé he yín ayiha gbigbanọ de tọn lẹ, Bo sọ whlẹn yé he yín ayiha finfinọnnọ lẹ gán.

¹⁹ Susu wẹ nukunbibia dódónọ tọn; Ṣigba OKLUNỌ dè e sọn popo mẹ.

²⁰ E yí ohú etọn lẹpo whlá: Dopo ma sọ gbà to yé mẹ.

²¹ Oylan wẹ na hù mẹylankan: Yé he gbẹwanna dódónọ na ylanwhè.

²² OKLUNỌ flí ayiha devi etọn lẹ tọn: Dopo sọn yé he din fibẹ̀tado to e mẹ lẹ mẹ ma na ylanwhẹ̀ gba.