PSALM 33 - BIBLU WIWE LỌ 1923

¹ MÌ yí ayajijẹ do jihàn to OKLUNỌ mẹ, mì dódónọ emi: Pipa jẹ na tenọglinọ lẹ.

² Mì yí ajalẹn do pa OKLUNỌ, Mì yí asiazọ́n hànjinu okàn aonọ do jihàn hlan ẹn.

³ Mì jihàn yọ́yọ́ de hlan ẹn: Bo sọ yí nuyọnẹn do zín hànjinu okànnọ po awhá lélé po.

⁴ Na ohó OKLUNỌ tọn jlọ; Azọ́n etọn lẹpo wẹ yè wà to nugbo mẹ.

⁵ E yiwanna nugbo po whẹ̀dida po: Aigba sọ gọ́ na dagbewanyi OKLUNỌ tọn.

⁶ Gbọn ohó OKLUNỌ tọn dali wẹ yè da olọn lẹ; Podọ gbọn gbigbọ onù etọn mẹ tọn dali wẹ yè da awhàn yetọn lẹpo.

⁷ É dọ̀n ohusìn pli do ofi dopo di okiti: E tò dògbo lẹ pli do agbànhọ̀ mẹ.

⁸ Na aihọn lẹpo ni dibusi OKLUNỌ: Na okẹ́mẹnu lẹpo ni tin to obu mẹ nẹ̃.

⁹ Na é dọhó, é sọ yín wiwà; E degbè, é sọ nọte gligli.

¹⁰ OKLUNỌ hẹn ohónamẹ kosi lọ tọn zùn ovọ́, É sọ hẹn ayihalinlẹn gbẹtọ lẹ tọn hòsọ́.

¹¹ Ohónamẹ OKLUNỌ tọn nọte gligli kakadoi; Linlẹn ayiha etọn mẹ tọn jẹ whẹndo lẹpo mẹ.

¹² Donanọ wẹ akọta lọ, Jiwheyẹwhe mẹhetọn OKLUNỌ yín; Podọ gbẹtọ he é ṣinyan do basi ogú etọn titi.

¹³ OKLUNỌ pọ́n sọn olọn mẹ Bo mọ ovi gbẹtọ tọn lẹpo;

¹⁴ Sọn aisintẹn etọn é bọnukun Do okémẹnu lẹpo go.

¹⁵ Ewọ he basi ayiha yetọn lẹpo; He sọ dayi azọ́n yetọn lẹpo go.

¹⁶ Ahọlu de ma tin he yè yí awhanpa susu de do whlẹngan: Adantọ de ma sọ tin he yè yi huhlọn daho do whlẹngan.

¹⁷ Nuvọ́ wẹ oṣo na whlẹngan: Mọ é ma na yí huhlọn daho etọn do whlẹn mẹdepope gán.

¹⁸ Dayi e go, nukun OKLUNỌ tọn tin to yé he dibusi i lẹ go, To yé he to tódo to dagbewanyi etọn mẹ lẹ;

¹⁹ Nado dè ayiha yetọn sọn okú si, Podọ nado whlẹn yé dogbẹ̀ to huvẹ́ whenu.

²⁰ Ayiha mítọn ko nọtepọ́n OKLUNỌ: Ewọ wẹ alọgọ mítọn po awọ̀yínú mítọn po.

²¹ Na ayiha mítọn na jaya gbọn dali etọn, Na míwlẹ ko dotudo oyín wiwe etọn go.

²² Gbọ dagbewanyi towe, OKLUNỌ È, Ni tin to mí go, kedẹdile miwlẹ ko tódo we do.