PSALM 31 - BIBLU WIWE LỌ 1923

¹ OKLUNỌ È, hiẹ go wẹ yẹn sọ otù ṣie do, a dike winyan hù mi gbède blo: Whlẹn mi dódó towe mẹ.

² Dotó towe ai hlan mi; whlẹn mi niyaniya: Na a ni sọ yín awinyan huhlọn ṣie tọn, ohọ̀ figángán tọn nado whlẹn mi gán.

³ Na hiẹ wẹ awinyan ṣie, ofigángán ṣie; Enẹwutu na oyin towe tọn wutu, whlẹn mi jẹ odò, bo sọ yín alihiamẹtọ ṣie.

⁴ Dè mi sọn odọ̀ he tá do nuglọ na mi mẹ: Na hiẹ wẹ gingántẹn ṣie.

⁵ Alọ towe mẹ wẹ yẹn yí gbigbọ ṣie do: Hiẹ wẹ fli mi dai, OKLUNỌ E, Jiwheyẹwhe nugbo tọn.

⁶ Yẹn ko gbẹwanna yé he payi lalo vọnu go lẹ: Ṣigba yẹn dotudo OKLUNỌ go.

⁷ Yẹn na yín homẹhùnnọ bo sọ jaya to dagbewanyi towe mẹ: Na hiẹ ko lẹn magbọjẹ ṣie pọ́n; Bo sọ yọ́n ayiha ṣie to nukunbibia mẹ;

⁸ Hiẹ ma sú mi do alọ kẹ̀ntọ ṣie nẹ tọn mẹ gba: Hiẹ yí afọ ṣie dai to otẹn gbigblo de mẹ.

⁹ Wàlẹblanuna mi, OKLUNỌ E, na yẹn tin to tukla mẹ: Nukun ṣie sọ gblekàn na adì: hugbo, ayiha ṣie po homẹ ṣie pó.

¹⁰ Yẹn yí adi do zán ogbẹ̀ ṣie vọ́, owhè ṣie po hunwinwẹn po: Huhlọn ṣie lẹzun madogánnọ na ylanwiwà ṣie tọn wutu, ohu ṣie lẹ gblekàn.

¹¹ Na kentọ ṣie lẹpo tọn wutu yẹn lẹzun mẹkiko, Nugbo, hlan kọmẹnu ṣie lẹ gbahúgbahú: Yẹn lẹzun núsisi to mẹyinyọnẹn ṣie lẹ de: Yé he mọ mi to gbonu lẹ sọ to hinhọ́n sọn dẽ.

¹² Yẹn zùn mẹwinwọn sọn oflin gbẹtọ lẹ tọn me di osiọ: Yẹn sọ di ozẹ́n gbigbà.

¹³ Mọ yẹn ko sè ovlẹ omẹ susu tọn: Obu tin to awà popo ji: Whenuena yé to núbla do ogo e, Yé lẹn na yí gbigbọ ṣie sè.

¹⁴ Ṣigba yẹn dotudo ogo we, OKLUNỌ E: Yẹn dọ, Hiẹ we Jiwheyẹwhe ṣie.

¹⁵ Ojlẹ ṣie tin to alọ towe mẹ: Yí mi sọn alọ kẹ̀ntọ ṣie lẹ tọn mẹ; podọ sọn yé he to homẹkẹndo mi lẹ si.

¹⁶ Basi na nukun towe ni hùn do devi towe go: Whlẹn mi to dagbewanyi towe mẹ.

¹⁷ A dike winyan hù mi blo, OKLUNỌ È: na yẹn ko to awhádo ylọ we: Mẹylankan lẹ wẹ winyan ni hù, bo gbọ ye ni yín abọẹnọ to kútòmẹ.

¹⁸ Nùflo lalo tọn wẹ ye ni hẹn nabọẹ; He yí tasinẹn do to hódọ do dódónọ go lẹ, Po sakla po po ovlẹ po.

¹⁹ Na dagbe towe ka klo do le, he hiẹ sọ whlá na yé he dibusi we lẹ; Dagbe he hiẹ basi na yé he dotudo ogo we, to nukọn ovi gbẹtọ lẹ tọn

²⁰ Hiẹ na sọ whlá yé do whiwhlátẹn nukọn towe tọn sọn núbibla gbẹtọ lẹ tọn mẹ: Hiẹ na sọ yé whlá to nuglọ do afìnhò de mẹ sọn avùn odẹ̀ lẹ tọn mẹ.

²¹ Donanọ wẹ OKLUNỌ: Na é ko yí dagbewanyi etọn he jawu hia mi to otòdaho dòkọnọ mẹ.

²² Na yẹn ko dọ to whlẹndo ṣie mẹ, dọ, Yè sán mi sè sọn nukọn towe; Ṣigba hiẹ sè ogbè ovẹ̀ ṣie tọn, whenuena yẹn dawhá ylọ we.

²³ Mì yiwanna OKLUNỌ, mì mẹwiwe etọn emi: OKLUNỌ yí yisenọ lẹ whlá; bo sọ súahọ goyitọ lẹ susugegé.

²⁴ Mì yín huhlọnnọ bo gbọ ayibọ mítọn ni dèji, Mì he dotódido to OKLUNỌ mẹ lẹpo.