PSALM 25 - BIBLU WIWE LỌ 1923

¹ HIẸ, OKLUNỌ È, wẹ yẹn zé ayiha ṣie do aga hlan.

² Jiwheyẹwhe ṣie È, yẹn dotudo ogo we: A dike winyan hù mi blo, A sọ dike kẹ̀ntọ ṣie lẹ kò mi blo.

³ Nugbo, winyan ma na hù mẹdepope he nọtepọ́n we gba: Yé he wàblu yaya lẹ wẹ winyan na hù.

⁴ Hẹn mi yón ali towe, OKLUNỌ È: Plọ́n mọji towe mi.

⁵ Do mi gbọn ali nugbo towe ji, bo sọ plọ́n mi: Na hiẹ wẹ Jiwheyẹwhe whlẹngan ṣie tọn; Hiẹ wẹ yẹn nọtepọ́n to azán popo gbè.

⁶ OKLUNỌ E, flin lẹblanu bibọ po dagbewanyi towe po; Na ye ko tin sọn madopodo.

⁷ A sọ flin ylando yọ̀pọ whenu ṣie tọn lẹ blo, kavi tasinẹn ṣie lẹ: Kẹdẹdi dagbewanyi towe hiẹ ni flin mi, OKLUNỌ E, na dagbe towe wutu.

⁸ Yinyọ́n podọ tenọglinọ wẹ OKLUNỌ; Enẹwutu wẹ é na to ali lọ plọ́n ylandonọ lẹ.

⁹ Homẹmimiọnnọ wẹ é na do do ali ji to whẹ̀dida mẹ: Homẹmimiọnnọ wẹ é nasọ plọ́n ali étọn.

¹⁰ Omọji OKLUNỌ tọn lẹpo wẹ dagbewanyi po nugbo po Hlan mehe yi alẹ̀nu etọn po aṣẹdai etọn lẹ po hẹn.

¹¹ Na oyín towe wutu, OKLUNỌ E, Jo oylanwiwà ṣie na mi; na é klo wutu.

¹² Dawe tẹwẹ dibusi OKLUNỌ? Ewọ wẹ é na plọ́n ali he é na dè.

¹³ Ayiha etọn na sinai to dagbe mẹ; Okún etọn nasọ dugú aigba tọn.

¹⁴ Asli OKLUNỌ tọn tin to yé he dibusi i lẹ de; É nasọ hẹn yé yón alẹ̀nu etọn.

¹⁵ Nukun ṣie zé hlan OKLUNỌ dali whepoponu; Na é na dọ̀n afọ ṣie sọn odọ̀ lọ mẹ.

¹⁶ Lẹ́ pànnukọn mi, bo wàlẹblanuna mi; Na yẹn jẹvọ, nukun sọ do mi bia

¹⁷ Oya ayiha ṣie tọn zùn susu: Hẹn mi tọn sọn nukunbibia ṣie mẹ.

¹⁸ Pọ́n nukunbibia ṣie po tukla ṣie po; Na a ni sọ jo ylando ṣie lẹpo na mi.

¹⁹ Pọ́n kẹ̀ntọ ṣie lẹ, na yé gbahú; Yé sọ yí adingbàndido do gbẹwanna mi.

²⁰ Whlá ayiha ṣie, bo whlẹn mi: A dike winyan hù mi blo; Na yẹn sọ otù ṣie do ogo we.

²¹ Gbọ walọpipé po jijlọ po ni whlẹn mi gán; Na yẹn nọtepọ́n we.

²² Fli Islaeli sọn nukunbibia etọn lẹpo mẹ, Jiwheyẹwhe E.