PSALM 22 - BIBLU WIWE LỌ 1923

¹ JIWHEYẸWHE ṣie, Jiwheyẹwhe ṣie, etẹwutu hiẹ gbẹ́ mi dai? Etẹwutu hiẹ dẹ́n nado gọalọna mi, podọ do ogbẹ̀ hùnwinwẹn ṣie tọn.

² Jiwheyẹwhe ṣie, yẹn to awhádo to okle, ṣigba hiẹ ma gblọn; Podọ to ojlẹ ozán tọn mẹ, yẹn ma; sọmọ gbọjẹ.

³ Ṣigba wiwe wẹ hiẹ, Hiẹ he tindo pipa Islaeli tọn na ofìn.

⁴ Otọ́ mítọn lẹ dotudo ogo we: Yé dotudo ogo we, hiẹ sọ whlẹn yé.

⁵ Yé dawhá ylọ we, yè whlẹn yé: Yé dotudo ogo we, winyan ma sọ hù yé.

⁶ Ṣigba owán wẹ yẹn, é ma yín gbẹtọ: Ovlẹ gbẹtọ lẹ tọn, podọ mẹkiko gbẹtọ lẹ tọn.

⁷ Yé he mọ mi lẹpo to vivlẹ mi kò: Yé to nùflo yetọn dlẹn, bo to ota yetọn mimi, dọmọ,

⁸ Yí dewe do alọ OKLUNỌ tọn mẹ; gbọ ewọ ni whlẹn ẹn gán; Gbọ ewọ ni tutlu i jẹgbonu, mime homẹhùn in do e go.

⁹ Ṣigba hiẹ wẹ ewọ he de yẹn jẹgbonu sọn ohò onọ ṣie tọn mẹ: Hiẹ wẹ hẹn mi nado dotu, whenu ena yẹn tédo anọ onọ ṣie tọn go.

¹⁰ Hiẹ wẹ yè yí mi do alọ mẹ na sọn ohò onọ ṣie tọn mẹ: Hiẹ wẹ Jiwheyẹwhe ṣie sọn ohò onọ ṣie tọn mẹ.

¹¹ A dẹ́n do mi blo; na tukla sisẹpọ; Na alọgọnamẹtọ de ma tin.

¹² Oyìnsu sùsù lẹ́hla mi: Oyìnsú Baṣani tọn he dohuhlọn lẹ́hla mi pó.

¹³ Yé yi onù yetọn do họ̀ do ogo e, Di kinnikinni he to núdóntlẹn, bo sọ to lìlì.

¹⁴ Yè kón mi yìngbé di osìn, Ohú ṣie lẹ klán sọn yénọzo go: Ayiha ṣie sọ di odá; E yọ́ to adò ṣie mẹ.

¹⁵ Huhlọn ṣie hú di agán; Odẹ́ ṣie tédo alaka ṣie go; Hiẹ nasọ hẹn mi mlọnai to kógudu okú tọn mẹ.

¹⁶ Na avún lẹ lẹ́hla mi: Agùn mẹylankan lẹ tọn glọn mi do: Yé só alọ ṣie po afọ ṣie po.

¹⁷ Yẹn sọgan hia ohú ṣie lẹpo: Yé nupón, yé bọnukun do ogo e.

¹⁸ Yé má avọ́ ṣie to yéde ṣẹnsẹn, Bo sọ do ovò awù ṣie ji.

¹⁹ Ṣigba hiẹ dẹ́n do mi blo, OKLUNỌ E, Alọgọ ṣie, yawu bo gọalọna mi.

²⁰ Dè ayiha ṣie sọn ohi lọ si; Gbigbọ ṣie dopolọ sọn huhlọn avún lọ tọn mẹ.

²¹ Whlẹn mi sọn onù kinnikinni tọn mẹ: Mọwẹ hiẹ ko siọ mi sọn fie azò ogbóyìn lẹ tọn te.

²² Yẹn na dọhó oyín towe tọn hlan mẹmẹsunnu ṣie lẹ; To agùn mẹ wẹ yẹn na pa we te.

²³ Mì he dibusi OKLUNỌ emi, mì pa ẹ; Mì okún Jakobu tọn lẹpo, mì pagigo nẹ̃; Bo nọ dibusi i, mì okún Islaeli tọn emi.

²⁴ Na é ma vlẹ, mọ é ma gbẹwanna nukunbibia nukunbianọ lẹ tọn; Mọ é ma yí nukun etọn whlá sọn ego; Ṣigba whenuena é dawhá ylọ ẹ, é sè.

²⁵ Hiẹ de wẹ pipa ṣie sọn to agùn daho mẹ; Yẹn na depà ṣie to nukọn omẹ he dibusi i lẹ tọn.

²⁶ Homẹmimiọnnọ lẹ na dù, yè nasọ pekóna yé; Yé he to OKLUNỌ din lẹ nasọ pa ẹ: Gbọ ayiha mítọn ni tin togbẹ̀ kakadoi.

²⁷ Aihọn pòdo lẹpo na flin, yé nasọ lẹ́gọ̀ wá sù OKLUNỌ: Hẹnnu akọta lẹ tọn lẹpo nasọ litai to nukọn towe.

²⁸ Na ahọludu wẹ OKLUNỌ tọn, Ewọ wẹ otògán to akọta lẹpo mẹ.

²⁹ Yé he mọawu to aihọn mẹ lẹpo na dù bo sọ sẹ̀n: Yé he to tejẹ yì kógudu mẹ lọ na litai to nukọn etọn; Yèdọ ewọ he ma sọgan hẹn ayiha ede tọn do ogbẹ́.

³⁰ Okún de na sẹ̀n ẹn; Yè nasọ dọhó etọn gbọn OKLUNỌ dali na whẹndo he ja.

³¹ Yé na wá, bo na dọhó dódó etọn tọn Hlan akọta he yè na ji delẹ̃, dọ ewọ basi ehe.