PSALM 21 - BIBLU WIWE LỌ 1923

¹ AHỌLU na jaya to huhlọn towe mẹ, OKLUNỌ È; To whlẹngan towe mẹ, na é na jaya klo sọ?

² Hiẹ ko yí ojlo ayiha etọn mẹ tọn nẹ̃, Hiẹ ma sọ hẹn kanbiọ nùflo etọn mẹ tọn dote. Selah.

³ Na hiẹ yí dona dagbe tọn do pé e to aliho; Hiẹ sọ yí ojẹ́gbakun sika dagbedagbe tọn ṣinyọn ota nẹ̃.

⁴ E biọ ogbẹ gà to asi we, hiẹ sọ yí nẹ, Yèdọ azán gà kakadoi doi.

⁵ Gigo etọn klo to whlẹngan towe mẹ: Owhanpẹ po gigodaho po wẹ hiẹ yí do ogo nẹ̃.

⁶ Na hiẹ ko hẹn ọn zùn donanọ kakadoi; Hiẹ sọ yí homẹhùn do hẹn ẹn jaya sùsù to nukun towe mẹ.

⁷ Na ahọlu dotudo OKLUNỌ go wutu; Podọ to dagbewanyi Gigogán tọn mẹ ewọ ma otẹn na diọ.

⁸ Alọ towe na din kẹ̀ntọ towe lẹ mọ: Adusilọ towe nasọ din yé he gbẹwanna we lẹ mọ.

⁹ Hiẹ na basi yé di miyọnhọ to ojlẹ adi towe tọn mẹ: OKLUNỌ na zé yé mì homẹgble etọn mẹ Miyọn lọ nasọ fiọ yé.

¹⁰ Ovi yetọn lẹ wẹ hiẹ na súdo sọn aigba ji, Podọ okún yetọn sọn ovi gbẹtọ lọ tọn mẹ.

¹¹ Na yé to oylan lò do ogo we wutu: Yé sọ to danú he yé ma na sọgan basi lẹn.

¹² Na enẹwutu hiẹ na hẹn yé lẹ́godo, Hiẹ na wleawu ogakàn towe lẹ tọn dote nado pé yé.

¹³ Na hiẹ ni yín zizedaga, OKLUNỌ E, to huhlọn towe mẹ: Mọwẹ míwlẹ na to hànji bo sọ to huhlọn towe pa.