PSALM 2 - BIBLU WIWE LỌ 1923

¹ ETẸWUTU wẹ kosi lẹ to adanjẹ, Bọ gbẹtọ le do to ayihamẹlẹnpón na onú ovọ́?

² Ahọlu aigba tọn lẹ ṣite, Ogán lẹ sọ to núbìa do OKLUNỌ go, Podọ do mẹyiamisisadodè etọn go, dọ,

³ Mì gbọ mí ni wén ogàn yetọn gbidigbidi, Bo zé okàn yetọn dlangbé sọn mí dali.

⁴ Mẹhe sinai to olọn lẹ mẹ na kò yé: OKLUNỌ na yí yé do davle.

⁵ Whenẹnu wẹ é na dọhó hlan yé to homẹgble etọn mẹ, Bo nasọ dobuna ye to adanjijẹ zògbe etọn mẹ.

⁶ Mọ yẹn ko zé ahọlu ṣie Do Ziọni osé wiwe ṣie ji.

⁷ Yẹn na dọ oséndoai lọ: OKLUNỌ ko dọ hlan mi, dọmọ, Hiẹ wẹ Ovi ṣie; Egbé wẹ yẹn dè we tọ́n.

⁸ Biọ mi, yẹn nasọ yí kosi lẹ na we na ogú towe, Aigba pòdo lẹ na nútindo towe.

⁹ Opò ogàn tọn wẹ hiẹ na do gbà yé; Hiẹ nasọ lì yé pódọpọdọ di okò zẹnmẹtọ ton.

¹⁰ Enẹwutu nuyọnẹn ni pe mì dinvie, mì ahọlu emi; Na yè ni sọ plọ́n mì, mì whẹ̀datọ aigba tọn emi.

¹¹ Mì yi osi do sẹ̀n OKLUNỌ, Bo sọ jaya po sisọsisọ po.

¹² Yí nùdonùgo na Ovi lọ, é nika sadi, míwlẹ bo nasọ và to ali lọ ji, Whenuena homẹgble etọn fọ́ngu vude. Donanọ wẹ yé he din fibẹ̀tado to e mẹ lẹ.