PSALM 18 - BIBLU WIWE LỌ 1923

Ohàn Davidi devi OKLUNỌ tọn tọn, mẹhe dọhó ohàn he tọn hlan OKLUNỌ to azán he gbè, OKLUNỌ whlẹn ẹn sọn alọ kẹ̀ntọ lẹpo tọn ẹ, podọ sọn alọ Saulu tọn mẹ, dọmọ,

¹ YEN na yiwanna we, OKLUNỌ huhlọn ṣie.

² OKLUNỌ wẹ osé ṣie, figángán ṣie, whlẹngantọ ṣie, Jiwheyẹwhe ṣie, awinyan ṣie, yẹn na din fibẹ̀tado to e mẹ, Awóyínú ṣie, azò whlẹngan ṣie tọn, atọ̀họ he yìaga ṣie.

³ Yẹn na dawhá ylọ OKLUNỌ he jẹ nado nọ pa; Mọ yè nasọ whlẹn mi sọn kẹ̀ntọ ṣie lẹ si.

⁴ Okàn okú tọn lẹ́hla mi pé, Asisa hùsúdo tọn dobuna mi.

⁵ Okàn kútòmẹ tọn lẹ́hla mi pó; Omó okú tọn gboalina mi.

⁶ To nukunbibia ṣie mẹ yẹn ylọ OKLUNỌ na alọgọ, Bo sọ ylọ Jiwheyẹwhe ṣie na alọgọ; E segbè ṣie sọn tẹmpli etọn mẹ, Awhá ṣie to nukọn etọn sọ wá otọ́ etọn mẹ.

⁷ Whenẹnu wẹ aigba whàn, bo sọ sisọ; Odòdó osó lẹ tọn fọ́n, Bo sọ whàn, na é gblehomẹ wutu.

⁸ Azọ̀ tì sọn awọntinslo etọn mẹ jẹgbonu, Miyọn sọn onù etọn mẹ Sọ omẹ dù: Akán sọ to jiji na etọn wutu.

⁹ E dó olọn lẹ ga, bo sọ jẹte wá; Aslọ yū titli sọ tin to afọpáho etọn, mẹ.

¹⁰ E hẹ́ kelubi ji, bo sọ yí awuyiya do zlọn; Nugbo, é zlọn to awàfun jẹhọn tọn lẹ ji.

¹¹ E yí zinvlu do basi fiwhiwhlá etọn; Ogohò etọn he lẹ́hla ẹ wẹ osìn yú, po aslọ titli aga tọn lẹ po

¹² To hinhọ́n he tin to nukọn etọn kón, aslọ titli etọn juwayì, Kẹ́nsu po zokán po.

¹³ OKLUNỌ yẹ́nwan to olọn lẹ mẹ ga, Gigogán sọ dogbè etọn, Kẹ́nsu po zokán po.

¹⁴ Nugbo, é do ogá etọn hlan gbonu, bo sọ vúnvún yé pé; Abì etọn sùsù wẹ é do gbà yé kija.

¹⁵ Whenẹnu wẹ yè mọ owhín osìn tọn lẹ. Yè sọ hẹn dòdó aihọn tọn jẹmẹ́ To wiwọhẹmẹ towe mẹ, OKLUNỌ È, to finfin gbigbọ awọntinslo towe tọn mẹ.

¹⁶ É dewẹn hlan sọn aga, E yí mi, é sọ dọ̀n mi jẹgbonu sọn osin sùsù mẹ.

¹⁷ É sọ dè mì sọn kẹ̀ntọ sinsinyẹn ṣie si, Podọ sọn alọ yé he gbẹwanna mi lẹ tọn mẹ; Na yé hugán mi gbahú.

¹⁸ Yé gboalina mi to nukunbibia ṣie zángbè: Ṣigba OKLUNỌ wẹ yẹn zènmẹ.

¹⁹ È sọ dè mi jẹgbonu ga do otẹn gbigblo mẹ; E yí mi, na homẹ etọn hùn do ogo e wutu.

²⁰ OKLUNỌ sọ súahọ mi kẹdẹdi dódó ṣie; Kẹdẹdi wiwe alọ ṣie mẹ tọn wẹ é súahọ etọn mi.

²¹ Na yẹn ko to ayipado ali OKLUNỌ tọn go; yẹn ma sọ yí òylan do klán sọn Jiwheyẹwhe ṣie de.

²² Na whẹ̀dida etọn lẹpo tin to nukọn ṣie; Mọ yẹn ma sọ fẹ́ oséndoai etọn sè sọn dẽ.

²³ Yẹn pé to nukọn etọn; Yẹn sọ hò dẽ pla sọn oylanwiwà ṣie mẹ.

²⁴ Enẹwutu wẹ OKLUNỌ do súahọ mi kẹdẹdi dódó ṣie, Kẹdẹdi wiwe alọ ṣie tọn to nukun etọn mẹ.

²⁵ Hẹ dagbewanyìnọ hiẹ na do dewe hia di dagbewanyìnọ. Hẹ pipénọ hiẹ nasọ do dewe hia di pipénọ.

²⁶ Hẹ homẹwiwenọ hiẹ na do dewe hia di homẹwiwenọ; Podọ hẹ tasinẹntọ hiẹ nasọ do dewe hia di tasinẹntọ.

²⁷ Na hiẹ na whlẹn omẹ nukunbianọ Ṣigba hiẹ na sín nukun sakla tọn dai.

²⁸ Na hiẹ na tá zogbán ṣie: OKLUNỌ Jiwheyẹwhe ṣie na họnun do zinvlu ṣie mẹ.

²⁹ Na gbọn hiẹ dali yẹn hónwezun gbọn awhànfùntọ delẹ́ ji; Gbọn Jiwheyẹwhe ṣie dali yẹn lọ́nfun dòkọ de.

³⁰ Eyín Jiwheyẹwhe tọn wẹ, ali etọn sọgbè: Yè whlé ohó Jiwheyẹwhe tọn pọ́n; Ewọ sọ wẹ awòyinú hlan yé he din fibẹ̀tado to e mẹ lẹ.

³¹ Na mẹnu wẹ Jiwheyẹwhe, adavo OKLUNỌ? Kavi mẹnu wẹ awinyan, adavo Jiwheyẹwhe mítọn?

³² Jiwheyẹwhe wẹ yí huhlọn do gbanjána mi, Bo sọ hẹn ali ṣie sọgbè.

³³ E basi afọ ṣie di afọ agbanlín tọn Bo sọ zé mi do otẹn yìaga ṣie lẹ ji

³⁴ É plọ́n awhànfùnfùn alọ ṣie; Sọmọ bọ awà ṣie dó ogabá ganvẹ̃ tọn de.

³⁵ Hiẹ yí awòyinú whlẹngan towe tọn na mi ga: Adusilọ towe sọ zé mi dote; Jijọ dẹ̃dẹ towe sọ diọ mi zùn daho.

³⁶ Hiẹ diọ zọnlin afọ ṣie tọn zùn daho to oglọ ṣie, Afọgómẹ ṣie ma sọ whàn.

³⁷ Yẹn ko yàn kẹ̀ntọ ṣie lẹ, bo pla yé; Yẹn ma sọ lẹ́ do godo kaka yè do gbidi yé.

³⁸ Yẹn húnú yé, bọ yé ma sọgan fọ́n ṣite: Yé sọ jai to oglọ afọ ṣie tọn.

³⁹ Na hiẹ yí huhlọn do blagbajana mi na awhàn lọ; Hiẹ ko sọ hẹn yé he fọ́n do oji e lẹ jai to oglọ afọ ṣie tọn.

⁴⁰ Na kẹ̀ntọ ṣie lẹ hiẹ na nẹ́gbẹ́ kógodo tọn hlan mi; Na yẹn ni do sukún yé he gbẹwanna mi lẹ tọn do.

⁴¹ Yé dawhá, ṣigba mẹhe na whlẹn yé de ma tin: Yèdọ hlan OKLUNỌ, ṣigba é ma siọ yé.

⁴² Whenẹnu wẹ yẹn tùn yé pọdọpọdọ di afinfin to jẹhọn nukọn: Bo bẹ́ yé jẹgbonu di núyọ to alihota.

⁴³ Hiẹ ko dè mi sọn avùn gbẹtọ lẹ tọn mẹ; Hiẹ yí mi do do nukọntọ na kosi lẹ: Akọta he yẹn ma yọnẹn nasọ yín mẹmẹglọ hlan mi.

⁴⁴ Eyín yé sè linlin ṣie, yé na yí mi sè: Ojonọ lẹ na lita yetọn ai na mi.

⁴⁵ Tùwhé na li ojonọ lẹ, Yé nasọ yí sìsọsisọ do tón sọn fiwhiwhlá yetọn mẹ.

⁴⁶ OKLUNỌ tin to ogbẹ́: donanọ awinyan ṣie ni yín; Na yè ni zé Jiwheyẹwhe whlẹngan ṣie daga.

⁴⁷ Jiwheyẹwhe to ahọsuyína mi; Ewọ wẹ zín gbẹtọ lẹ dai to oglọ afọ ṣie tọn.

⁴⁸ E yi mi sọn kẹ̀ntọ ṣie lẹ si: Nugbo, hiẹ zé mi daga hú yé he fọ́n do oji e lẹ: Hie sọ yí mi sọn gbẹtọ adingbànnọ lọ si.

⁴⁹ Enẹwutu yẹn na nọ pa we, OKLUNỌ É, to kosi lẹ mẹ; Yẹn nasọ nọ jihàn pipa tọn hlan oyín towe.

⁵⁰ Ewọ na whlẹngan daho Ahọlu etọn; Bo sọ yí dagbewanyi hia mẹyiamisisadode etọn, Hlan Davidi, podọ hlan okún etọn kakadoi doi.