PSALM 17 - BIBLU WIWE LỌ 1923

¹ SÈ dódó lọ, OKLUNỌ È, do ayi awhá ṣie go; Dotó odó ṣie go, he ma sọn nùflo oklọ tọn mẹ jẹgbonu.

² Gbọ whẹ̀dida ṣie ni sọn nukọn towe jẹgbonu wá; Gbọ nukun towe ni to kunnumahù pọ́n.

³ Hiẹ ko whlé ayiha ṣie pọ́n; hiẹ ko dla mi pọ́n to ozán mẹ; Hiẹ dindòna mi, hiẹ ma sọ mọ núde; Yẹn ko lẹndai dọ onù ṣie ma na wàylan.

⁴ Gbọn azọ́n gbẹtọ lẹ tọn dali, gbọn ohó nùflo towe tọn dali, Yẹn ko sọ dẽ whlá sọn ali mẹhùtọ lẹ tọn ji.

⁵ Zọnlin ṣie ko hẹnai to ali towe ji, Afọ ṣie ma tlẹ.

⁶ Yẹn to awhádo ylọ we, na hiẹ na siọ mi, Jiwheyẹwhe È: Lé otọ́ towe hlan mi, bo sọ sè ohó ṣie.

⁷ Yí dagbewanyi towe he jawu hia, hiẹ he nọ yí adusilọ towe do whlẹn yé he din fibẹ̀tado to hiẹ mẹ lẹ gán. Sọn yé he fọ́n do yé ji lẹ si.

⁸ Hla mi dai di nukunzìn, Sọ mi whlá do yẹtẹn awàfan towe tọn glọ,

⁹ Sọn mẹylankan he to gbigbà mi do lẹ si, Sọn kẹ̀ntọ ayiha ṣie tọn lẹ si, he lẹ́hla mi pé.

¹⁰ Ojo olàn yetọn titi tọn ṣinyọn yé, Onù yetọn wẹ yé do to ohó sakla tọn dọ.

¹¹ Yé ko lẹ́hla mí pé dinvie to zọnlin mítọn mẹ; Yé ko zé nukun yetọn do nado hẹn mí dẹ́ hlan aigba.

¹² É taidi kinnikinni he to jijlo nado dọntlẹn, Podọ dile ovi kinnikinni tọn nọ tọwù to fìwhiwhlá mẹ do.

¹³ Tite, OKLUNỌ È, gboali nẹ, zé e liai; Gbọn ohi towe dali dè ayiha ṣie sọn alọ mẹylankan lẹ tọn mẹ;

¹⁴ Sọn gbẹtọ si gbọn alọ towe dali, OKLUNỌ E, Sọn gbẹtọ oké mẹ tọn lẹ si ehe tindo ogú mimá yetọn to aihọn he mẹ, Adògo mẹhetọn hiẹ yí adọkunnu whiwhlá towe do gó: Ovi yetọn lẹ sù, Yé sọ nọ yí onú he pò lẹ dai na ovi yetọn lẹ.

¹⁵ Eyín yẹn tọn wẹ, yẹn na to nukunmẹ towe pọ́n to dódó mẹ: ohia towe na pékòna mi, whenuena yẹn fọ́n.