PSALM 145 - BIBLU WIWE LỌ 1923

¹ AHỌLU È, Jiwheyẹwhe ṣie, yẹn na jlayinna we; Yẹn nasọ nọ dona oyín towe kakadoidoi.

² Egbésọ wẹ yẹn na nọ dona we; Yẹn nasọ to oyín towe pa kakadoidoi.

³ Kiklo wẹ OKLUNỌ, bọ yè do nọ pa susu talala; Podọ kiklo etọn yín dinmamọdòna.

⁴ Whẹndo de na pa azọ́n towe lẹ jẹ awetọ, Bo sọ la owalọ huhlọnnọ towe lẹ.

⁵ Sọn kiklo gigonọ yẹyi tọn mẹ, Podọ sọn azọ́n jiawu towe lẹ mẹ wẹ yẹn na nọ lẹnayihamẹpón te.

⁶ Gbẹtọ lẹ nasọ nọ dọhó huhlọn owalọ he dobu towe lọ tọn; Yẹn nasọ nọ la kiklo towe.

⁷ Yé na nọ tùntùn oflin dagbewà towe daho tọn jẹgbonu, Bo sọ nọ jihàn dódó towe tọn lélé.

⁸ Dagbenọ podọ lẹblanunọ wẹ OKLUNỌ; E nọ whleawu nado sadi, dagbewanyi etọn sọ klo.

⁹ OKLUNỌ yín yinyón hlan mẹpopo; Lẹblanu bibọ̀ etọn lẹ sọ tin to azọ́n etọn lẹpo ji.

¹⁰ OKLUNỌ E, azọ́n towe lẹpo na na opẹ́ hlan we; Mẹwiwe towe lẹpo nasọ nọ dona we.

¹¹ Yé na dọhó gigo ahọludu towe tọn, Bo sọ dọhó huhlọn towe tọn;

¹² Nado hẹn owalọ huhlọnnọ etọn lẹ zùn yinyọnẹn hlan visunnu gbẹtọ lẹ tọn lẹ, Po gigo gigodaho ahọludu etọn lọ tọn po.

¹³ Ahọludu madopodo de wẹ ahọludu towe, Ahọludutẹn towe sọ to ote jẹ whẹndo lẹpo mẹ.

¹⁴ OKLUNỌ jlọ yé he jai lẹpo dote, Bo sọ zé yé he yín didó do odò lẹ daga.

¹⁵ Nukun mẹpopo tọn nọte to pinpọ́n we; Hiẹ sọ na núdùdù yetọn yé whenu etọnetọn.

¹⁶ Hiẹ kẹ̀ alọ towe, Bo sọ hẹnnupékọ̀na ojlo nutẹgbẹ̀ lẹpo tọn.

¹⁷ Dódónọ wẹ OKLUNỌ to aliho etọn lẹpo ji, Dagbenọ to azọ́n etọn lepo mẹ.

¹⁸ OKLUNỌ ma dẹ̀n do yé he to awhádoylọ ẹ lẹ de gba, E tin to yakẹ yé he to awhádoylọ ẹ to nugbo mẹ lepo tọn.

¹⁹ É nasọ hẹn ojlo yé he dibusi i lẹ tọn ṣẹ: E na sè awhá yetọn ga, bo nasọ whlẹn yé gán.

²⁰ OKLUNỌ yínuglona yé he yiwan nẹ̃ lẹ: Ṣigba mẹylankan lẹpo wẹ é na hùsúdo.

²¹ Onù ṣie na to pipa OKLUNỌ tọn hódọ: Mì sọ gbọ gbẹtọ lẹpo ni dona oyín etọn wiwe kakadoidoi.