PSALM 143 - BIBLU WIWE LỌ 1923

¹ SÈ odẹ̀ ṣie, OKLUNỌ È, bo sọ tùn tóai hlan ovẹ́ ṣie: Siọ mi to nugbo towe mẹ, podọ to dódó towe mẹ

² A sọ biọ whẹ̀dida mẹ hẹ devi towe blo: Na mẹgbẹ́ he yè na sùwhẹ̀na to nukọn towe de ma tin.

³ Na kẹ̀ntọ ko dohomẹkẹn ayiha ṣie; É tùnafọ gbigbọ ṣie ji to aigba, É hẹn mi nado nọnọ̀ zinvlu mẹ, di omẹ he ko kú e dẹn.

⁴ Enẹwutu wẹ gbigbọ ṣie kúṣiọ to ohò ṣie mẹ: Ayiha he to ohò ṣie mẹ sọhùnbú.

⁵ Yẹn flin azán hóhó tọn lẹ; Yẹn lẹn azọ́n towe lepo pọ́n; Yẹn ayihamẹlẹnpón na azọn alọ towe tọn lẹpo.

⁶ Yẹn dlẹn alọ ṣie jẹgbonu hlan we: Nugba towe to ayiha ṣie hù, di aigba nudikòna de. Selah.

⁷ OKLUNỌ È, yawu nado siọ mi: nukọ̀di na ayiha ṣie: A yí nukun towe whlá son dẽ blo, Na yẹn nikã lẹzùn di omẹ he jẹte yì odo mẹ lẹ.

⁸ Hẹn mi sè dagbewanyi towe to afọnnu; Na hiẹ go wẹ yẹn dotudo: Hẹn mi yọ́n aliho he ji yẹn na zinzọnlin gbọn; Na yẹn zé ayiha ṣie daga hlan we.

⁹ OKLUNỌ È, whlẹn mi sọn kẹ̀ntọ ṣie lẹ si: Yẹn họ̀n wá de we nado sọ mi whlá.

¹⁰ Plọ́n mi nado wà ojlo towe: na hiẹ wẹ Jiwheyẹwhe ṣie: Yinyọ́n wẹ gbigbọ towe; plan mi yì aigba tenọgligli tọn ji.

¹¹ Nagbẹ̀ mi, OKLUNỌ È, na oyín towe wutu: Dè ayiha ṣie sọn tukla mẹ to dódó towe mẹ.

¹² Podọ to dagbewanyi towe mẹ và kẹ̀ntọ ṣie lẹ, Bo sú yé he to nukunbiana ayiha ṣie lẹpo do: na devi towe wẹ yẹn.