PSALM 139 - BIBLU WIWE LỌ 1923

¹ OKLUNỌ È, hiẹ ko dindòna mi, bo sọ yón mi.

² Hiẹ yón aisinsin ṣie po finfònṣite ṣie po, Hiẹ tunwun lẹndai ṣie to olá boboe.

³ Hie dindòna omọji ṣie po aimimlọn ṣie po, Bo sọ yín mẹyọndòna aliho ṣie lepo.

⁴ Na ohó depope ma tin to odẹ̀ ṣie mẹ, Dayi e go, OKLUNỌ E, hiẹ yòn ẹn patapata.

⁵ Hiẹ ko glọn mi godo nukọn, Bo sọ do alọ towe ọgo e.

⁶ Yinyọnen mọtọnnkọ yín nujawu na, mi gbahúgbahú; E yín ehe yìaga, yẹn ma sọgan yòn ẹn.

⁷ Fie yẹn na yì sọn gbigbọ towe de? Kavi fie wẹ yẹn na họ̀nyì sọn nukọn towe?

⁸ Eyín yẹn hẹji biọ olọn mẹ, hiẹ tin finẹ: Eyín yẹn do adózan ṣie do kutòmẹ, dayi e go, hie tin finẹ.

⁹ Eyín yẹn yí awà afọnnu tọn, Bo nọnọ̀ opòdo ohù tọn;

¹⁰ Yèdọ finẹ wẹ alọ towe na do mi te, Adusilọ towe na hẹn ogo e.

¹¹ Eyín yẹn sọ dọmọ, Be zinvlu na ṣinyọn oji e; Hinhọ́n na yín ozán to dali ṣie;

¹² Yèdọ zinvlu ma whlá sọn de we gba; Ṣigba ozán họ̀nun di okle: Zinvlu po hinhọ́n po dopo wẹ awe lẹ yín hlan we.

¹³ Na hiẹ wẹ tindo ahúnkẹ̀nmẹ ṣie lẹ: Hiẹ we lọ̀n mi dopọ to adò onọ ṣie tọn mẹ

¹⁴ Yẹn na dopé hlan we; na awujiji po nujawu po mẹ wẹ yè da mi: Nujawu wẹ azọ́n towe lẹ: Enẹ wẹ ayiha ṣie yọnẹn hézéhézé.

¹⁵ Ohú ṣie lẹ ma yín whiwhlá do we gba, Whenuena yè da mi to nuglọ, Bo sọ yí anawiwà do to linlòn mi to odẹ̀ patapata aigba tọn lẹ mẹ.

¹⁶ Nukun towe mọ dida mapémapé ṣie: Podọ to owé towe me wẹ yè wlan awutugonu ṣie lẹpo do, Ehe yè to ana etọn wà egbésọegbésọ, Whenuena depope yetọn ma ko tin.

¹⁷ OKLUNỌ E, na lẹndai towe lẹ hlan mi yín nuhọakue sọ! Na sọha yé tọn klo sọ!

¹⁸ Eyín yẹn na hia yé, yé sù to sọha mẹ hú otọ̀kẹ́n: Whenuena yẹn fọ́n, yẹn tin to de we jãnwẹ.

¹⁹ Jiwheyẹwhe E, hiẹ na hù mẹylankan lẹ nugbonugbo: Enẹwutu mì yì sọn dẽ, mì mẹhùnnùtọ emi.

²⁰ Na yé yí oylan do to hódọ do ogo we; Kẹntọ towe lẹ to oyín towe ylọ to òvó mẹ.

²¹ OKLUNỌ E, be yẹn ma gbẹwanna yé he gbẹwanna we lẹ? Bé homẹ ma gble mi do yé he fọ́n do oji we lẹ go?

²² Yẹn yí wangbẹnamẹ he pé do gbẹwanna yé: Yẹn sọ hia yé dogó kẹ̀ntọ ṣie lẹ.

²³ Dindòna mi, Jiwheyẹwhe E, na a ni yón ayiha ṣie: Whlé mi pọ́n, na a ni yòn tùmajai ṣie lẹ:

²⁴ Bo sọ pọ́n eyín aliho ylankan de tin to oho ṣie mẹ, Bo sọ hẹn mi gbọn aliho madopodo lọ mẹ.