PSALM 138 - BIBLU WIWE LỌ 1923

¹ YẸN na yí ayiha ṣie lẹpo pete do dopẹ hlan we: To nukọn yẹwhe lẹ tọn wẹ yẹn na jihàn pipa lẹ hlan we.

² Yẹn na litai hlan tẹmpli towe wiwe dali, Bo sọ pa oyín towe na dagbewanyi towe podọ na nugbo towe; Na hiẹ ko hẹn ohó towe klo yìaga hú oyín towe lẹpo.

³ To azán he gbè yẹn dawhá ylọ, hiẹ siọ mi, Bo sọ yí huhlọn do hẹn mi gbóadọ to ayiha ṣie mẹ.

⁴ OKLUNỌ E, ahọlu aigba tọn lẹpo na dopé hlan we, Na yé ko sè ohó onù towe mẹ tọn.

⁵ Nugbo, yé na jihàn aliho OKLUNỌ tọn lẹ tọn: Na kiklo wẹ gigo OKLUNỌ tọn.

⁶ Le OKLUNỌ tlẹ yín meyìaga sọ, gãnṣo é mọ whiwhẹnọ le. Ṣigba saklanọ we é yonẹn sọn aganu

⁷ Le yẹn tlẹ to zọnlinzin to tukla mẹ sọ, hiẹ na hẹn mi gònọgbẹ̀: Hiẹ na dlẹn alọ towe jẹgbonu do homẹgble kẹ̀ntọ ṣie lẹ tọn ji, Adusilọ towe nasọ whlẹn mi.

⁸ OKLUNỌ na hẹn onú he yín ṣie lẹpo zùn pipé na mì: OKLUNỌ È, dagbewanyi towe to ote kakadoi: A gbẹ́ azọ̃n alọ towe titi tọn lẹ dai blo.